Read Kalanga Luke 5 Bible Online

Luke 5 - Kalanga bible

Luke 5

¹Limwe zhuba kukati Jesu ali mile pa gungwa gwe Genezareta, mbunga we bathu ukankubunganila kuhwilila dama le Ndzimu.

²Jesu kabona migoro mibili ili pa gungwa, ngono babhati be hwobe bakabe babhuda muili besuka njanga dzabo.

³Kangina mu mmwe we migoro iyeyo wakabe uli wa Simoni, ngono kankumbila kuti ausedzedze mu vula kudwa mu phili. Ipapo kagala pasi kadiya mbunga we bathu ali mu n'goro iwoyo.

⁴Kati apedza kulebeleka, kadwa Simoni kati, “Sedzelani tjapakati kwe vula pakangina, ngono mulonge njanga dzenyu mu vula mubhate hwobe.”

⁵Simoni kadabila eti, “She, talalila shinga kwazo busiku gose, koga akuna tjatakabhata. Koga se muijalo, ndowolonga njanga mu vula.”

⁶Bakati bayita sa ikoko bakabhata hwobe njinji, njanga dzikatangisa kupaluka.

⁷Ndizo bakadana bakwinya babo bamu n'goro mmwe, kuti bazhe bababhatshe. Bakazha, ngono bakazhadza migoro yose, migoro ikatangisa kunyungila.

⁸Kukati Simoni Pita ebona ikoku, kawila pasi pa zwidwi zwa Jesu, kati, “She milikani pandili, ngobe imi ndi ntjinyi!”

⁹Iye ne baakabe anabo, bakatjenamila bunji gwe hwobe dzabakabhata,

¹⁰kose na Jakubo na Johani bakololo ba Zebhedi, bakwinya ba Simoni. Ipapo Jesu kati kuna Simoni, “Usitje. Kudwa ngwenu kuyenda mbeli, unowobhata bathu.”

¹¹Ndiko bakakwebela migoro yabo mu phili, bakasiya kose, bakantobela.

¹²Kukati Jesu atji mu mmwe we mizi mikulu, kukazha mmwe nlume wakabe egwala mapele. Kati ebona Jesu kawa pasi nge buso gugwe kankumbila, kati, “She, ha muda, munganditjenapadza.”

¹³Jesu katambunudza luboko gugwe, kambhata, kati “Ndoda. Tjenapala!” Tjinyolotjo mapele kabhuda munli.

¹⁴Jesu kan'dwa kati, “Kushete waunobudza. Koga yenda unozwilakidza ku mpirisiti ngono uduse tjibhayilo tjakalebgwa ndi Mushe tjeku tjenapala tjili tjilakidzo ku bathu kuti wapodziwa.”

¹⁵Thawu ngekwa Jesu dzikaandamila mbeli, ndizo mibunga mikulu ye bathu ikakubungana kuwonteedza ne kupodziwa njigwele dzabo.

¹⁶Koga Jesu kayenda ku shango kusina bathu kanotembezela.

¹⁷Zhuba limwe mu mazhuba iyawo Jesu kati atjadiya, Bafarasi ne badiyi be nlayo bakabe bazha bedwa mu mizi yose ye Galili ne ye Judiya ne ku Jerusalema, bakabe bali gele ipapo. Simba la She lakabe linaye kupodza bagwele.

¹⁸Bamwe balume bakazha bakasenga nlume nge thobo wakalobgwa nge gulukadzi, bakagwisa kunlonga mu ng'umba, kumbiga mbeli kwa Jesu.

¹⁹Bakati bashaya zila ye kuyita ikoku ngekwe mbunga we bathu, bakatatha pezhugwi kwe denga, ngono bakazhula denga bakan'delusila pasi pakati kwe mbunga, mbeli kwa Jesu ali mu thobo iye.

²⁰Jesu kati ebona kugalamoyo kwabo kati, “Lumewe, zwibi zwizo zwazwiibhatigwa.”

²¹Bafarasi ne badiyi be nlayo bakatangisa kukumbula tjekwabo, bezwibhuzwa beti, “Ndiani iwoyu unotuka Ndzimu? Ndiani ungazwiibhatigwa zwibi ha usi Ndzimu woga kene?”

²²Jesu kaziba tjabakabe bekumbula, ngono kabhuzwa eti, “Ini mukumbula zwithu izwezwi mu mimoyo yenyu kene?

²³Ndikupi kulelu, kuti, ‘Zwibi zwizo zwazwiibhatigwa,’ kene kuti, ‘Milika uyende?’

²⁴Koga, kuti ndizo muzibe kuti Nkololo we Nthu una simba mu shango le kuzwiibhatigwa zwibi, kati ku nlume wakalobgwa nge gulukadzi, ‘Ndokudwa nditi, milika, tola thobo iyo uyende kanyi.’ ”

²⁵Tjinyolotjo kamilika mbeli kwabo, katola tjaabe ali lele mutjili kayenda kanyi, ekudza Ndzimu.

²⁶Bose bakakaabala, ngono bakakudza Ndzimu. Bakazhala kutja, beti, “Nasi tabona zwinotjenamisa.”

²⁷Shule kwa ikoku Jesu kayenda, ngono kabona nkhethisi unodang'wa Levi ali gele pa bugalo gugwe gwe nkhethisi. Jesu kati kunli “Unditobele.”

²⁸Levi kamilika, kasiya tjimwe ne tjimwe ngono kantobela.

²⁹Ipapo Levi kathamila Jesu nzano nkulu we zojiwa ku ng'umba iye ne mbunga nkulu we bakhethisi ne bamwe bathu kaja naye.

³⁰Koga Bafarasi ne badiyi babo be nlayo bakang'ong'ola ku badiyiwa babe bebhuzwa beti, “Ini muja mung'wa ne bakhethisi ne batjinyi*!”

³¹Jesu kabadabila, kati, “Ate banomuka zubuyanana banoshaka ng'anga, koga bagwele ndibo banoshaka ng'anga.

³²Andizozha kuwodana balulwami, koga ndakawodana batjinyi, kushandukila matjinyo abo.”

³³Bakati kunli, “Badiyiwa ba Johani banozwinyima zojiwa betembezela, kose ne badiyiwa be Bafarasi, koga babo banoja beng'wa.”

³⁴Jesu kashandula kati, “Apa mungayita kuti bakokiwa be nkwasha bazwinyime zojiwa atji nabo kene?

³⁵Koga misi inowozha nkwasha kwaanowodusiwa mubali. Mu misi iyeyo banowozwinyima zojiwa.”

³⁶Kababudza tjifaniso etji, “Akuna ungatjeka tjibata tjitshwa mujila dzwa ekotjithumila mu tjiambalo tjikulukugwi. Ha ethama eijalo, unowobe apalula jila dzwa, ngono tjibata tje jila dzwa ha tjitowodumana ne jila gulukugwi.

³⁷Na iko akuna unodila nkumbi ntshwa mu makukhwa makulukugwi. Ha ethama eijalo, nkumbi ntshwa unowobila ukaphutula makukhwa, ngono nkumbi ukatebuka ne makukhwa kabe atjinyika.

³⁸Nkumbi ntshwa wakafanilo digwa mu makukhwa matshwa.

³⁹Kakale akuna ungati shule kwe kung'wa nkumbi nkulukugwi kashaka ntshwa, ngobe unowoti, ‘Nkulukugwi unozipa.’ ”