Read Kalanga Luke 4 Bible Online

Luke 4 - Kalanga bible

Luke 4

¹Jesu kati ali zhele Meya yakayengemala, kashanduka edwa ku Jorodani Meya ikantungamilila ku tjilambanyika,

²kwaakalikwa ndi Satani mazhuba ali makumi manna. Aazotongoja tjimwe mu mazhuba iyawo, ndizo kubupelo gwawo wakabe ne zhala kwazo.

³Satani kati kunli, “Ha uli Nkololo we Ndzimu, idwa bgwe ileli libe tjiwunga!”

⁴Jesu kashandula kati, “Kwakakwagwa kuyi, ‘Nthu aatotjila nge tjiwunga tjoga.’ ”

⁵Satani katatha naye pakatathila, tjinyolotjo kanlakidza mituthu yose shango.

⁶Ngono Satani kati kunli “Ndowokupa fumwa yayo ne simba eleli lose, ngobe zwakapiwa imi, ngono ndopa wandada.

⁷Ndizo ha undinamata kose ikoku kowobe kuko.”

⁸Jesu kashandula kati, “Kwakakwagwa kuyi, ‘Namata She Ndzimu uwo, ushingile iwo woga.’ ”

⁹Satani kan'yisa ku Jerusalema, kaswika kammisa pa tjilungwane tje Ng'umba ye Ndzimu. Ngono kati, “Ha uli Nkololo we Ndzimu, uzwiposele pasi;

¹⁰ngobe kwakakwagwa kuyi, ‘Unowodwa batumwa bawo be kudzimu nge kuko, kuti bakulise nge njele.’

¹¹Kakale kukayi, ‘Banowokugama nge maboko abo, kuti usilobe gumbo lilo mu bgwe.’ ”

¹²Jesu kanshandula kati, “Kwakakwagwa kuyi, ‘Usilike She Ndzimu uwo.’ ”

¹³Kukati Satani apedza kunlika, kansiya kwe tjibaka.

¹⁴Jesu kabgwilila ku Galili ali mu simba le Meya, ngono tjilumbi nge kukwe tjikaandama mu shango iyeyo yose.

¹⁵Kadiya mu ng'umba dzabo dze mitembezelo, ndizo bose bakankudza.

¹⁶Ngono Jesu kayenda ku Nazareta, iko kwaakalegwako, kukati nge zhuba le Ndzimu lekunyaluluka le Sabata kayenda ku ng'umba ye mitembezelo se wolobela kukwe. Kamilika kubala.

¹⁷Wakapiwa lukwalo gwe nlebesambeli Isaya. Kati eguzhula kawana pakakwagwa kuyi,

¹⁸“Meya ya She imundili, ngobe iye wakandishalula kuti ndisumikile ndebo mbuya ku bashayi. Wandituma kuleba sununguko ku basungwa, nenge kuti mapofu apofunuke, nenge kusunungula bakatshambilidziwa

¹⁹kubika gole She labanowolakidza ndulamo yabo mu bathu.”

²⁰Ipapo kazhalila lukwalo kagubgwiliza ku nshingi, kagala pasi. Ngono mesho wose mu ng'umba ye mitembezelo akabe akalinga kunli,

²¹ngono katangisa kubadwa eti, “Nasi matama e lukwalo igogu amahwa ashingikala.”

²²Bose bakaleba zwakanaka nge kukwe, bakatjenamila matama e ngoni aakaleba. Bakabhuzwana beti, “Apa ate nkololo wa Josefa iwoyu kene?”

²³Jesu kati ku bali, “Malebeswa mowondidwa gungulupeswa linoti, ‘Ng'anga, uzwilape.’ Thama mu nzi wa kanyi kwenyu, tjatakahwa kuyi watjithama mu Kapenaume.”

²⁴Kadwilila eti, “Ndolebesa tjose ndoti, akuna nlebesambeli unoamutjigwa mu nzi wa kanyi kwabo.

²⁵“Ndolebesa ndoti, kwakabe kuna tjilikadzi njinji mu Iziraela mu misi ya Elija, vula paisakana makole matatu ana mimwedzi ili mitathatu, kukabe bhamba gulu mu shango yose.

²⁶Koga Elija aazotumigwa ku tjilikadzi njinji idzedzo, wakatumigwa ku Zarefati mu shango ye Sidoni, ku imwe tjilikadzi.

²⁷Kwakabe kuna banji mu Iziraela banogwala mapele akabipa mu misi ya Elisha nlebesambeli, koga akuna ne nng'ompela wakapodziwa, kuzhe kwa Naamani we Siriya.”

²⁸Bathu bose bakabe bali mu ng'umba ye mitembezelo bakati behwa ikoku bakazhala bushongola.

²⁹Bakamilika bakan'dusila kuzhe kwe nzi, bakankwebela kuliteyanjelele gwe dombo, lakabe nzi iwoyo wakabakwa pezhugwi kwalo, kuti bamposele pasi.

³⁰Koga iye wakapalama pakati kwabo kayenda.

³¹Ipapo kayenda ku Kapenaume, nzi umu Galili. Mu zhuba le Sabata, kadiya bathu.

³²Bakakaabadziwa nge kudiya kukwe, ngobe dama lile lakabe lina simba.

³³Mu ng'umba ye mitembezelo kwakabe kuna mmwe nlume akasungwa nge meya mbi. Wakamimilila pezhugwi eti,

³⁴“Apa unoshaka kuti titini kene, Jesu we Nazareta? Wazha kuwotilobesa kene? Ndoziba kuti uani. U iye N'yengemali we Ndzimu.”

³⁵Jesu kantjemela eti, “Nyalala ubhude munli!” Ipapo meya mbi ukalashila nlume iwoyo pasi mbeli kwabo bose, ukabhuda munli usanhwisa zogwadza.

³⁶Bathu bose ibabo bakakaabala bakabhuzwana beti, “Hwudiya kupi ikoku! Nge ndaulo nenge simba unotjemela meya mibi ngono ikabhuda!”

³⁷Ndizo bathu bakaleba nge kukwe kukaandama mu ntuthu wose.

³⁸Jesu kabhuda mu ng'umba ye mitembezelo kayenda ku nzi wa Simoni. Mmezwale ba Simoni bakabe begwala bana luzhazhamo, ndizo Simoni ne bathu baipapo bakakumbila Jesu kuti abhatshe.

³⁹Ndizo kama pa n'gwele katjemela luzhazhamo, ngono gukabhuda mubali. N'gwele kapola, kamilika tjinyolotjo katangisa kupa bathu zojiwa.

⁴⁰Kukati zhuba lingina, bathu bakabe bana bagwele banogwala njigwele dzakasiyana siyana, bakabazhisa kunli, ndizo kababiga maboko bose, kabapodza.

⁴¹Ne meya mibi ikabhuda imimila iti, “Iwe u Nkololo we Ndzimu!” Koga kaitjemela asingaidumile kulebeleka, ngobe yakabe iziba kuti ndiye Mesiya.

⁴²Kukati zhuba liyedza, Jesu kabhudila ku nyelele kusina bathu. Bathu bakabe benshaka, ndizo bakati beswika paayapo bakagwisa kun'dzibila kuti asiyende ebasiya.

⁴³Koga kabadwa kati, “Ndakafanila kuti ndisumikile ndebo mbuya ye bushe gwe Ndzimu ku mimwe mizibo, ngobe nditjo tjandakatumigwa.”

⁴⁴Ngono kadwilila esumikila mu ng'umba dze mitembezelo dze Judiya.[4]