Read Kalanga Luke 21 Bible Online

Luke 21 - Kalanga bible

Luke 21

¹Kukati Jesu emilidza mesho, kabona bafumi belonga zwipo zwabo mutjija tje mari e Ng'umba ye Ndzimu.

²Kabona tjilikadzi ye nshayi elonga maloso mabili e khopa.

³Kati, “Ndolebesa ndoti, tjilikadzi iyeyi ye nshayi yalonga kunopinda kwabo bose.

⁴Bathu bose badusa zwipo zwabo benokola mu fumwa yabo, koga iye mu bushayi gugwe, walonga kose kwaanotjila ndiko.”

⁵Ndizo bamwe be badiyiwa babe bakati belebeleka ngekwe Ng'umba ye Ndzimu, sekwa yakanakisiwa nge mabgwe mabuya nenge zwipo zwe Ndzimu,

⁶Jesu kabadwa kati, “Ngekwe zwithu izwezwi zwamunobona, mazhuba anowozha, kusingowosala bgwe ipapa lakatiliyana ne limwe, lisingowoligigwa pasi.”

⁷Bakambhuzwa beti, “N'diyi, zwithu izwezwi zowoshingikala lini? Kakale tjilakidzo tjekuti zwabe pejo nge kushingikala tjowobeni?”

⁸Ngono kashandula eti, “Ibeni ne njele kuti musidzimidziwe, ngobe banji banowozha nge zina langu beti, ‘Ndimi iye,’ kakale beti, ‘Misi yasedzela.’ Koga musibatobele.

⁹Ha muhwa ngekwe ngwa nenge kupandukilana pakati kwe bathu, musitje. Ngoti zwithu izwezwi zwakafanila shingikala kutanga, koga bupelo agutowoswika ipapo.”

¹⁰Kadwilila kati, “Itjaba tjowomukila itjaba ne bushe gukamukila bushe.

¹¹Kowobe ne kutengenyeka kwe shango kwakabangalala ne bhamba ne njigwele ne zwinoshingikala zwinotjisa ne zwilakidzo zwikulu zwinodwa kudzimu.

¹²Koga ikoku kowoti kusathu kukashingikala, banomusunga bakamudziyidza. Banowomukakatila ku bakulu be ng'umba dze mitembezelo ne mu ng'umba dze busungwa, kakale mowoyisiwa mbeli kwa bomambo ne balauli ngekwe zina langu.

¹³Kobe kwabe tjibaka tjekuti mupe butendeki,

¹⁴koga simisani mimoyo yenyu, musidziyidzike kuti mowodabila tjini.

¹⁵Ngobe ndowomupa matama ne butjenjedu gusingawokundiwa kene kunyanyayidziwa nge zwita zwenyu.

¹⁶Mowosungisiwa nge bazwadzi nenge bana ba tate benyu nenge makamu enyu nenge bazwalani benyu, ngono banowobulaya bamwe benyu.

¹⁷Bathu bose banowomubenga ngekwe zina langu.

¹⁸Koga akuna vudzi ling'ompela mu misholo yenyu linowolashika.

¹⁹Nge kudzikitadza kwenyu, mowowana butjilo gwenyu.

²⁰“Koga ha mubona Jerusalema yakakombiwa nge ngwa, zibani kuti tjibaka tje kupaladziwa kwayo.

²¹Ipapo bamu Judiya ngabatizhile ku matombo, ba mu nzi nkulu ngababhude ne bamu shango basingine mu nzi nkulu.

²²Ngobe eyi ndiyo misi ye kubgwilizila kuti matama wose akakwagwa ashingikale.

²³Yee mme wee! Kowobangalala seni kumuli imwi bakadzi bakazwisenga ne banomwisa mu misi iyeyo! Kowobe ne buyendasi bukulu mu shango ne bushongola mu bathu ibaba.

²⁴Banowobulawa nge thumo, ngono bakatapigwa mu zwitjaba zose. Nzi we Jerusalema unowokanyangiwa nge Bezwitjaba, kuswikila tjibaka tjebe Bezwitjaba tjipela.”

²⁵“Kowobe ne zwilakidzo mu zhuba ne mu mwedzi nenge mu nyenyedzi. Mu shango zwitjaba zowodziyidzika, zwishanganyiwa nsholo nge kuwona nenge kumidukana kwe vula ye gungwa.

²⁶Bathu betimbamamisiwa ngotja, bedziyidzika nge kuti ini tjinozha mu shango, ngobe masimba apezhugwi anowotengenyeka.

²⁷Ngono kudwapo banowobona Nkololo we Nthu ezha ali mu gole, nge masimba nenge kukudziwa.

²⁸Ha zwithu izwezwi zwitangisa kushingikala, mumilidze mesho yenyu mulinge pezhugwi, ngobe dzutunugwa kwenyu kowobe kwabe pejo.”

²⁹Ipapo kababudza tjifaniso etji, “Mulinge mpaya ne miti yose.

³⁰Ha ithinila, mozwibonegwa mukaziba kuti tjilimo tjabe pejo.

³¹Sa ikoko ha mubona zwithu izwezwi zwishingikala, zibani kuti bushe gwe Ndzimu gwabe pejo.

³²“Ndolebesa ndoti kumuli, zwithu izwezwi zowoshingikala bathu ibaba bangwenu basathu bakapela.

³³Zhuzhugwi na pasi zowopela, koga matama angu anowosala.”

³⁴“Ibeni nenjele kuti ndizo mimoyo yenyu isikuligwe ngoja nenge kulaladza nenge kudziyidzika mu butjilo guno, zhuba ilelo lidwa limubhata se dati makakangang'wa,

³⁵ngobe lowozha mu bathu bose mu shango pamwe ne pamwe.

³⁶Ibeni nenjele, misi yose mutembezele, kuti mube ne simba le kukunda zwithu zose izwezwi ha zwishingikala ne kuma mbeli kwe Nkololo we Nthu.”

³⁷Zhuba ne zhuba Jesu wakabe ediya mu Ng'umba ye Ndzimu, ngono madekwana mamwe ne mamwe ebhuda enolala ku dombo linoyi Dombo le Mitoba.

³⁸Mangwanana bathu bose bakabe bezha kunli kuwunhwilila mu Ng'umba ye Ndzimu.