Read Kalanga Luke 22 Bible Online

Luke 22 - Kalanga bible

Luke 22

¹ Nzano we Tjiwunga tjisina Mbidzo unodang'wa Nzano we Kupinda pezhugwi, wakabe watjibo pejo.

²Bapirisiti bakulu ne badiyi be nlayo bakabe beshaka zila yabangabulaya Jesu ndiyo, ngono betja bathu.

³Ipapo Satani kangina muna Judasi, unodang'wa Isikariyoti, mmwe we bali gumi lina babili.

⁴Ndizo Judasi kayenda ku bapirisiti bakulu ne balauli be balindi be Ng'umba ye Ndzimu, kalangana nabo sekwa angawongela Jesu ku bali.

⁵Ngono bakashatha kwazo, ndizo bakaduma kumpa mari

⁶ndizo Judasi kaduma, kashaka tjibaka tjakalingisana tje kuwonga Jesu pasina mbunga.

⁷Zhuba le Tjiwunga tjisina Mbidzo, likazha lekuti pkhwizana ye Nzano we Kupinda pezhugwi ibulawe.

⁸Ndizo Jesu katuma Pita na Johani eti, “Yendani munotilulwamisila zojiwa zwe Nzano we Kupinda pezhugwi, kuti ndizo tije.”

⁹Bakambhuzwa beti, “Moshaka kuti timululwamisile izo ngayi?”

¹⁰Kadabila eti, “Mowoti mungina mu nzi, mowoshangana ne nlume akasenga shabana ye vula. Muntobele kunoti mu ng'umba yaanowongina,

¹¹ngono muti ku mweni we ng'umba, ‘N'diyi kati ku kuli, ng'umba ye bezi ingayi, yandingajila zojiwa zwe nzano wekupinda pezhugwi ne badiyiwa bangu?’

¹²Unowomulakidza ng'umba hwulu hwulu ipezhugwi kwe imwe yakalongwa zwinogagwa. Mululwamise ikoku.”

¹³Bakayenda, bakanowana zwithu zwili sekwa babudziwa ndi Jesu. Ndizo bakalulwamisila zojiwa zwe Nzano we Kupinda pezhugwi.

¹⁴Ngono kukati tjibaka tjaswika, Jesu ne batumwa babe bakagala pasi kuja,

¹⁵Kabadwa kati, “Ndayemula kwazo kuja namwi tjilayilo tje Nzano we Kupinda pezhugwi ikoku ndisathu adziyila.

¹⁶Ngobe ndomubudza nditi, anditjawotjija kakale kudzina tjatjinoleba tjishingakala mu bushe gwe Ndzimu.”

¹⁷Kukati aamutjila bhepe le nkumbi we zhambi, kaboka eti, “Tolani ikoku mukobane.

¹⁸Ndomubudza nditi, anditjawong'wa kakale nkumbi we zhambi, kudzina bushe gwe Ndzimu guzha.”

¹⁹Katola tjiwunga kati aboka, katjipemula kabapa itjo eti, “Oyu mbili wangu unopigwa imwi. Itani ikoko, kundikumbula.”

²⁰Ngekwakajalo katola bhepe le nkumbi we zhambi shule kwe tjilayilo kati, “Bhepe ileli tjidumano tjitshwa tje malopa angu, anotebuligwa imwi.

²¹“Koga bonani, iye unowondiwonga unoja nami mu ndilo.

²²Nkololo we Nthu unowofa sekwa kwakabigwa nge Ndzimu, koga yee mme wee! Wapalala iye nthu unon'wonga!”

²³Bakatangisa kubhuzwana tjekwabo kuti ndi upi wabo unowoshinga ikoku.

²⁴Ngono kwakabe ne kunyanyayidzana pakati kwabo, kuti ndiani wabo unowobe nkulu tjose.

²⁵Jesu kati ku bali, “Bomambo be zwitjaba banobusa bathu babo, ngono ibabo bana simba banodang'wa ‘Babhatshi be bathu.’

²⁶Koga imwi amuzofanila kube sa ikoko. Nkulu tjose pakati kwenyu ngaange iye ntukunu tjose, ngono mbusi ngaange nlanda.

²⁷Nkulu ndiupi, ugele eja kene unopakula? Apa ate ugele eja kene? Koga imi ndi pakati kwenyu se mpakuli.

²⁸“Imwi ndimwi makama nami mu ndiko dzangu dzose.

²⁹Ndizo ndomupa bushe koga sa Tate bangu bakandipa bushe,

³⁰mowoja mukang'wa nami mu bushe gwangu, mukagala mu zwigalo zwe bushe musumikilisa njudzi dzili gumi lina mbili dze Iziraela.”

³¹Jesu kati, “Simoni, Simoni, Satani wakumbila kube nawe kukuzhunga se mathunde.

³²Koga ndakutembezelela Simoni kuti kugalamoyo kuko kusipele. Uti washanduka usimise zwikamu zwizo.”

³³Koga kadabila kati, “She, ndakazwimisila kuyenda namwi ku ng'umba ye busungwa ne ku lufu dumbu.”

³⁴Jesu kashandula eti, “Ndokubudza Pita, nditi, gukurume lowoti lisathu likalila nasi ukabe wandizwilandula katatu.”

³⁵Ipapo Jesu kababhuzwa kati, “Apa ndakati ndimutuma musina ikwama tje mari kene gobhodo kene khwebana, mukasheta tjimwe kene?” Bakashandula beti, “Akuna tjatakasheta.”

