Read Kalanga Luke 23 Bible Online

Luke 23 - Kalanga bible

Luke 23

¹Kudwapo gubungano lose le bathu likamilika likan'yisa kuna Pilato.

²Ngono bakatangisa kuntilika nlandu beti, “Tawana nlume iwoyu edzimidza itjaba tjedu, kakale etidzibisa kulipa lukhetho kuna Kaisara, kati ndiye Mesiya ali mambo.”

³Ndizo Pilato kabhuzwa Jesu kati, “Apa ndiwe mambo we Bajuta kene?” Jesu kashandula eti, “Waleba.”

⁴Ngono Pilato kadwa bapirisiti bakulu ne mbunga we bathu kati, “Anditobona nlume iwoyu nlandu.”

⁵Koga bakasimisa beti, “Unodzonga bathu mu Judiya yose nge kudiya kukwe. Wakatangisa ku Galili, kadzina kawoti muno.”

⁶Kukati Pilato ehwa ikoku, kabhuzwa kuti kene nlume iwoyu ate N'galili.

⁷Kukati ehwa kuti Jesu unodwa mu ntuthu unobusiwa ndi Herode, kantumila kuna Herode, wakabe ali mu Jerusalema mu nsi iyeyo

⁸Herode kati ebona Jesu, kashatha kwazo, ngobe kuli kwetjinga kwaakayemula kumbona. Muna tjaakabe ahwa nge kukwe, wakabe egalabgwe kuti unowombona eyita matjenamiso.

⁹Ndizo kambhuzwa bhuzo njinji kwazo, koga Jesu kasishandule ne ing'ompela yadzo.

¹⁰Bapirisiti bakulu ne badiyi be nlayo, bakabe bali mile ipapo bentilika nlandu bakasimisa.

¹¹Ipapo Herode ne babhayani babe bakanlingila pasi ben'dadila. Bakaambadza hazu yakanaka kwazo, bakambgwiliza kuna Pilato.

¹²Ngono zhuba ilelo Herode na Pilato bakabe bazwalani, ngobe kutanga bakabe bakabengana.

¹³Pilato kakubunganya bapirisiti bakulu ne batungamili ne bathu,

¹⁴ngono kati ku bali, “Mandizhisila nlume iwoyu muti unodiyila bathu ntome. Ndambhuzwisisa mbeli kwenyu, ngono andizowana ali nlandu muna zose zwamunoleba.

¹⁵Kose na Herode dumbu aazombona nlandu, ngobe wanshandusila ku tili. Akuna tjaakatjinya iwoyu nlume tjaangabulayigwa.

¹⁶Ndizo, ndowonloba, ansunungula.”[12]

¹⁷

¹⁸Bathu bose bakamimila beti, “ngaabulawe nlume iwoyu! Mutisunungulile Bharabhasi!”

¹⁹Bharabhasi wakabe asungigwa kubulaya ne kumusa phandu mu nzi nkulu.

²⁰Ngoyemula kusunungula Jesu, Pilato kabakumbila kakale,

²¹koga bakamimilila mbeli beti “Mumbambule! Mumbambule!”

²²Gwe butatu kati ku bali, “Nge kutini? Watjinyani? Andizombona nlandu, waangabulayigwa. Ndizo ndowonloba, ansunungula.”

²³Koga bakabe besimisa nge mahwi apezhugwi kuti abambugwe, ngono abo mahwi kakunda.

²⁴Pilato kabadwa kati kuthamwe sekwa bakabe beshaka.

²⁵Kasunungula nlume wakabe asungigwa pandusa bathu ne kubulaya, iye wabakabe beshaka, ngono kabapa Jesu kuyita tjabanoda.

²⁶Babhayani bakati beyenda na Jesu bakashangana na Simoni unodwa ku Sirene, wakabe engina edwa kuzhe kwe nzi nkulu, bakampikisa tjileyanyo ali shule kukwe.

²⁷Ngono bathu banji bakantobela, kose ne bakadzi bakabe bekuwa benlilila.

²⁸Koga Jesu katendebuka, kati ku bali, “Bakololokadzi be Jerusalema, musindililile, koga muzwililile, imwi ne bana benyu.

²⁹Ngobe misi inowozha bathu yabanowoti, ‘Bakakombolegwa seni bakadzi basingathame bana ne zwibumbilo zwisakatongo senga, kose ne mazhamu asakatongo mwisa!’

