Read Kalanga Matama 16 Bible Online

Matama 16 - Kalanga bible

Matama 16

¹“Mulondolodze mwedzi we Abibi, mulondolodzele Yahwe Ndzimu wenyu Nzano we Kupinda pezhugwi, ngoti mu mwedzi we Abibi Yahwe Ndzimu wenyu bakamudusa mu Egipiti kuli busiku.

²Ngono mubhayile Yahwe Ndzimu wenyu tjibhayilo tje Nzano we Kupinda pezhugwi, kudwa mu ngubi kene mu ng'ombe ku bugalo gunowoshalugwa ndi Yahwe kuthama zina labo kuti ligale ko.

³Musitongo ja tjiwunga tjakabidziwa natjo, mutjije mazhuba ali kutendeka ne tjiwunga tjisina mbidzo, tjiwunga tje kudziyidzika ngoti makabhuda mu Egipiti makalabuka mutizha, mu mazhuba wose ekutjila kwenyu mukumbule zhuba lamakabhuda ndilo mu shango ye Egipiti.

⁴Kusiyite mbidzo inowang'wa mu ntuthu wenyu wose mu mazhuba ali kutenda, nyama ye tjibhayilo tje madekwana e zhuba le kutanga isitongo lala kuswikila mangwanana tjimuka.

⁵Musitongo bhayila tjibhayilo tje Nzano we Kupinda pezhugwi mu mmwe nzi we mizi yenyu Yahwe Ndzimu wenyu yabanomupa,

⁶koga kube mu bugalo gunowoshalugwa ndi Yahwe Ndzimu wenyu kuti zina labo ligale ko, ikoko ndiko kwamunowobhayila tjibhayilo tje Nzano we Kupinda pezhugwi madekwana zhuba lingina tjibaka tjamakabhuda mu Egipiti.

⁷Muibhike muijile pa bugalo gunowoshalugwa ndi Yahwe, ngono mu mangwanana mugwilile ku mishasha yenyu.

⁸Mu mazhuba ali kutathatu muje tjiwunga tjisina mbidzo, ngono mu zhuba le butendeka kube ne nshangano wakayengemala kuna Yahwe Ndzimu wenyu, musitongo shinga mmwe nshingo mulili.”

⁹“Mubale tshipi dzili kutendeka, mutangise kubala tshipi idzedzi dzili kutendeka kudwa mu tjibaka tjamakavuna mathunde gwe kutanga.

¹⁰Ipapo mulondolodze Nzano we zwavung'wa mu minda kuna Yahwe Ndzimu wenyu ne tjipo tje ludo kudwa mu zwiazha zwenyu zwamunodusa kuyendidzana nge makombolelo a Yahwe Ndzimu wenyu.

¹¹Mushathe mbeli kwa Yahwe Ndzimu wenyu, imwi ne bakololo benyu ne bakololokadzi benyu ne balandalume benyu ne balandakadzi benyu ne Nlevi umu mizi yenyu ne nlubili ne siyang'wa ne tjilikadzi dzipakati kwenyu pa bugalo gwashalugwa ndi Yahwe Ndzimu wenyu kuti zina labo ligale ko.

¹²Mukumbule kuti makabe muli balanda mu Egipiti, ngono mube ne njele kulondolodza milayo iyeyi.”

¹³“Mulondolodze Nzano we Mishasha mazhuba ali kutendeka, ha mukubunganya zwe panoshokolegwa ne panoswinigwa nkumbi we zhambi.

¹⁴Mushathe mu nzano wenyu, iwe ne nkololo uwo ne nkololokadzi uwo ne nlandalume uwo ne nlandakadzi uwo ne Nlevi umu mizi yenyu ne nlubili ne siyang'wa ne tjilikadzi dzimu mizi yenyu.

¹⁵Mu mazhuba ali kutendeka mu londolodze Nzano kuna Yahwe Ndzimu wenyu pa bugalo gwakashalugwa ndi Yahwe ngoti Yahwe banowomukombolela muna zose zwamunowana ne mu mishingo ye maboko enyu yose, ndizo mowoshatha kwazo.

¹⁶“Bose betjilume benyu bazhe mbeli kwa Yahwe Ndzimu wenyu katatu mu gole pa bugalo gwabanowoshalula, bazhe tjibaka tje Nzano we Tjiwunga tjisina Mbidzo ne pa Nzano we zwavung'wa mu minda ne pana we Mishasha. Basitongo zha mbeli kwa Yahwe bakalembedza maboko.

¹⁷Nlume mmwe ne mmwe ape sekwa anotubula, kuyendidzana nge makombolelo a Yahwe Ndzimu wenyu abampa.

¹⁸“Mubige basumikilisi ne makulukota mu mizi yenyu yose yamunopiwa ndi Yahwe Ndzimu wenyu, kuyenda nge njudzi dzenyu ngono banowosumikilisa bathu nge ndulamo.

¹⁹Musitongo leyanya kutambunuka, musitongo be ne shalawulo, musitole tjizwimbanlomo musitongo tjitola ngoti tjizwimbanlomo tjopofupadza iye wakatjenjela ngono tjikapambusa matama e nlulwami.

²⁰Kutambunuka koga kube iko koga kwamunotobela kuti mutjile muthuwe shango yamunopiwa ndi Yahwe Ndzimu wenyu.

²¹“Musitongo dzwala nti muwuthama Ashera kubapa ne tjibeso tjinopisigwa zwibhayilo tja Yahwe Ndzimu wenyu tjamunowothama.

²²Kakale musitongo thama bgwe lakayengemala linoshimiwa ndi Yahwe Ndzimu wenyu.”