Read Kalanga Matama 15 Bible Online

Matama 15 - Kalanga bible

Matama 15

¹“Kubupelo gwe makole mamwe ne mamwe ali kutendeka musunungule banomukolota.

²Zila ye kusunungula ikoku ndieyi, unowosunungula tjimwe ne tjimwe tjaakaadzima mbakidzani uwe, asibile mbakidzani uwe, mwana wa tate babe ngoti kusunungula kwa Yahwe kwalebgwa.

³Ungabila ntaya koga tjimwe tjitjo kene tjilini tjiku mwana wa tate babo utjisunungule.

⁴Koga akutowobe ne nshayi pakati kwenyu ngoti Yahwe banowomukombolela mu shango Yahwe Ndzimu wenyu yabanomupa kube thaka yenyu,

⁵ha ungahwa hwi la Yahwe Ndzimu uwo ukabe ne njele kulondolodza milayo yose yandinomupa mu zhuba lino.

⁶Kana Yahwe Ndzimu uwo banowokukombolela sekwa bakakugadzabgwe ngono uwoadzima njudzi njinji koga iwe autowoadzima kakale unowobusa njudzi njinji koga idzo adzitowokubusa.

⁷“Ha kuli kuti kuna nshayi pakati kwenyu, mmwe we bana ba tate benyu mu mmwe we mizi yenyu mu shango yenyu yamunopiwa ndi Yahwe Ndzimu wenyu usitongokukutadza moyo uwo kene ukanyima mwana wa tate babo unosheta,

⁸koga unzhulile tjiazha ube un'adzima tjakalizana kusheta kukwe kusingati tjimwe kuti ini.

⁹Uyele njele kuti kusitongobe ne nkumbulo mbiimbi mu moyo uwo ngono ube uti ‘Gole le butendeka, gole le kusunungula labe pejo,’ ube ube ne nkumbulo wakabipa ku mwana wa tate babo unosheta, ngono ube usingampe tjimwe, ngono ebe elilila kuna Yahwe nge kuko ngono kube kube tjibi kukuli.

¹⁰Umpe wakusununguka kusi nge meya dzakabhaya mbadu ngoti ngekwa ikoku Yahwe Ndzimu uwo banowokukombolela mu nshingo uwo wose ne mu tjimwe ne tjimwe tjaunothama.

¹¹Bashayi banowogala balipo tjibaka tjose mu shango, ndizo wali ndokulaya nditi uzhulile mwana wa tate babo tjiazha tjitjo, kuna unosheta kene nshayi mu shango.

¹²“Ha mwana wa tate babo, N'hebheru we tjilume kene N'hebheru we tjikadzi angatengesiwa kukuli, akushingile makole ali kutathatu, mu gole le butendeka unletje ayende akasununguka.

¹³Ngono uti unletja eyenda akasununguka usinletje eyenda asina tja akabhata.

¹⁴Umpe kuli kunjinji kudwa mu ngubi iyo ne kunodwa paunoshokolela ne paunoswinila nkumbi we zhambi kuyendidzana ne sekwa Yahwe bakakukombolela.

¹⁵Ukumbule kuti wakabe uli nlanda mu shango ye Egipiti ngono Yahwe Ndzimu uwo bakakudzutunula, ndizo ndokulaya nasi.

¹⁶Koga ha angati kukuli, ‘Imi anditoyenda,’ ngoti ekuda kakale eda nsha uwo ngoti etjila nawe zwakanaka,

¹⁷ipapo utole lunji upubule zebe iye pa nkoba ngono unowobe nlanda uwo kusingapele. Ku nlanda uwo we tjikadzi uthamebo kunufanana.

¹⁸Ngakusikulemele ha unletja eyenda ngoti wakakushingila makole ali kutathatu kunolizana tjibaka tje nshingi wakatapiwa kabili. Ndizo Yahwe Ndzimu uwo banowokukombolela mu tjimwe ne tjimwe tjaunoshinga.

¹⁹“ ‘Mbano dzose ndume dzazwagwa nge ng'ombe dzidzo ne pkhwizi ne mbudzi dzidzo udziyengemadzile Yahwe Ndzimu uwo, usitongo shingisa tjimwe mbano dze ng'ombe dzidzo kene kuli kukera mbano dze pkhwizi dzidzo kene mbudzi dzidzo.

²⁰Uzwijile mbeli kwa Yahwe, iwe ne nsha uwo gole ne gole pa bugalo Yahwe gwabanowo shalula.

²¹Koga ha zwina zwifo, ha zwili zwilema kene mapofu, kene tjifo tjimwe koga tjikulukulu usitongo bhayila Yahwe Ndzimu uwo.

²²Muzwijile mu mizi yenyu, usimbuyanana ne mbuyanana kofanana ungaja kufanana koga sekungabe kuli phala kene phembgwe.

²³Koga musitongo ja malopa adzo muatebulile pasi se vula.’ ”