Read Kalanga Luke 7 Bible Online

Luke 7 - Kalanga bible

Luke 7

¹Jesu kati apedza kuleba ikoku kose mu zebe dze bathu, kangina mu nzi we Kapenaume.

²Ikoko kwakabe kuna nlanda we nlauli we babhayani be Baroma wakabe ediwa kwazo ndi tetshi uwe, egwala ali pejo ngofa.

³Nlauli we babhayani kahwa ngekwa Jesu, ndizo katuma bakulu be Bajuta kunli, enkumbila kuti azhe awopodza nlanda uwe.

⁴Bakati bezha kuna Jesu, bakankumbila kwazo kuti abhatshe nlume iwoyo beti, “Kofanila kuti uthamile iwoyu nlume sa ikoku,

⁵ngobe unoda itjaba tjedu, kakale wakati bakila ng'umba ye mitembezelo.”

⁶Ndizo Jesu kayenda nabo. Wakati abe pejo ne ng'umba ye nlauli we babhayani nlauli katuma bazwalani babe kunli eti, “She, musizwidziyidze, ngobe andizolizanila kuti mungangina mu ng'umba yangu.

⁷Ndizo, ndagala ndazwibona kuti andizolizana kuzha kumuli. Koga lebani dama, ngono nlanda wangu unowopola.

⁸Ngobe namibo ndi nthu upasi kwe nlayo, ndina babhayani pasi kwangu. Ndoti kuna iwoyu, ‘Yenda,’ kayenda, ati kuna hwouje, ‘Izha,’ kazha. Ndoti ku nlanda wangu, ‘Shinga etji,’ katjishinga.”

⁹Kukati Jesu ehwa ikoku, kantjenamila, katendebuka kalinga mbunga we bathu bakabe bakantobela, kati ku bali, “Ndolebesa ndoti, andithu atongo bona kugalamoyo kukulu kungapa ne mu Iziraela dumbu.”

¹⁰Ipapo bathu bakabe batumwa bakabgwilila ku ng'umba, ngono bakawana nlanda apola.

¹¹Tjinyolotjo kudwa ipapo, Jesu kayenda ku nzi unoyi Naini, badiyiwa babe ne mbunga nkulu we bathu bakayenda naye.

¹²Wa kati esedzelela nkoba we nzi iwoyo, kukabe kwakasengegwa kuzhe nthu wakafa wakabe ali iye ega mwana pana mmeyabe, ngono ibo bali tjilikadzi. Mbunga nkulu we bathu unodwa mu nzi iwoyo, wakabe una tjilikadzi iyeyo.

¹³She kati embona kanhwila zogwadza kati, “Usilile.”

¹⁴Ipapo kasedzela kabhata ntengate, ngono ibabo bakabe bakasenga bakama. Iye kati, “Nzhuzha, ndoti ku kuli, muka!”

¹⁵Nfi kamuka, katangisa kulebeleka, ngono Jesu kambgwiliza kuna mmeyabe.

¹⁶Bose bakatjenama kukulu kwazo, bakakudza Ndzimu beti, “Nlebesambeli nkulu wazha pakati kwedu! Ndzimu wazha kubhatsha bathu bawo.”

¹⁷Thawu idzedzi ngekwa Jesu dzikaandama mu ntuthu we Judiya wose ne mituthu ipejo.

¹⁸Badiyiwa ba Johani bakabudza Johani ngekwe zwithu zose zwakabe zwiyitiwa ndi Jesu.

¹⁹Kadana babili babo, kabatuma kuna She kumbhuzwa woku, “Ndimwi mabe makalindigwa kuzha, kene tilindile mmwe?”

²⁰Kukati balume ibabo bezha kuna Jesu bakati, “Johani we N'dubiki watituma kumuli kumubhuzwa kuti ‘Apa ndimwi mabe makalingiligwa, kene tilingilile mmwe?’ ”

²¹Nge tjibaka itjetjo Jesu kapodza banji bakabe begwala ne bakabe bakasungwa nge meya mibi, kakale kapofunula banjinji bakabe bali mapofu.

²²Ndizo kashandula batumwa kati, “Bgwililani, mubudze Johani tjamabona ne tjamahwa. Mapofu anopofunugwa, zwilema zoyenda, bathu banogwala mapele banopodziwa ne mabhubuzebe anohwa ne bafi banomusiwa ne ndebo mbuya inosumikigwa ku bashayi.

²³Wakakombolegwa usingakuthike nge kwangu.”

²⁴Batumwa ba Johani bakati bayenda, Jesu katangisa kulebeleka ne mbunga we bathu ngekwa Johani, ebhuzwa eti, “Ini tjamakayendila kunobona ku tjilambanyika? Apa makabe manobona lushanga gunozunguziwa nge phepo kene?

²⁵Akusakajalo, ini tjamakabe munobona ngono? Makabe manobona nthu wakaambala zwiambalo zwakanaka kene? Bonani, ibabo banoambala zwiambalo zwe ntengo upezhugwi betjila butjilo gwe ipepkhwe ba mu ng'umba dza boshe.

