Read Kalanga Matama 11 Bible Online

Matama 11 - Kalanga bible

Matama 11

¹“Ude Yahwe Ndzimu uwo uthame tjabanoshaka, ulondolodze milayo yabo misi yose.

²Uzibe muna lino zhuba kuti bana babo ate ibo bakabona bakaziba kulaya kwa Yahwe Ndzimu uwo ne bukulu gwabo, tjiazha tjabo tjakasima ne luboko gwabo gwakatambunuka,

³zwilakidzo zwabo ne mishingo yabo yabakashinga ku Egipiti kuna Faro mambo we Egipiti neku shango iye yose,

⁴ne tjabakathama ku ngwa ye Egipiti, ku mbizi dzabo neku koloyi dzabo dze ngwa ne sekwa bakathama vula dze Gungwa Shaba kubakwididza pabakabe bemulonda na Yahwe sekwabaka balobesa kuswikila mu zhuba lino.

⁵Bana babo abazobona Yahwe tjabakakuthamila mu tjilambanyika kudzina uswika mu bugalo igogu,

⁶ne tjabakathamila Datani na Abiramu bakololo ba Eliyabu nkololo wa Rubheni, shango sekwa yakaashama nlomo wayo ikabamidza ne misha yabo ne mishasha yabo ne tjimwe ne tjimwe tjabo tjinotjila pakati kwe Baiziraela.

⁷Mesho awo ndiwo akabona zwithu izwezwi zwikulukulu Yahwe zwabakathama.

⁸“Ndizo wali mowolondolodza nlayo wose wandinomupa mu zhuba lino, ndizo musime, mungine mutole shango yamunoyenda kuithuwa,

⁹nekuti mutjile tjibaka tjilefu mu shango Yahwe yabakatuna kuna bobatategulu benyu kubapa iyo ne bana babo, shango inowunga nkaka ne butji.

¹⁰Ngoti shango yamunongina kuithuwa aitofanana ne shango ye Egipiti yamakabhuda muili kwamakadzwala mbewu yenyu mukaidilidzila nge makumbo se nnda we milibo,

¹¹koga shango yamunoyenda kuithuwa i shango ye matuthu ne mikuku inong'wa vula inona idwa kudzimu,

¹²shango Yahwe Ndzimu wenyu yabana hanya nayo, mesho a Yahwe Ndzimu wenyu amuili misi yose, kudwa mu kutangisa kwe gole kunoti ku bupelo gwe gole.

¹³“Ngono ha mungahwa milayo yangu iyo yandinomupa nasi mu zhuba ileli, kuda Yahwe Ndzimu wenyu ne kubashingila nge moyo wenyu wose nenge meya yenyu yose,

¹⁴ipapo banowonisa vula mu minda yenyu nge tjibaka tjayo, vula ye ntovudzo neye tjibodza mashanga kuti muvune mathunde enyu muwane nkumbi we zhambi ne mafuta.

¹⁵Ngono banowomedza bushwa mu shango yenyu gwe ng'ombe dzenyu, mowoja mukaguta.

¹⁶Mube ne njele moyo wenyu usitongo tjengedzeka mube mupambuka mushingila midzimu mimwe mube muinamata,

¹⁷mube mugwadzisa moyo Yahwe bebe bezhalila kudzimu vula ibe isingane ngono minda ibe isina tjainodusa ngono mube muloba mulibilidza mu shango mbuya Yahwe yabanomupa.

¹⁸“Ndizo wali mulonge matama angu iyawa mu moyo wenyu nemu meya yenyu, muasungilile mu maboko enyu tjili tjilakidzo ne mu phazha dzenyu.

¹⁹Muidiye bana benyu, mulebe nge kwayo muligele mu ng'umba dzenyu ne muyenda mu zila ne mulala pasi ne mumilika.

²⁰Muikwale mu makwasayile e mikoba ye ng'umba dzenyu nemu zwizhalilo zwe mikoba ye mizi yenyu

²¹kuti mazhuba enyu ne e bana benyu awande mu shango Yahwe yabakatuna kuna bobatategulu benyu kubapa iyo ha kudzimu ku tjipezhugwi kwe shango.

²²Ngoti ha mungabe ne njele kulondolodza nlayo wose iwoyu wandinomupa kuwulondolodza, muda Yahwe Ndzimu wenyu, muyenda mu zila dzabo dzose ne kuzwibhatilila ndibo,

²³ipapo Yahwe banowotata njudzi dzose idzedzi mbeli kwenyu, ngono mowotolela njudzi hwulu kakale dzakasima kumupinda.

²⁴Pamwe ne pamwe makumbo enyu paanowotshamba panowobe penyu, shango yenyu inowotangisa pa tjilambanyika tje Lebanoni ne kudwa pa Gwizi, gwizi gwe Yufuratesi kunoti ku gungwa gwe kugolombedzo.

²⁵Akuna unowotubula kumidzana namwi, Yahwe Ndzimu wenyu banowolonga kutjiwa kwenyu ne kupalukamoyo mu shango yose yamunowotshamba muili sekwa bakamugadzabgwe.

²⁶“Bonani, ndobiga makombolelo ne bhiso mbeli kwenyu mu zhuba ileli,

²⁷makombolelo ha muhwa milayo ya Yahwe Ndzimu wenyu iyo yandinomupa zhuba lino,

²⁸bhiso ha musingahwe milayo ya Yahwe Ndzimu wenyu koga mupambuka mu zila yandinomupa zhuba lino mutobela midzimu mimwe yamusakatongo ziba.

²⁹Ngono kuti Yahwe Ndzimu wenyu bemuzhisa mu shango yamakalingisana nge kuingina kuithuwa, mubige makombolelo pezhugwi kwe Dombo le Gerizimu, bhiso ilo mulibige pezhugwi kwe Dombo le Ebali.

³⁰Apa ate ali seli kwe Jorodani kunomila zhuba kwe zila, kudelukila ku bhezhuba, mu shango ye Bakanana banogala mu Araba kulingisana ne Giligala kubapa ne nti nkulu wa More kene?

³¹Ngoti mabe pejo ngotjuluka Jorodani kutola shango yamunopiwa ndi Yahwe Ndzimu wenyu. Muti mayitola mogala muili,

³²mube ne njele kulondolodza milayo yose yandinomupa mu zhuba lino.