Read Kalanga Matama 1 Bible Online

Matama 1 - Kalanga bible

Matama 1

¹Awa matama akalebgwa ndi Mushe ku Baiziraela bose ku bhezhuba kwe Jorodani mu tjilambanyika, mu Arabha kulingisana ne Sufu pakati kwe Parani ne Tofeli ne Labani ne Hazeroti ne Dizahabhu.

²Kotola gwendo gwe mazhuba ali gumi lina zhuba ling'ompela kudwa mu Horebu kunoti ku Kadeshibhareneya nthu eyenda nge zila ye Dombo le Seiri.

³Ngono mu gole le bumakumi manna (40), mu zhuba le kutanga le mwedzi we bugumi lina zhuba ling'ompela badwa mu Egipiti, Mushe kalebeleka ne bathu be Iziraela nge kwakose Yahwe kwabakapa Mushe uli nlayo kubali,

⁴asinokunda Sihoni mambo we Baamori wakabe egala ku Heshibhoni na Ogi mambo we Bhashani wakabe egala ku Ashitaroti ne ku Edireyi.

⁵Kwakabe kuli seli ye Jorodani mu shango ye Moabu, Mushe etjenesa nlayo iwoyu eti,

⁶Yahwe Ndzimu wedu bakati kutili tili ku Horebu, “Imwi magalisa pa dombo ileli,

⁷shandukani mutole gwendo gwenyu muyende ku shango ye matuthu ye Baamori ne ku babakidzani babo mu Araba ne mu shango ye matuthu ne shango yakawila ne ku Negebu ne ku tjekelo dze gungwa ne ku shango ye Bakanana ne ku Lebanoni bukule kunoswika ku gwizi bukulu Yufuratesi.

⁸Bonani, ndabiga shango mbeli kwenyu, nginani mutole shango iyo Yahwe yabakatuna kuti banoipa botate benyu bo Abhurahama na Isaki na Jakubo ne bana babo banowozha shule kwabo.”

⁹“Mu tjibaka itjetjo ndakati kumuli, ‘Anditotubula ndili ndoga kumubhabha.

¹⁰Yahwe Ndzimu wenyu wakamuwandisa ngono bonani, nasi monga nyenyedzi dze kudzimu nge bunji.

¹¹Tshene Yahwe Ndzimu wa botate benyu bamuwandise mbalo yamuli iyo kanjinji nge tjiwulu bamukombolele sekwa bakagadzabgwe.

¹²Ndingasenga tjini ndili ndoga ntolo unolema wenyu ne ndebo dzenyu?

¹³Shalulani balume bakatjenjela banohwisisa bana zibo, banozibika mu njudzi dzenyu ngono ndowobabiga kube batungamili benyu.’

¹⁴“Makadabila muti, ‘Tjawaleba leba tjakalulwama kutili kuti titjishinge.’

¹⁵“Ndizo ndakatola batungamili be njudzi dzenyu, balume bakatjenjela bana zibo ababiga batungamili benyu, batungamili be bali zwiwulu ne batungamili be bali mazana ne batungamili be bali makumi mashanu ne batungamili be bali gumi ne makulukota mu njudzi dzenyu.

¹⁶Ngono ndakalaya basumikilisi benyu tjibaka itjetjo nditi, ‘Ihwani ndebo ipakati kwe zwikamu zwenyu ngono musumikilise nge ndulamo pakati kwe nthu ne ikamu tjitje kene pakati kwe nthu ne ntaya unamwi.

¹⁷Musitongobe ne shalawulo mu kusumikilisa, muhwe batukunu ne bakulu nge kunofanana, musitongotja buso gwe nthu ngoti kusumikilisa ngekwe Ndzimu. Ndebo inomulemela muizhise kundili ngono ndowoyihwa.’

¹⁸Ngono mu tjibaka itjetjo ndakamubudza kose kwa makafanila thama.”

¹⁹“Ngono tikamilika mu Horebu tikayenda tipalama tjilambanyika itjetjije tjikulu tjakabangalala tjamakabona tiyenda ku shango ye matuthu ye Baamori sekwa takadwiwa ndi Yahwe Ndzimu wedu, ngono tikaswika ku Kadeshibhareneya.

²⁰Ipapo abe nditi kumuli, ‘Maswika ku shango ye matuthu ye Baamori iyo yatinopiwa ndi Yahwe Ndzimu wedu.

²¹Bonani, Yahwe Ndzimu wenyu wabiga shango iyeyi mbeli kwenyu, yendani muitole sekwa madwiwa ndi Yahwe Ndzimu wa botate benyu, musitje kene kuli kutemeka mafupa.’

