Read Kalanga Luke 24 Bible Online

Luke 24 - Kalanga bible

Luke 24

¹Kukati mu zhuba le kutanga mu tshipi, kutji mangwanana kwazo, bakadzi ibabo bakatola motsha wabakabe balulwamisa, bakayenda ku ikumbu.

²Bakawana bgwe lakabe lakazhalila nkoba we ikumbu lakakunguludzigwa kutjena ne ikumbu,

³koga bakati bengina mukati, bakasiwane itumbu.

⁴Bakati batjakakaabala ngekwa ikoku, balume babili bakaambala zwiambalo zwinopenya bakama pejo nabo.

⁵Ngotja kwabo, bakakotamisa misholo pasi, ipapo balume ibabo bakati ku bali, “Ini mushaka ntjili mu bafi?

⁶Aapo ipapa wamuka. Kumbulani sekwa akamubudza, atji mu Galili eti,

⁷‘Nkololo we Nthu wakafanila alongwe mu maboko e batjinyi, abambugwe, koga mu zhuba le butatu amuke.’ ”

⁸Ipapo bakakumbula matama awe.

⁹Ngono bakati beshanduka bedwa ku ikumbu, bakabudza bali gumi lina ung'ompela ne bamwe bose ikoku kose.

¹⁰Kwakabe kuli Mariya we Magadala na Joanna na Mariya mme ba Jakubo ne bamwe bakabe banabo, bakabudza batumwa ba Jesu ikoku.

¹¹Koga bakasidume tjinolebgwa nge bakadzi ibabo, ngobe bekumbula kuti banoleba mazhambgwala.

¹²Koga Pita kamilika kalabukila ku ikumbu, kukati eshozhela, kabona matyila ali woga, ndizo kabgwilila akakaabadziwa nge tjashingikala.

¹³Zhuba ilelo zwalo bamwe babili be badiyiwa bakabe beyenda ku nzi unoyi Emausi, thambo ingabe khilomitha dzili gumi kudwa ku Jerusalema.

¹⁴Bakabe bezuwa ngekwe zwithu zose izwezwi zwakabe zwashingikala.

¹⁵Bakati batjazuwa belebeleka ngekwe zwithu izwezwi, Jesu nge kukwe kazha, kabhatana zila nabo.

¹⁶Koga bakayitiwa kuti basinzibe.

¹⁷Kababhuzwa kati, “Moyenda muzuwa ngekweni kene?” Bakama belingika bakafubala.

¹⁸Mmwe wabo unoyi Kileopasi kambhuzwa kati, “Apa ndiwe woga mwezi mu Jerusalema usingazibe zwithu zwakashingikala mazhuba iyawa kene?”

¹⁹Kabhuzwa kati, “Zwithu zwipi?” Bakadabila beti, “Ngekwa Jesu we Nazareta. Wakabe ali nlebesambeli, ana masimba makulu mu matama nenge mu mishingo mbeli kwe Ndzimu ne bathu bose.

²⁰Bapirisiti bakulu ne balauli bedu bakan'yisa ku nlayo kuti asumikilisigwe lufu abambugwe.

²¹Koga takabe tigalabgwe kuti ndiye unowosunungula Iziraela. Nasi i zhuba le butatu zwithu zose izwezwi zwakashingikala.

²²Pezhugwi kwa ikoku, bamwe bakadzi be goko ledu batitjenamisa. Bayenda ku ikumbu nasi kutji mangwanana kwazo,

²³koga bakasiwane itumbu tjitje. Bashanduka bakatidwa bakati babona mbono ye batumwa be kudzimu beti, unotjila.

²⁴Bamwe be bakabe banaswi bakayenda ku ikumbu, bakawana kuli se kwaleba bakadzi ibabo, koga iye bakasimbone.”

²⁵Kati ku bali, “zwilengwe ndimwi, mononoka seni kugalamoyo tjakalebgwa nge balebesambeli!