³⁶Kati ku bali, “koga ngwenu iye una ikwama tje mari, ngaatjitole, kose ne gobhodo, koga iye usina bukanu, atengese hazu iye agutenge.

³⁷Ngobe ndomubudza nditi tjakakwagwa kuyi, ‘wakabaligwa pa nng'ompela ne batjinyi’ tjakafanila kuti tji shingikadziwe mundili, ndizoke tjakakwagwa nge kwangu tjoshingikala.”

³⁸Badiyiwa bakati, “Bonani She, awa makanu mabili.” Kadabila eti, “Kwalizana.”

³⁹Jesu kabhuda mu nzi nkulu, kayenda ku Dombo le Mitoba se mazhuba wose, badiyiwa babe bakantobela.

⁴⁰Ngono kati eswika pathu ipapo kati ku bali, “Tembezelani kuti musingine mu kulikwa.”

⁴¹Kadwa pabali thambgwana ingaposiwa bgwe likawilapo, ngono kathigama katembezela eti,

⁴²“Tate, ha muda, dusani bhepe ileli le kudziyidziwa pandili, koga kusi nge kuda kwangu, ngakushingwe kuda kwenyu.” [

⁴³Ngono ntumwa unodwa kudzimu kaboneka kunli, kansimisa.

⁴⁴Nge shungu hwulu, katembezela nge masimba, ndizo dukuta lile likafanana ne madokhwe e malopa edothela pasi.][11]

⁴⁵Kati emilika, apedza tembezela kabgwilila ku badiyiwa babe, kawana bakayizela nge buyendasi.

⁴⁶Kababhuzwa kati, “Ini makayizela? Mukani mutembezele kuti ndizo musingine mu kulikwa.”

⁴⁷Kukati, atjalebeleka, mbunga we bathu ukazha wakatungamigwa ndi Judasi, mmwe we bali gumi lina babili. Kasedzela kuna Jesu kumputa.

⁴⁸Koga Jesu kambhuzwa kati, “Judasi, apa unowonga Nkololo we Nthu nge kumputa kene?”

⁴⁹Kukati bakabe bana Jesu bebona kuti kowoshingikalani bakati, “She, apa tibateme nge makanu edu kene?”

⁵⁰Ndizo mmwe wabo katema nlanda we Ntungamili we bapirisiti kanthubula zebe ye luji.

⁵¹Koga Jesu kati, “Kwagala ikoku!” Kabhata zebe ye nlume ihwoyo ngono kampodza.

⁵²Ipapo Jesu kati ku bapirisiti bakulu ne balauli be balindi be Ng'umba ye Ndzimu ne bakulu be Bajuta bakabe bazha kunli, “Apa mazha ku ntjinyi kene, kwamungadzina mukazha nge makanu nenge swimbo kene?

⁵³Ndakabe namwi misi yose mu Ng'umba ye Ndzimu, koga amuzotongo ndibhata. Koga etji nditjo tjibaka tjenyu ne tjibaka tje simba le zhalima.”

⁵⁴Ipapo bakasunga Jesu, bakantola, bakayenda bakangina naye mu ng'umba ye Ntungamili we bapirisiti. Pita katobela ali thambgwana.

⁵⁵Kukati babesa moto pakati kwe nsha, ngono bagala pasi bose, Pita kagala pasi nabo.

⁵⁶Mmwe nlandakadzi kambona ali gele ipapo pa tjedza tje moto. Kanlingisisa ngono kati, “Ihwoyu wabe anayebo.”

⁵⁷Koga Pita kalandula eti, “Nkadzi, ndiwe anditonziba.”

⁵⁸Shule kwe tjibaka tjifupi mmwe kakale kambona ngono kati, “Iwe umwe wabo.” Pita kadabila eti, “Lumewe, ate ndili mmwe wabo.”

⁵⁹Shule kwe tjibaka tjingapa awara mmwe kakale kati, “Tjoselele iwoyu nlume wabe anaye, ngobe na iyebo N'galili.”

⁶⁰Koga Pita kadabila eti, “Lumewe, anditoziba kuti unoleba ngekweni!” Kukati ipapo koga atjalebeleka, gukurume likalila.

⁶¹She katendebuka kalingisisa Pita. Ipapo Pita kakumbula matama a She akabe andwa eti, “Gukurume lowoti lisathu likalila nasi unowobe wandizwiladula katatu.”

⁶²Kabhudila pazhe, ngono kalila kunogwadza.

⁶³Balume bakabe bakabhata Jesu bakatangisa kun'dadila kakale benloba.

⁶⁴Bakanzwimba mesho bakati kunli, “U nlebesambeli, leba! Ndiani wakuloba?”

⁶⁵Bakaleba zwimwe zwinjinji bentuka.

⁶⁶Kukati kuyedza makulukota e bakulu be Bajuta ne bapirisiti bakulu ne badiyi be nlayo bakakubungana, Jesu kazhisiwa mbeli kwabo.

⁶⁷Bakati, “Ha uli iye Mesiya utibudze.” Jesu kadabila eti, “Ne ndingamubudza, amutowogalamoyo,

⁶⁸kakale ha ndingamubhuzwa amutowondishandula.

⁶⁹Koga kudwa ngwenu, iye Nkololo we Nthu unowogala ku luboko gwe luji gwe Masimbawose e Ndzimu.”

⁷⁰Bose bakabhuzwa bakati, “Apa ndiwe Nkololo we Ndzimu kene?” Kadabila eti, “Maleba kuti ndi iye.”

⁷¹Ipapo bakati, “Ini titjashaka butendeki gumwe? Tanzwihwigwa tjaaleba nge nlomo uwe.”