Read Kalanga Luke 3 Bible Online

Luke 3 - Kalanga bible

Luke 3

¹Kwakati mu gole le bugumi lina makole mashanu le bushe gwa Tibheriyasi (Mambo we Roma) misi ya Pontiyo Pilato ali nlauli we Judiya, she Herode wakabe ebusa mu ntuthu we Galili. Nnung'una uwe Filipo, ali she we mituthu ye Itureya ne Tirakonitisi, Lisaniyasi iye ali she we Abhileni,

²mu misi iyeyo ya Anasi na Kaifasi bali Batungamili be bapirisiti, Ndzimu ukalebeleka na Johani nkololo wa Zakhariya mu tjilambanyika.

³Johani kayenda mu ntuthu wose upejo ne Jorodani, esumikila kuti bathu bashandukile matjinyo abo badubikwe ili tjilakidzo tje kuti bazwiibhatigwa zwibi zwabo.

⁴Sekwa kwakakwagwa mu lukwalo gwa Isaya nlebesambeli kuyi, “Hwi le unodanilila mu tjilambanyika eti, ‘Lulwamisani zila ya She, tambunudzani zijana dzidze.

⁵Nkuku mmwe ne mmwe unowovukidziwa, dombo ne duthu limwe ne limwe lowodusiwa. Zila dzakakombama dzowotambunudziwa, zila dzina mabundo ne makorokoro dzowolobegwa

⁶ne bathu bose banowobona jidzo le Ndzimu.’ ”

⁷Johani kadwa mibunga ye bathu bakabe bezha kuwodubikwa ndiye eti, “Bana be nyoka ndimwi! Ndiani wamutjenjedza, kuti mutizhe bushongola gunozha kene?

⁸Shingani mishingo inolakidza kuti makashandukila matjinyo enyu. Ngono musitongo tangisa kuzwidwa muti, ‘Iswi ti bana ba Abhurahama.’ Ndomudwa nditi Ndzimu unotubula kuthamila Abhurahama bana nge mabgwe iyawa.

⁹Nangwenu wali, shathu lakabigwa kale pa midzi ye miti, ndizo nti mmwe ne mmwe usingazwale zwizwalo zwakalulwama, unowotemiwa ukalashigwa mu moto.”

¹⁰Mbunga we bathu ukambhuzwa ukati, “Tishingeni ngono?”

¹¹Johani kashandula eti, “Iye una yempe mbili ngaakobane ne usina ne una zojiwa ngaathame sa ikokobo.”

¹²Bakhethisi na ibobo bakazha kuwodubikiwa. Ngono bakabhuzwa beti, “N'diyi, tishingeni?”

¹³Kabashandula eti, “Musitole lukhetho gunopinda kwamalauligwa.”

¹⁴Ipapo babhayani bakambhuzwa beti, “Ngono iswike, tishingeni?” Kadabila kati, “Mushete wamatolela mari nge kunkombeledza kene ngotjebela, shathilani ndipo yenyu.”

¹⁵Bathu bakabe bakalindila nge kugalabgwe, bezwibhuzwa mu mimoyo yabo kuti kene Johani ungabe ali iye Mesiya.

¹⁶Koga Johani kabadwa bose kati, “Imi ndomudubika nge vula, koga kowozha iye una masimba kundipinda, wandisakalizana kusunungula mitjili ye khwebana dzidze. Iye unowomudubika nge Meya yakayengemala nenge moto.

¹⁷Luselo[3] gugwe gumu luboko gugwe, kuwulusa mathunde awe wose mu lutombo kuabiga mu dula lile, koga unowopisa bunye nge moto usingadzimike.”

¹⁸Ngono Johani kalaya bathu nge zila njinji, esumikila ndebo mbuya ku bali.

¹⁹Koga Johani kati etjemela she Herode ngekwa Herodiyasi nkadzi we nnung'una uwe, mu na zose zwithu zwakabipa zwaakashinga,

²⁰Herode kapapha bubi igogu nge kuzhalilila Johani mu ng'umba ye busungwa.

