Read Kalanga Matama 18 Bible Online

Matama 18 - Kalanga bible

Matama 18

¹“Bapirisiti be Balevi, hwuti ludzi gose gwa Levi, abatowobe ne gobe kene thaka ne Iziraela, banowoja tjibhayilo tjapisigwa Yahwe, ndizo zwaanokobegwa.

²Abatowobe ne thaka pakati kwe bana batate babo, Yahwe ndibo thaka yabo sekwa bakabagadzabgwe.

³Gobe le bapirisiti ndiyeli kudwa mu bathu, kudwa muna ibabo banodusa tjibhayilo, kungadwa ili ng'ombe kene pkhwizi, bape mpirisiti bhandabuko ne shaya mbili ne gulu.

⁴Zwitshwa zwe mathunde enyu ne zwe nkumbi wenyu ne zwe mafuta ne wulu yenyu ye kutanga kudwa mu pkhwizi dzenyu mumpe izo.

⁵Ngoti Yahwe Ndzimu wenyu bakanshalula mu njudzi dzenyu dzose, kuma ne kushinga mu zina la Yahwe, iye ne bakololo babe nge kusingapele.

⁶“Ngono ha Nlevi ezha edwa mu mmwe we mizi yenyu kudwa mu Iziraela kwaanogala, ungazhazwe ku bugalo gwakashalugwa ndi Yahwe ha eyemula,

⁷ipapo ungashinga mu zina la Yahwe Ndzimu uwe koga se bamwe bose Balevi naye banoma nge makumbo kushinga mbeli kwa Yahwe.

⁸Banowobe ne gobe linolizana le kuja nenguba aamutjila mari mukudwa mutengesa thundu ye nsha uwe.

⁹“Muti mungina mu shango iyeyi yamunopiwa ndi Yahwe Ndzimu wenyu, musitongo zwidiya kutobela zwinoshimika zwinothamiwa nge njudzi idzedzije.

¹⁰Kusitongo wang'wa pakati kwenyu unopisa nkololo uwe kene nkololokadzi uwe ili tjibhayilo, unokandila kene mashabi zwinozha kene unotjenesa mashula kene nloyi

¹¹kene malipa kene unowonga bathu nge miti kene nloyilume kene unolebeleka ne bafi.

¹²Ngoti kene ali anizwe unothama zwithu izwezwi unoshimika kuna Yahwe, ngono ngekwe zwithu izwezwi zwinoshimika Yahwe Ndzimu wenyu banobadusa mbeli kwenyu.

¹³Mube basina nlandu mbeli kwa Yahwe Ndzimu wenyu.

¹⁴Ngoti njudzi idzedzi dzamabe pejo ngotolela shango banoyela njele balebi be zwimbeli zwinozha ne bakandili, koga imwi Yahwe Ndzimu wenyu abatomudumila kuthama sayikoko.

¹⁵“Yahwe Ndzimu wenyu banowomumusila nlebesambeli unonga imi kudwa pakati kwenyu, kudwa mu bana ba tate benyu, iye munteedze.

¹⁶Ikoku ndiko kwamakakumbila Yahwe Ndzimu wenyu ku Horebu mu zhuba le gubungano pamakati, ‘Ima tisihwe hwi la Yahwe Ndzimu wedu kene kuli kubona moto iwoyu nkulukulu kakale imi ndidwa ndifa.’

¹⁷Ngono Yahwe bandidwa bakati, ‘Baleba zubuyanana kose kwabaleba.

¹⁸Ndowobamusila nlebesambeli unonga iwe kudwa mu bana ba tate babo, ngono ndowolonga matama angu mu nlomo uwe ngono unowoleba kose kwandan'dwa.

¹⁹Ngono kene ali ani usingayele njele matama angu aanowoleba mu zina langu, imi nge kwangu ndowolingisana naye.

²⁰Koga nlebesambeli unowoleba koga dama mu zina langu landisan'dwa kuleba, kene unoleba dama mu zina le midzimu mimwe, nlebesambeli iwoyo unowofa.’

²¹Ngono ha mungazwidwa mu moyo mukati, ‘Tingaziba tjini dama lisalegwa ndi Yahwe?’

²²Ha nlebesambeli eleba dama mu zina la Yahwe, ilelo dama libe lisingashingikale kene lisingabe malebeswa, ilelo i dama Yahwe labasaleba, nlebesambeli wazwilebegwa koga, musitongo ntja.