Read Kalanga Matama 12 Bible Online

Matama 12 - Kalanga bible

Matama 12

¹“Eyi milayo yamakafanila yela njele kuilondolodza mu shango Yahwe Ndzimu wa bobatategulu benyu yabakamupa kuithuwa mazhuba wose amunotjila mu shango.

²Nge malebeswa wose mukolomodze magalo wose ekunamata midzimu e njudzi dzamunowotolela shango, pezhugwi kwe matombo malefu na pezhugwi kwe matuthu na kusi kwe nti mmwe ne mmwe una mazhani manyolo.

³Mulige zwibeso zwabo zwe zwibhayilo mube mupkhwanya mapango abo mupise bo Ashera babo nge moto. Muteme mulige midzimu yabo ye zwifano muduse zina labo mu magalo iyawaje.

⁴Musitongo namata Yahwe Ndzimu wenyu sayikoko.

⁵Koga imwi mu shake bugalo gwamunoshaluligwa ndi Yahwe Ndzimu wenyu pakati kwe njudzi dzose kubiga zina labo ne kuthama bugaloko, ikoko ndiko kwamunowoyenda.

⁶Ngono ikoko kube iko kwamunoyisa zwibhayilo zwenyu zwinopisiwa ne zwimwe zwibhayilo zwenyu ne zwebugumi zwenyu ne zwipo zwamunodusa ne zwipo zwe kutuna kwenyu ne zwipo zwe kuda kwenyu ne mbano dze zwithuwo zwenyu.

⁷Ikoko mowojila mbeli kwa Yahwe Ndzimu wenyu, mowoshatha, imwi ne misha yenyu mu tjimwe ne tjimwe tjamunowothama, ngoti Yahwe Ndzimu wenyu banomukombolela.

⁸Musitongo thama sekwa tinothama ipapa sangwenu mu zhuba lino, mmwe ne mmwe ethama tjimwe ne tjimwe tjaanobona tjakalulwama mu mesho awe,

⁹ngoti amuthu mukaswika mu kunyaluluka ne mu thaka yamunopiwa ndi Yahwe Ndzimu wenyu.

¹⁰Koga muti mutjuluka Jorodani, mugala mu shango yamunopiwa ndi Yahwe Ndzimu wenyu kuithuwa, ngono bemupa kunyaluluka mu kugwa ne zwita zwenyu zose kumupoteleka kuti mutjile makabakililika.

¹¹Ipapo ku bugalo gunowoshalugwa ndi Yahwe Ndzimu wenyu kuthama kuti zina labo ligale ko, ikoko ndiko kwamunowozhisa kose kwandinowomudwa: Zwibhayilo zwenyu zwinopisiwa ne zwibhayilo zwimwe ne zwe bugumi ne zwipo zwamunodusa ne zwibhayilo zwe kutuna zwamakatuna kuna Yahwe.

¹²Ngono ikoko mushathe mbeli kwa Yahwe Ndzimu wenyu, imwi ne bakololo benyu ne bakololokadzi benyu ne balandalume ne balandakadzi ne Nlevi umu mizi yenyu se asina gobe kene thaka mu mumuli.

¹³Mube ne njele kuti musitongo pa zwibhayilo zwenyu zwinopisiwa pa bugalo gumwe ne gumwe gwamabona,

¹⁴koga muyise ku bugalo gunowoshalugwa ndi Yahwe mu gumwe gwe ludzi gwenyu, ikoko ndiko kwamunowopila zwibhayilo zwenyu zwinopisiwa, ikoko ndiko kwamumowothamila kose kwandinomudwa.

¹⁵“Koga, imwi mungabulaya phuka mukaja nyama mu mmwe ne mmwe we mizi yenyu sekwa munoda kuyendidzana nge makombolelo a Yahwe Ndzimu wenyu abamupa, usimbuyanana ne mbuyanana ungayija, ingana ikabe ili ye phala kene ye phembgwe.

¹⁶Koga musitongo ja malopa, muatebulile pasi se vula.