²¹Kukati bathu bose badubikwa, Jesu kadubikiwabo. Ngono Jesu kati etembezela, kudzimu kukazhuka,

²²Meya yakayengemala ikadelukila pezhugwi kukwe ili mu mbumbiko ye njiba. Ngono hwi likadwa kudzimu liti, “Iwe u Nkololo wangu wandinoda, unondishathisa kwazo.”

²³Kwakati Jesu etangisa nshingo uwe, wakabe ana makole angabe makumi matatu. Kwakabe kuyi nkololo wa Josefa, Josefa ali nkololo wa Heli,

²⁴Heli ali nkololo wa Matati, Matati ali nkololo wa Levi, Levi ali nkololo wa Meliki, Meliki ali nkololo wa Janai, Janai ali nkololo wa Josefa,

²⁵Josefa ali nkololo wa Matatiyasi, Matatiyasi ali nkololo wa Amosi, Amosi ali nkololo wa Nahumi, Nahumi ali nkololo wa Esili, Esili ali nkololo wa Nagai,

²⁶Nagai ali nkololo wa Maati, Maati ali nkololo wa Matatiyasi, Matatiyasi ali nkololo wa Semeini, Semeini ali nkololo wa Joseki, Joseki ali nkololo wa Joda,

²⁷Joda ali nkololo wa Jowanani, Jowanani ali nkololo wa Resa, Resa ali nkololo wa Zerubhabeli, Zerubhabeli ali nkololo wa Sheyalitiyele, Sheyalitiyele ali nkololo wa Neri,

²⁸Neri ali nkololo wa Meliki, Meliki ali nkololo wa Adi, Adi ali nkololo wa Kosamu, Kosamu ali nkololo wa Elimadamu, Elimadamu ali nkololo wa Eri,

²⁹Eri ali nkololo wa Joshuwa, Joshuwa ali nkololo wa Eliyeza, Eliyeza ali nkololo wa Jorimu, Jorimu ali nkololo wa Matati, Matati ali nkololo wa Levi,

³⁰Levi ali nkololo wa Simiyoni, Simiyoni ali nkololo wa Juda, Juda ali nkololo wa Josefa, Josefa ali nkololo wa Jonamu, Jonamu ali nkololo wa Eliyakimu,

³¹Eliyakimu ali nkololo wa Meleya, Meleya ali nkololo wa Mena, Mena ali nkololo wa Matata, Matata ali nkololo wa Nathani, Nathani ali nkololo wa Dafite,

³²Dafite ali nkololo wa Jesi, Jesi ali nkololo wa Obhedi, Obhedi ali nkololo wa Bhoazi, Bhoazi ali nkololo wa Salimoni, Salimoni ali nkololo wa Nashoni,

³³Nashoni ali nkololo wa Aminadabhu, Aminadabhu ali nkololo wa Adimini, Adimini ali nkololo wa Arini, Arini ali nkololo wa Hezironi, Hezironi ali nkololo wa Perezi, Perezi ali nkololo wa Juda,

³⁴Juda ali nkololo wa Jakubo, Jakubo ali nkololo wa Isaki, Isaki ali nkololo wa Abhurahama, Abhurahama ali nkololo wa Tera, Tera ali nkololo wa Nahori,

³⁵Nahori ali nkololo wa Serugu, Serugu ali nkololo wa Reu, Reu ali nkololo wa Pelegi, Pelegi ali nkololo wa Ebheri, Ebheri ali nkololo wa Shela,

³⁶Shela ali nkololo wa Kainani, Kainani ali nkololo wa Afakisadi, Afakisadi ali nkololo wa Shemu, Shemu ali nkololo wa Nuwa, Nuwa ali nkololo wa Lameki,

³⁷Lameki ali nkololo wa Metusela, Metusela ali nkololo wa Enoki, Enoki ali nkololo wa Jaredi, Jaredi ali nkololo wa Mahalaleli, Mahalaleli ali nkololo wa Kainani,

³⁸Kainani ali nkololo wa Enoshi, Enoshi ali nkololo wa Seti, Seti ali nkololo wa Adamu, Adamu ali nkololo we Ndzimu.