Read Kalanga Luke 9 Bible Online

Luke 9 - Kalanga bible

Luke 9

¹Jesu kati akubunganya batumwa bali gumi lina babili, kabapa masimba e kudusa meya mibi ne kupodza njigwele,

²ngono kabatuma kunosumikila bushe gwe Ndzimu ne kupodza banogwala.

³Kabadwa kati, “Musisenge tjimwe mu gwendo gwenyu, musisenge ludozo kene gobhodo kene tjiwunga kene mari kene zwiambalo.

⁴Nzi wamaswikila muuli galani muuli kudzina mubhuda mu nzi iwoyo.

⁵Ha bathu basingamuamutjile, ha mubhuda mu nzi iwoyo mushashamule hwuluba mu makumbo enyu, kube butendeki nge kwabo kuti bathama kusakalulwama.”

⁶Ndizo bakamilika, bakayenda nzi ne nzana besumikila ndebo mbuya kakale bepodza bathu pamwe ne pamwe.

⁷She Herode kahwa ngekwe tjakabe tjishingikala. Ngono kadziyidzika mu meya, ngobe bamwe bakabe beti Johani wakamusiwa mu bafi,

⁸bamwe beti Elija waboneka, bamwe beti mmwe we balebesambeli ba ntolo wamuka.

⁹Koga Herode kati, “Johani ndakathubula nsholo. Ndiani ngono iwoyu wandinohwa zwithu zwakajali nge kukwe?” Ngono kagwisa kubona Jesu.

¹⁰Kukati batumwa bebuya, bakabika kuna Jesu tjabakathama. Kudwapo kabatola, kayenda nabo bali boga mu nzi unoyi Bhetisaida,

¹¹koga mibunga ye bathu ikaziba nge kwako, ngono bakantobela. Kabaamutjila, kalebeleka nabo ngekwe bushe gwe Ndzimu, kakale kapodza ibabo bakabe begwala.

¹²Kukati zhuba limila, batumwa bali gumi lina babili bakazha kunli bakati, “Paladza mbunga iwoyu, kuti ndizo bayende ku mizi ipejo ne mu mizana, bawane zojiwa ne mayizelo, ngobe pano timu shango koga.”

¹³Kadabila eti, “Mubape tjabangaja.” Bakadabila beti, “Tina zwiwunga zwili zwishanu ne hwobe mbili koga. Ha kuli kuti tojisa bathu ibaba takafanila kunotenga zojiwa.”

¹⁴Balume bakabe bangabe zwiwulu zwishanu bakabe bali ipapo. Koga kati ku badiyiwa babe, “Mubagadze pasi nge makupo angabe makumi mashanu.”

¹⁵Bakathama sekwa badwiwa, bakagadza bathu bose pasi.

¹⁶Katola zwiwunga izwezo zwishanu ne hwobe mbili, kalinga kudzimu, katembezela ngono kazwipemula, kazwipa badiyiwa kuti bazwipe bathu.

¹⁷Bose bakaja bakaguta, badiyiwa bakanunga mamburumburu bakazhadza seme dzili gumi lina mbili.

¹⁸Limwe zhuba kukati Jesu etembezela ali ega ne badiyiwa babe, kababhuzwa kati, “Bathu banoti ndimi ani?”

¹⁹Bakashandula beti, “Bamwe banoti, u Johani we N'dubiki, bamwe bakati, u Elija, koga bamwe banoti, mmwe we balebesambeli ba ntolo wakamuka.”

²⁰Kababhuzwa eti, “Koga imwi moti ndimi ani?” Pita kashandula kati, “Mesiya we Ndzimu.”

²¹Jesu kabadwa akasimisa kuti kushete wababudza ikoku.

²²Ngono kati, “Nkololo we Nthu wakafanila kudziyidziwa nge zwinjinji ne kusaamutjigwa nge bakulu* be Bajuta ne bapirisiti bakulu ne badiyi be nlayo, wakafanila kunobulawa, koga mu zhuba le butatu, kamusiwa.”

²³Kabadwa bose kati, “Ha mmwe endisala shule, asithame kuda kukwe, ngaatole tjileyanyo tjitje zhuba limwe ne limwe, andi tobele.

²⁴Ngobe iye unoshaka kutjengeta butjilo gugwe, gowonlashikila, koga iye unolasha butjilo gugwe nge kwangu, gowombuyila.

²⁵Kobuzilani kene, kuti nthu athuwe shango yose, koga alashikigwe kene atjinyikigwe nge tjaali itjo?

²⁶Iye unobhakhwa nge shoni nge kwangu nenge matama angu, Nkololo we Nthu unowombhatigwabo nge shoni ha ezha nge gudzo lile ne la Tate babe ne le batumwa be kudzimu bakayengemala.

²⁷Ndolebesa nditi, kuna bamwe bamile ipapa banowobona bushe gwe Ndzimu basathu bakafa.”

²⁸Kukati Shule kwe mazhuba angabe zhanakadzi Jesu aleba ikoku, katola Pita na Johani na Jakubo katatha dombo kunotembezela.

²⁹Kati etembezela, mbumbiko ye buso gugwe ikashanduka ne zwiambalo zwikabe butjena zwingadzima.

³⁰Bonani Balume babili, Mushe na Elija,

³¹bakaboneka mu tjedza tjikulu, belebeleka na Jesu. Bakalebeleka ngekwe kufa kukwe kunowoshingikala mu Jerusalema.