²⁶Apa kwakabe kusakafanila kuti Mesiya adziyidzike nge zwithu izwezwi, kuti ekongina mu gudzo lile kene?”

²⁷Kakale katangisa kubatjenesela tjakalebgwa nge kukwe mu hwalo dzose dze Ndzimu, kutangisa mu hwalo dza Mushe ne hwalo dzose dze balebesambeli bose.

²⁸Ndizo kukati besedzela ku nzi wabakabe beyenda kuuli Jesu kayedza se unopindila mbeli.

²⁹Koga bakankumbila beti, “Gala naswi, ngobe kwabe madekwana zhuba lamila.” Ndizo kangina kagala nabo.

³⁰Ngono kati eja nabo katola tjiwunga, katjiyengemadza, katjipemula, kabapa itjo.

³¹Ipapo mesho abo kazhuka, ndizo bakanziba, koga kamila mu mesho abo.

³²Bakabhuzwana beti, “Apa mimoyo yedu yabe isingapise mutili elebeleka naswi mu zila etitjenesela hwalo dze Ndzimu kene?”

³³Bakamilika tjinyolotjo bakabgwilila ku Jerusalema. Ikoko bakawana bali gumi lina ng'ompela bakakubungana ne bamwe badiyiwa

³⁴ngono ibabo bakati, “Ku malebeswa! She bamuka, bazwilakidza kuna Simoni.”

³⁵Ipapo balume ibabo babili bakaleba tjashingikala mu zila ne sekwa banziba ndiko epemula tjiwunga.

³⁶Kukati batjalebeleka ngekwa ikoku, Jesu nge kukwe kama pakati kwabo, kati ku bali, “Mbakiso ngaibe namwi.”

³⁷Koga Bakapaluka moyo, kakale bakatja bekumbula kuti banobona ipuku.

³⁸Jesu kati ku bali, “Ini mudziyidzika? Ini muna kududumwa mu mimoyo yenyu kene?

³⁹Bonani maboko angu ne makumbo angu. Ndimi nge kwangu! Mundibhate mubone, ngobe ipuku atjina nyama ne mafupa, sekwa munobona imi ndinazo.”

⁴⁰Kati aleba ikoku kabalakidza maboko awe nenge makumbo awe.

⁴¹Kwakati batjakashatha kukulu bakatjenama, kakale basingadume tjabanobona kababhuzwa kati, “Muna tjinojiwa pano kene?”

⁴²Bakampa thango ye hwobe yakagotjiwa,

⁴³ngono kaitola kaija bakanlinga.

⁴⁴Kati ku bali, “Etji nditjo tjandakamubudza nditji namwi nditi, zwithu zose zwakakwagwa nge kwangu mu nlayo wa Mushe ne mu hwalo dze balebesambeli ne mu lukwalo gwe Njimbo azwizofanila kuwila pasi.”

⁴⁵Ipapo kazhula mimoyo yabo kuti bahwisise hwalo dze Ndzimu.

⁴⁶Kabadwa kati, “Nditjo tjakakwagwa kuyi, Mesiya unowodziyila, kamuka mu bafi nge zhuba le butatu,

⁴⁷nenge kuti kushandukila matjinyo kwe bathu neku bazwiibhatigwa matjinyo, kowosumikigwa nge zina lile ku zwitjaba zose, kutangisa mu Jerusalema.

⁴⁸Imwi mu batendeki be zwithu izwezwi.

⁴⁹Ndowomuzhisila tjamakagadziwabgwe ndi Tate bangu, koga galani mu nzi nkulu kudzina mupiwa simba linodwa pezhugwi.”

⁵⁰Ipapo kabatungamila kanoti ku Bhetani, kamilidza maboko kabakombolela.

⁵¹Kukati atjabakombolela, kabasiya ngono katolegwa kudzimu.[15]

⁵²Ipapo bakan'namata ngono bakabgwilila ku Jerusalema bakashatha kwazo.

⁵³Ngono bakagala bali mu Ng'umba ye Ndzimu bekudza Ndzimu.