³⁰Ipapo banowoti ku matombo, ‘Mutiwile,’ bakati ku matuthu ‘Mutivukidzile!’

³¹Ha bathu beyita ikoku mu nti nnyolo, kowoyitikalani ha nti wawoma kene?”

³²Balume babili be zwigebeng'a, bakatogwabo kang'ompela naye kunobulawa.

³³Bakati beswika pathu panodang'wa Ipepe tje Nsholo, bakambambula, kose ne zwigebeng'a, tjimwe ku luboko gwe luji tjimwe ku luboko gwe lumeshwe.

³⁴Ngono Jesu kati, “Tate, mubazwiibhatigwe, ngobe abatoziba tjabanothama.” Bakakobana zwiambalo zwizwe nge kukandila.

³⁵Bathu bakama bakalingilila, koga bakulu be Bajuta bakankuwelela bakati, “Wakatjidza bamwe, ngaazwitjidze, ha ali Mesiya we Ndzimu, Nshalugwa wawo.”

³⁶Babhayani na ibobo ngono bakan'dadila. Bakampa nkumbi wakatyorowa,

³⁷ngono bakati, “Ha uli Mambo we Bajuta, uzwitjidze.”

³⁸Kwakabe kuna nkwalo wakakwagwa tjapezhugwi kukwe unoti, “OYU NDI MAMBO WE BAJUTA.”

³⁹Mmwe we zwigebeng'a zwakabambugwa mu tjileyanyo kantuka, kati, “Apa ate uli Mesiya kene? Uzwitjidze naswi utitjidze bo!”

⁴⁰Koga mmwe kantjemela eti, “Apa autotja Ndzimu se walobgwa shamu inofanana ne yaalobgwabo kene?

⁴¹Iswi kwakatilulwamila tolobgwa, ngobe towana mbhayilo wakafanila mishingo yedu. Koga nlume iwoyu akuna tjaatjinya.”

⁴²Ipapo kati, “Jesu, mundikumbule ha muswika mu bushe gwenyu.”

⁴³Jesu kanshandula kati, “Ndolebesa ndoti, nasi unowobe nami mu Paradaisi.”[13]

⁴⁴Kwakabe kuli tjibaka tje masikati makulu, ngono kukabe zhalima mu shango yose kuswikila tjibaka tje matewuko,

⁴⁵ngobe zhuba lakabe lati zwi. Tjisitili tje Bugalo gwe Ndzimu tjikapaluka pakati kudwa pezhugwi kunoti pasi.

⁴⁶Jesu kadanilila nge hwi gulu eti, “Tate, ndolonga meya yangu mu maboko enyu.” Kukati aleba ikoku kapela.

⁴⁷Kukati nlauli we babhayani bali zana ebona tjayitikala kakudza Ndzimu eti, “Tjoselele, iwoyu nlume wakabe asina nlandu.”

⁴⁸Kukati bathu bose bakabe bakubunganila kuwobona ikoku bebona tjashingikala, bakazhala buyendasi ngono bakayenda ku mizi yabo bakapuna mimoyo.

⁴⁹Koga bose bakabe benziba kose ne bakadzi bakabe bantobela kudwa ku Galili, bakama thambgwana, bakalingilila zwithu izwezwi.

⁵⁰Ngono ngwenu kukabe kuna mmwe nlume unoyi Josefa wakabe edwa mu nzi we Arimateya, wakabe ali mmwe we makulukota e Bajuta,[14] ngono ali nlume wakalulwama ana malebeswa.

⁵¹Iye wakabe asadumana nge nkumbulo nenge nshingo wabo. Wakabe akalindila bushe gwe Ndzimu.

⁵²Nlume iwoyo wakayenda kuna Pilato ngono kakumbila Itumbu tja Jesu.

⁵³Ipapo katjitulula, katjipetela nge jila katjilonga mu ikumbu tjakakopogwa mu shongwe, tjisina wakatongo biganyiwa mutjili.

⁵⁴Lakabe lili Zhuba le Kubiganyidza, ngono Sabata labe lotangisa.

⁵⁵Bakadzi bakabe bazha na Jesu kudwa ku Galili bakatobela ngono bakabona ikumbu tja Jesu kose ne kubiganyiwa kukwe.

⁵⁶Ipapo bakabgwilila kanyi kunolulwamisa motsha ne mafuta anonuhwa zwakanaka. Koga bakanyaluluka nge Sabata kuyendidzana ne nlayo.