³²Pita ne baakabe anabo bakabe betshung'ayila kwazo, ngono bakati belinga bakabona tjedza tjitje ne balume ibabo babili bali mile naye.

³³Kukati balume ibabo boyenda, Pita kati kuna Jesu, “N'diyi, kwakalulwama kuti tibe pano. Imani tibake mishasha mitatu, mmwe uli wenyu, mmwe uli wa Mushe, mmwe uli wa Elija.” Wakabe asingazibe tjaanoleba.

³⁴Kukati atjalebeleka, gole likaboneka likabafukidza, ngono badiyiwa bakapalukamoyo, bezwibona bengina mu gole ilelo.

³⁵Hwi likadwa mu gole ilelo liti, “Oyu Nkololo wangu, wandakashalula, munhwilile.”

³⁶Kukati hwi lalebeleka bakawana Jesu abe ega. Badiyiwa bakasumbika ikoku, bakashaya wababudza mu mazhuba iyawo tjabakabona.

³⁷Bakati tjimuka, badeluka dombo, mbunga we bathu ukanshangamidza.

³⁸Mmwe nlume pakati kwe mbunga iwoyo kamilidza hwi kati, “N'diyi, ndomukumbila kuti mulinge nkololo wangu, ngobe ndiye mwanangu ega.

³⁹Meya inonsunga ngono tjinyolotjo kamimila, inontetemesa kadzina kasiza mafulo. Inonnetesa kakale aitotongo nsiya tjinyolotjo.

⁴⁰Ndakumbila badiyiwa babo kuti baiduse ngono bakong'wa.”

⁴¹Jesu kadabila eti, “Bathu basingagalemoyo kakale bakapambuka ndimwi! Ndowogala namwi abe ne moyonlefu mu muli tjibaka tjingapani kene? Zhisa nkololo uwo ngeno.”

⁴²Kukati mbisana atjazha kunli, meya mbi ikanligila pasi ikanlabhulanya intetemesa. Koga Jesu katjemela meya mbi, kapodza mbisana ngono kampa tate babe.

⁴³Ndizo bakakaabadziwa nge bukulu gwe Ndzimu. Kukati mmwe ne mmwe akakaabalila tjashingwa, Jesu kati ku badiyiwa babe,

⁴⁴“Tjandinowoleba, ngatjingine mu zebe dzenyu. Ngoti Nkololo we Nthu unowobhakhwa kalongwa mu maboko e bathu.”

⁴⁵Koga bakasihwisise ndebeleko iyeyi. Kwakabe kwakasumbikala ku bali, ndizo bakasipedzisise, ngono bakatja kumbhuzwa nge kwako.

⁴⁶Nyanyayidzana kukatangisa pakati kwe badiyiwa, kuti ndiani wabo unowobe nkulu mu bamwe.

⁴⁷Jesu kaziba njalakang'wa dzabo, ndizo katola mwana ntukununu kammisa pahwunde naye.

⁴⁸Ipapo kati ku bali, “Iye unoamutjila mwana iwoyu nge zina langu unoamutjila imi, na iye unoamutjila imi unoamutjila wakandituma, ngobe iye ntukunu tjose pakati kwenyu, ndiye nkulu tjose.”

⁴⁹Johani kati, “Tetshi, tabona mmwe nlume edusa meya mibi nge zina lenyu, ngono tikagwisa kun'dziba, ngobe asi mmwe wedu.”

⁵⁰Koga Jesu kati, “Musin'dzibe, ngobe iye usinganyanyayidzane nawe, umile nawe.”

⁵¹Kukati tjibaka tjasedzela tjekuti atolegwe pezhugwi, kudzimu, Jesu kazwimisila kuyenda ku Jerusalema,

⁵²ngono katumila batumwa mbeli. Ngono bakangina mu nzi we Basamariya kunlulwamisila.

⁵³Koga bathu ba ikoko bakasiamutjile Jesu, ngobe wakabe akazwimisila kuyenda ku Jerusalema.

⁵⁴Kukati badiyiwa babe, Jakubo na Johani bebona ikoku, bakan'dwa bakati, She, moshaka kuti tidane moto kudzimu kubalobesa kene?

⁵⁵Koga Jesu kabatjebuka, kabatjemela.

⁵⁶Bakayenda naye ku mmwe nzi upoga.

⁵⁷Kukati bali mu zila batja yenda, mmwe nlume kadwa Jesu kati, “Ndowokutobela kumwe ne kumwe kwaunoyenda.”

⁵⁸Jesu kan'dabila kati, “Phungubgwe dzina madzete ne nyuni dzina mashaka, koga Nkololo we Nthu aana paangalonga nsholo.”

⁵⁹Kati ku mmwe nlume, “Unditobele.” Koga nlume iwoyo kadabila eti, “She, imani ndinobiganya tate bangu kutanga.”

⁶⁰Koga Jesu kati kunli, “Letja bafi babiganye bafi babo, koga iwe yenda unosumikila ngekwe bushe gwe Ndzimu.”

⁶¹Mmwebo kabe eti, “Ndowomutobela She, koga kutanga, imani ndibgwilile ndinowoneka be nsha wangu.”

⁶²Jesu kadabila eti, “Akuna iye unoti akabhata bhadza kulimwa katjebuka shule wakalizana kungina mu bushe gwe Ndzimu.”