²²“Ipapo mose mukazha kundili mukati, ‘Ngatitumeni balume banotisholela shango babuye batibudze zila yatingayenda ndiyo nenge kwe mizi mikulu yatinowongina.

²³“Nkumbulo ihwoyo ukalingika wakalulwama kundili, ngono atola balume bali gumi lina babili mu muli, nlume ng'ompela kudwa mu ludzi gung'ompela.

²⁴Ngono bakashanduka bakayenda ku shango ye matuthu bakaswika ku Nkuku we Eshikholi ngono bakawushola.

²⁵Ngono bakatola mimwe ye mitjelo ye shango iyeyo bakazha nayo kutili, bakazhisa mbiko kakale beti, ‘I shango yakanaka Yahwe Ndzimu wedu yabanotipa.’ ”

²⁶“Koga mukaside kuyenda, mukapandukila nlayo wa Yahwe Ndzimu wenyu.”

²⁷Makang'ong'ola muli mu mishasha yenyu mukati, “Ngoti Yahwe banotibenga bakatidusa mu shango ye Egipiti kutilonga mu maboko e Baamori kutilobesa.

²⁸Toyenda ngayi kene? Zwikamu zwedu zwatinyadza moyo azwiti, ‘Bathu bako bakulu kakale balefu patili, mizi mikulukulu kakale yakasima ina makuma akakula, pezhugwi kwa ikoku tabona bakololo be Baanakimu.’ ”

²⁹Ipapo abe nditi kumuli, “Musipaluke moyo kene kuli kubatja.

³⁰Yahwe Ndzimu wenyu ibo bakamutungamila banowomugwila sekwa bakamuthamila mu Egipiti makalinga,

³¹ne mu tjilambanyika kwamakabona Yahwe Ndzimu wenyu sekwa bakamubhabha se nlume ebhabha nkololo uwe, bakamubhabha gwendo gose gwamakayenda kudzina muswika mu magalo iyawa.”

³²Nenguba kwakajalo amuzogalamoyo Yahwe Ndzimu wenyu

³³ibo bakamutungamila nge moto busiku kumushakila magalo amungabaka mishasha yenyu muali, umulakidza kuti muyende tjini, masikati bemutungamila nge gole.

³⁴Ngono Yahwe bakahwa matama enyu ngono bakagwadza moyo bakatuna beti,

³⁵“Akuna ne ng'ompela we balume ibaba be tjizekugwana itjetji tjibiibi unowobona shango mbuya iyo yandakatuna kuyipa botate benyu,

³⁶kuzhe kwa Khalebu nkololo wa Jefune, iye unowoyibona. Iye ne bana babe ndowobapa shango yaakatongo tshamba nge kuti iye wakatobela Yahwe nge buzhalo.”

³⁷Yahwe bakandigwadzila moyo bo ngekwenyu bakabe beti, “Nawebo autowongina ikweno.

³⁸Joshuwa nkololo wa Nuni, nlanda uwo unowongina, unkulumbidze ngoti unowothama Iziraela kuti baigale thaka.

³⁹Pezhugwi kwaikoku bana benyu batukununu basathu bakaziba ndulamo kene mbipo banowongina ikweno ngono ndowobapa iyo, banowoyithuwa.

⁴⁰Koga imwi shandukani mutole gwendo mu tjilambanyika makalinga ku lubizho gwe Gungwa Shaba.”

⁴¹Ipapo mukandishandula muti, “Tatjinya kuna Yahwe, towoyenda tikanogwa koga sekwatadwiwa ndi Yahwe Ndzimu wedu.” Ndizo mmwe ne mmwe wenyu kadedela mathumo awe engwa mukakumbula kuti kulelulelu kutathila ku shango ye matuthu.

⁴²Ngono Yahwe bakandidwa bakati, “Ubadwe uti, ‘Musiyende ne kugwa musigwe ngekuti andite ndili pakati kwenyu, musitongodwa mu kundiwa nge zwita zwenyu.’ ”

⁴³Ndizo ndakalebeleka namwi ngono mukasitongo hwilila koga mukapandukila nlayo wa Yahwe, mukabe ne manyimwe mukatathila ku shango ye matuthu.

⁴⁴Ipapo Baamori bakabe begala mu shango iyeyo ye matuthu bakamushangamidza nge ngwa bakatatana namwi se nyutji bakamutemela pasi mu Seiri kunoti ku Horima.

⁴⁵Makashanduka mukalilila mbeli kwa Yahwe, koga Yahwe bakasimuhwilile kene kumuteedza.

⁴⁶Ndizo makagala mu Kadeshi mazhuba manjinji, tjibaka tjose tjamakapitsha ikweno.