¹⁷Musitongo jila mu mizi yenyu, tjebugumi tje mathunde kene tje nkumbi we zhambi kene tje mafuta kene mbano dze ng'ombe dzenyu kene dze ngubi dzenyu kene tjimwe tje zwibhayilo zwe kutuna zwamakatunila kene zwibhayilo zwenyu zwe kuda kwenyu, kene zwibhayilo zwamadusa nge kwenyu,

¹⁸koga muzwijile mbeli kwa Yahwe Ndzimu wenyu mu bugalo gunowoshalugwa ndi Yahwe Ndzimu wenyu, imwi ne bakololo benyu ne bakololokadzi benyu ne balandalume benyu ne balandakadzi benyu ne Nlevi umu mizi yenyu, ndizo mowoshatha mbeli kwa Yahwe Ndzimu wenyu mu tjimwe ne tjimwe tjamunothama.

¹⁹Mube ne njele kuti musitongo siya Nlevi tjibaka tjose ha mutjila mu shango yenyu.

²⁰“Kowoti Yahwe Ndzimu wenyu betalabudza ntuthu wenyu sekwa bakamugadzabgwe, ngono imwi mube muti, ‘Toshaka ja nyama,’ ngoti modwila moyo nyama, mungaja sekwa munoshaka.

²¹Ha bugalo gwakashalugwa ndi Yahwe Ndzimu wenyu kubiga zina labo ikoko kuli kule kule namwi, ipapo mungabulaya tjimwe tje zwithuwo zwenyu zwamakapiwa ndi Yahwe sekwa ndamudwa ngono muje mu mizi yenyu se kuda kwenyu.

²²Se phala ijiwa kene phembgwe, munga ija, usakatjenapala kene wakatjenapala kofanana aije.

²³Koga mube ne malebeswa kuti amutoja malopa, ngoti malopa ndiwo butjilo ndizo musitongo jilanya nyama ne butjilo.

²⁴Musitongo aja muatebulile pasi se vula.

²⁵Musitongo aja, kuti ndiko kowomuyendila zubuyanana imwi ne bana benyu banozha shule kwenyu ha mushinga tjakalulwama mu mesho a Yahwe.

²⁶Koga zwithu zwakayengemala zwinodwa kumuli ne zwibhayilo zwe kutuna muzwiyise ku bugalo gunowoshalugwa ndi Yahwe,

²⁷muyise zwibhayilo zwenyu zwinopisiwa, kuli nyama ne malopa mu tjibeso tjinopisigwa zwibhayilo tja Yahwe Ndzimu wenyu. Malopa e zwibhayilo zwenyu atebuligwe pezhugwi kwe tjibeso tjinopisigwa zwibhayilo tja Yahwe Ndzimu wenyu koga nyama mungayija.

²⁸Mube ne njele kulondolodza matama wose iyawa andinomupa kuti kumuyendile zubuyanana nge kusingapele imwi ne bana benyu banozha shule kwenyu ha mushinga tjakalulwama ne tjakatambunuka mu mesho a Yahwe Ndzimu wenyu.”

²⁹“Kowoti Yahwe Ndzimu wenyu bepaladza njudzi mbeli kwenyu dzamunongina kudzitolela shango, ngono mube mudzitolela shango mube mugala muili,

³⁰mube ne njele kuti musiwile mu bhuzhu nge kubasala shule, shule kwe balobesiwa mbeli kwenyu. Musitongo bhuzwa tjimwe ngekwe midzimu yabo muti, ‘Njudzi idzedzi dzakabe dzishingila midzimu yadzo tjini kuti naswibo tithame tiyijalo?’

³¹Musitongo thama muijalo kuna Yahwe Ndzimu wenyu ngoti tjimwe ne tjimwe tjinobengiwa tjisingadiwe ndi Yahwe bakatjithamila midzimu yabo ngoti bakabuya bakapisa bakololo ne bakololokadzi babo bepisila midzimu yabo.”

³²“Tjimwe ne tjimwe tjandinomupa muyele njele kutjithama, musitongo dusa tjimwe mu tjili kene mukatjipaphidza nge tjimwe.