Read Kalanga Matama 13 Bible Online

Matama 13 - Kalanga bible

Matama 13

¹“Ha nlebesambeli angabepo pakati kwenyu, kene n'woloti we mawoloto ngono ebe emupa tjilakidzo kene ethama gaabadzo,

²ngono tjilakidzo kene gaabadzo libe lishingikala kene tjaanomubudza tjibe tjishingikala, ngono kene eti, ‘Ngatitobeleni midzimu mimwe,’ koga ili midzimu yamusakatongo ziba kale eti ngatiyishingile,

³musitongo teedza matama e nlebesambeli iwoyo kene n'woloti iwoyo ngoti Yahwe Ndzimu wenyu banomulika kuziba kene muda Yahwe Ndzimu wenyu nge moyo wenyu wose nenge meya yenyu yose.

⁴Imwi mutobele Yahwe Ndzimu wenyu mubatje, mulondolodze milayo yabo muhwe hwi labo, ngono mubashingile muzwibhatilile ndibo.

⁵Koga nlebesambeli iwoyo kene n'woloti we mawoloto iwoyo abulawe, ngoti wakadiya kupandukila Yahwe Ndzimu wenyu ibo bakamudusa mu shango ye Egipiti bakamudzutunula mu ng'umba ye busungwa kwakabe kuthama kuti usiye zila yawakapiwa ndi Yahwe Ndzimu uwo kuyenda muili. Ndizo ubukushe mbipo idwe pakati kwenyu.

⁶“Ha nkololo wa tate babo, mwana wa mmeyabo kene nkololo uwo kene nkololokadzi uwo kene nkadzi uwo kene nzwalani uwo waunohwanana naye kwazo ekupambusa nge kwakasumbikala eti, ‘Ngatiyendeni tinoshingila midzimu mimwe,’ yamusakatongo ziba imwi kene bobatategulu benyu,

⁷mimwe ye midzimu ye bathu bakamupoteleka, kene kuli pejo namwi kene kuli kule namwi, kudwa mu lubizho gumwe gwe shango kunoti ku gumwe,

⁸usitongo amutjila kene kuli kunhwilila, naiko usitongo nhwila ngoni kene kuntjidza, ne kunsumbika usitongo nsumbika,

⁹koga iwe umbulaye, tjiazha tjitjo tjibe tje kutanga kubhayana naye kumbulaya, maboko ebamwe abe etobela gugo.

¹⁰Munkikithidze nge mabgwe kudzina efa ngoti wakashaka kukuthubukanya na Yahwe Ndzimu uwo ibo bakakudusa mu shango ye Egipiti kudwa mu ng'umba ye busungwa.

¹¹Ngono Baiziraela bose banowohwa bakatja ngono bakasife bathama kakale mbipo inonga iyeyi pakati kwenyu.

¹²“Ha mungahwa mu mmwe we mizi mikulu yenyu, yamunopiwa ndi Yahwe Ndzimu wenyu kugala ko,

¹³kuyi bamwe be bathu basibetjimwe bazwithubula mu muli bakwebela bagali be nzi nkulu ntome beti, ‘Ngatiyendeni tinoshingila mimwe midzimu,’ ili midzimu yamusakatongo ziba,

¹⁴ipapo mowoshakisisa mukabhuzwa, ngono bonani, akuli malebeswa zwakwako kuti kuthu kunoshimika saikoku kwashingwa pakati kwenyu,

¹⁵nge malebeswa mulonge thumo mu bagali be nzi nkulu iwoyo, muwulobese tjose, bose bamuwuli ne ng'ombe dzawo, mushingise pitsha kwe thumo.

¹⁶Mukubunganye thundu yawo yose pakati kwe tjibata tjawo tjakazhuka mube mupisa nge moto nzi ne thundu yawo yose se tjibhayilo tjizhele tjinothamigwa Yahwe Ndzimu wenyu. Unowobe duluthulu nge kusingapele, awutjowobakwa kakale.

¹⁷Kusitongo yita tjimwe tje zwithu zwakanaka zwakayi mukolomole tjingawang'wa mu maboko enyu kuthama kuti kutjisa kwe bushongola gwa Yahwe kupele ngono bamulakidze ngoni, babe ne mahwilongoni mumuli ngono bamuwatshe sekwa bakatuna kuna bobatategulu benyu,

¹⁸ha muhwa hwi la Yahwe Ndzimu wenyu, mulondolodza milayo yabo yose yandinomupa mu zhuba lino mushinga tjakalulwama mu mesho a Yahwe Ndzimu wenyu.”