²⁶Ngono ini tjamakayendila kunobona? Makayendila kunobona nlebesambeli kene? Ee, ndomubudza kakale nditi, makabona nkulu pa nlebesambeli.

²⁷Oyu ndiye wakakwagwa nge kukwe kuyi, “ ‘Ndowotuma ntumwa wangu mbeli kuko, iye unowolulwamisa zila iyo mbeli kuko.’

²⁸“Ndomudwa nditi, muna ibabo bakazwagwa nge nkadzi, akuna iye nkulu pana Johani; koga iye ntukunu tjose mu bushe gwe Ndzimu nkulu panli.”

²⁹Bathu bose ne bakhethisi dumbu, bakati behwa matama a Jesu bakaduma kuti zila ye Ndzimu yakalulwama, ngobe bakabe badubikiwa nge dubiko ya Johani.

³⁰Koga Bafarasi ne badiyi be nlayo bakazwilambigwa ndongoloso ye Ndzimu, se bakabe balamba kudubikwa ndiye.

³¹Jesu kadwilila elebeleka eti, “Ini ngono tjandingafanidzanya bathu ibaba bangwenu? Banongani wali?

³²Banonga bana bali gele mu thanga, bedanana, belebesana, beti, ‘Tamulidzila nyele, koga mukasizane, tikamumbila lumbo gwe tjililo koga mukasilile.’

³³Ngobe Johani we N'dubiki wakazha asingaje tjiwunga kene kuli kung'wa nkumbi we zhambi, ngono imwi mukati, ‘Una meya mbi.’

³⁴Nkololo we Nthu kazha eja kakale eng'wa, ngono moti, ‘Yeli govu ne tjidakwa, nzwalani we bakhethisi ne batjinyi.’

³⁵Koga butjenjedu golakidzika kuti gwakalulwama nge bana bago.”

³⁶Mmwe we Bafarasi kadanila Jesu zojiwa, ndizo kayenda ku ng'umba ye Nfarasi iwoyo kagala pasi kaja.

³⁷Nkadzi wakabe ali ntjinyi mu nzi iwoyo kati ehwa kuyi Jesu unoja mu ng'umba ye Nfarasi, kazhisa tjilongo tjakathamiwa nge bgwe linoyi alabhasita, tjina mafuta anonuhwa zwinozipa.

³⁸Ngono kati ali mile shule kukwe pa makumbo awe elila, katangisa kunyolodza makumbo a Jesu nge mishodzi iye. Ipapo kaabukusha nge mavudzi awe kaaputa kadila mafuta iyawo.

³⁹Nfarasi wakadanila Jesu zojiwa wakati ebona ikoku kati tje mu moyo, “Ha nlume iwoyu abe ali nlebesambeli, unobe eziba kuti ndiani iwoyu unombhata kakale kuti nkadzi iwoyu umbimbi.”

⁴⁰Jesu kan'dwa kati, “Simoni, kuna tjandoshaka kukubudza.” Simoni kadabila kati, “Ini n'diyi.”

⁴¹Jesu kati, “Mmwe nkolotisi we mari wakabe ekolotiwa nge balume babili. Mmwe wabo ana nlandu naye we madinari e mazana mashanu (500) mmwe ana nlandu naye we madinari e makumi mashanu (50).

⁴²Kwakabe kusina wabo una mari kunlipa, ndizo kabukusha milandu yabo. Ngwenu, ndiupi wabo unowon'da kwazo?”

⁴³Simoni kashandula eti, “Ndobona kuti unowodiwa kwazo nge wakabukushigwa nlandu nkulu.” Jesu kati, “Wabona zubuyanana.”

⁴⁴Ipapo kashanduka kalingisana na iwoyo nkadzi, ngono kati kuna Simoni, “Apa unobona nkandzi iwoyu, kene? Ndazha mu ng'umba iyo, auzondipa vula kuti ndingule makumbo, koga iye wangudza makumbo angu nge mishodzi iye, kaabukusha nge mavudzi awe.

⁴⁵Auzotongoti undidumilisa ukandiputa koga iwoyu nkadzi, kudwa mu tjibaka tjandangina, aazotongo letja kuputa makumbo angu.

⁴⁶Auzodila nsholo wangu mafuta, koga iye wadila mafuta anonuhwa zwinozipa mu makumbo angu.

⁴⁷Ndizo, ndokubudza nditi, zwibi zwizwe zose zwazwiibhatigwa, ndizo walakidza ludo bukulu. Koga iye wazwiibhatigwa kutukununu, una ludo butukununu.”

⁴⁸Ipapo Jesu kati ku nkadzi iwoyo “Zwibi zwizo zwazwiibhatigwa.”

⁴⁹Ndizo bamwe bakabe beja naye bakatangisa kulebeleka tjekwabo beti, “Ndiani iwoyu unozwiibhatigwa zwibi?”

⁵⁰Jesu kati ku nkadzi iwoyo, “Kugalamoyo kuko kwakutjidza, yenda nge kunyalala!”