Read Kalanga Matama 14 Bible Online

Matama 14 - Kalanga bible

Matama 14

¹“Imwi mu bakololo ba Yahwe Ndzimu wenyu, musitongo zwitjeka kene mukazwiteselela nsholo bafi.

²Ngoti mu bathu bakayengemala kuna Yahwe Ndzimu wenyu, Yahwe bakamushalula kube bathu bawo mu bathu bamwe bose bamu shango.”

³“Musitongo ja tjimwe tjinoshimisa.

⁴Phuka dzamakafanila ja ndiyedzi: ng'ombe ne pkhwizi, mbudzi

⁵ne phembgwe ne phala ne ngama ne zilawa ne phofu ne phalapala ne ngululu.

⁶Phuka imwe ne imwe inopalalanya thozo ina thozo ina mbabi mbili kakale izewula pakati kwe phuka dzimwe mungaija.

⁷Koga idzedzo dzinozewula kene dzinopalalanya thozo dzamusakafanila ja ndiyedzi, kamela ne shulo ne mbila ngoti dzozewula koga adzitopalalanya thozo, adzite dzili mbuyanana kumuli.

⁸Hwotji, ngoti inopalalanya thozo koga aitozewula, ateili mbuyanana kumuli. Musitongo ja nyama yadzo ne zwitumbu zwadzo musitongo zwibhata.

⁹“Muna zose zwimu vula munga ja ezwi: Tjimwe ne tjimwe tjina zwimbi ne makwapa mungazwija.

¹⁰Tjisina zwimbi ne makwapa musitongo tjija, ate tjili tjibuyanana kumuli.

¹¹“Munga ja nyuni dzose mbuyanana.

¹²Koga edzi ndidzo dzamusakafanila kudzija: dzu ne gola ne dzu le hwobe

¹³ne bhangu gulu ne luphangwana butema kuyenda nge njudzi dzago

¹⁴ne gungubo limwe ne limwe ne ludzi gwalo

¹⁵ne fukumudzi ne ikundamwenyu ne hwungwe ne luphangwana bushaba kuyenda ne njudzi dzadzo

¹⁶ne ikotoshwiyo ne gunda ne dada

¹⁷ne hwuduntule ne njelele ne ishwiyo

¹⁸ne hanganlobe ne thame kuyenda nge njudzi dzadzo ne tjibelu na manlembe.

¹⁹Ne zwikonyana zose zwina mapapilo ate zwili zwibuyanana kumuli, zwisitongobuya zwikajiwa.

²⁰Zose zwithu zwibuyanana zwina mapapilo mungazwija.

²¹“Musitongoja tjimwe tjazwifila, mungatjipa ntaya ugele mu mizi yenyu kuti iye aje kene mungatjitengesela ntaya ukuzhe, kana imwi mu bathu bakayengemala kuna Yahwe Ndzimu wenyu.” “Musitongo kapayidza mbudzana mu nkaka wa mayi bayo.”

²²“Muduse tjebugumi tje mbewu dzenyu dzose dzinodwa mu minda yenyu gole ne gole.

²³Pana Yahwe Ndzimu wenyu ndipo pamunojila tjebugumi tje mathunde enyu netje nkumbi wenyu we zhambi netje mafuta enyu ne mbano dze ng'ombe dzenyu nedze mbudzi ne pkhwizi dzenyu mu bugalo gwabanowoshalula kuthama kuti zina labo ligale ko kuti muzwidiye kutja Yahwe Ndzimu wenyu misi yose.

²⁴Ngono ha kuli kulesa nawe usingatubule kuyisa tjebugumi tjitjo tjibaka Yahwe Ndzimu uwo bakukombolela ngoti bugalo igogo kuli kulesa nawe igogu gunowobe gwashalugwa ndi Yahwe Ndzimu uwo kubiga zina labo ko,

²⁵ipapo utjishandule tjibe mari uasenge uyende ku bugalo Yahwe Ndzimu gwabanoshalula,

²⁶ube ushingisa mari iyawo muna tjaunoda, kungabe ng'ombe kene pkhwizi kene nkumbi we zhambi kene nkumbi wakabila kene tjimwe koga tjawungabe uyemula ngono uzwije mbeli kwa Yahwe Ndzimu uwo ushathe iwe ne nsha uwo.

²⁷Ngono usitongosiya Nlevi umu mizi yenyu ngoti aana gobe kene thaka namwi.”

²⁸“Kubupelo gwe makole matatu mamwe ne mamwe muzhise tjebugumi tjose tjamawana mu gole ilo zwalo mutjibiganye mu mizi yenyu,

²⁹ngono Nlevi ngoti asina gobe kene thaka namwi ne nlubili ne siyang'wa ne tjilikadzi bamu mizi yenyu banowozha bakaja bakaguta kuyita kuti Yahwe Ndzimu wenyu bamukombolele muna tjamunoshinga nge maboko enyu.