Read Kalanga Matama 2 Bible Online

Matama 2 - Kalanga bible

Matama 2

¹“Ipapo tikashanduka tikatola gwendo gwedu mu tjilambanyika takalinga ku Gungwa Shaba sekwa ndakadwiwa ndi Yahwe. Ngono takatola mazhuba manjinji tipoteleka mu shango ye matuthu ye Seiri.

²Ipapo Yahwe bakati kundili,

³‘Mayendayenda mu shango iyeyi ye matuthu tjibaka tjilefu ngono kwalizana, shandukilani ku bunandzwa.’

⁴Idwa bathu uti, ‘Mabepejo ngopinda mupalama shango ye zwikamu zwenyu bakololo ba Esau banogala mu Seiri ngono banowobe bemutja. Ndizo muyele njele kwazo.

⁵Musitongo gwa nabo ngoti akuna pamwe pe shango yabo pandinowomupa, aa, ndodwa ne patukununu nthu paangatshamba ngoti ndakapa Esau Dombo le Seiri kube lile.

⁶Mutenge zojiwa nge mari mubali kuti muje ne vula muyitenge mubali nge mari kuti mung'we.

⁷Ngoti Yahwe Ndzimu wenyu bakamukombolela mu mishingo yose ye maboko enyu, banoziba gwendo gwenyu mupalama tjilambanyika itjetji tjikulu. Makole ali makumi manna iyawa Yahwe Ndzimu wenyu bakabe banamwi, akuna tjamakasheta.’

⁸Ndizo wali takadwilila tiyenda kudwa pa zwikamu zwedu bakololo ba Esau, bakabe begala mu Seiri, tikasiya zila ye Araba inodwa ku Elati neku Eziyonigeberi.” “Tikashanduka tikalinga ku lubizho gwe tjilambanyika tje Moabu.

⁹Ngono Yahwe bakati kundili, ‘Musitongo dziyidza Moabu kene mukagwa nabo ngoti anditowomupa pamwe pe shango yabo ngoti ndakapa Ari bakololo ba Loti.’

¹⁰(Baemimi bakatongo gala ikoko, bathu bakabe bali bakulu bali banjinji bali balefu se Baanakimu.

¹¹Banotogwa bali Barefaimu se Baanaki koga Bamoabu banobadana Baemimi.

¹²Bahori naibo bakatongo gala mu Seiri koga bakololo ba Esau bakabatolela, bakabalobesa bebe begala mu magalo abo sekwakathama Baiziraela ku shango yabakatola yabakapiwa ndi Yahwe.)

¹³‘Ngwenu wali milikani mutjuluke nkuku we Zeredi.’ Ndizo tikatjuluka nkuku we Zeredi.

¹⁴Tjibaka tjatakatola kudwa mu Kadeshibhareneya kuswikila titjuluka nkuku we Zeredi makole ali makumi matatu ana ali zhanakadzi kuswikila tjizekugwana tjose tje babhayani tjifa tjipela mu bukotokelo Yahwe sekwa bakabe batuna kubali.

¹⁵Ngoti nge malebeswa tjiazha tja Yahwe tjakabe tjibhayana nabo kubalobesa mu makotokelo kuswikila bepela.”

¹⁶“Ndizo kwakati balume be ngwa bose bafa basitjipo pakati kwe bathu,

¹⁷Yahwe bakabe beti kundili,

¹⁸‘Mu zhuba lanasi mutjuluke n'gathu we Moabu pa Ari.

¹⁹Ngono muti muabilila Baamoni musitongo badziyidza kene mukagwa nabo ngoti akuna pamwe pe shango ye bakololo ba Amoni pandinowomupa ngoti ndakayipa bakololo ba Loti kube yabo.’

²⁰(Naiyobo inotogwa ili se shango ye Barefaimu. Barefaimu bakatongo gala mu ili koga Baamoni bakabe be badana Bazamuzumimu,

²¹bathu bakabe bali bakulu bali banjinji bali balefu se Baanaki. Koga Ndzimu wakabalobesa mbeli kwabo ngono Baamoni bakabatolela bakagala imomo mu bumo gwabo.

²²Yahwe bakathama sekwa bakathamila bakololo ba Esau banogala mu Seiri pawakalobesa Bahori mbeli kwabo, ngono bakabatolela bakagala mu ili mu bumo gwabo kuswikila nasi.

²³Koga Baavimi bakabe begala mu mizi bukule kunoti ku Gaza bakalobesiwa ne Bakhafithori bakabe bedwa ku Khafithori ngono bakagala ikoko mu bumo gwabo.)”

²⁴“ ‘Milikani, tolani gwendo gwenyu mutjuluke lukoba gwe Arinoni. Bonani, ndalonga Sihoni we N'amori, mambo we Heshibhoni ne shango iye mu maboko enyu. Tangisani kutola shango mugwe naye.

²⁵Mu zhuba ilelino ndowotangisa kulonga hana ne lutjo gwenyu mu bathu ba pasi kwe kudzimu, banowohwa thawu nge kwenyu ngono banowotetema bakafubala nge kwenyu.’ ”

²⁶“Ndizo ndakatuma batumwa kudwa mu Kedemoti kuna Sihoni mambo we Heshibhoni eyisa matama e mbakiso eti,

²⁷‘Utiletje tipinde tipalama shango iyo, towoyenda nge zila koga, atitowopambukila ku luji kene ku lumeshwe.

²⁸Iwe unowotitengesela zojiwa nge mari kuti tije, ungatipa vula nge mari kuti ting'we koga utiletje tipinde nge makumbo

²⁹sekwatakathamigwa nge bakololo ba Esau banogala mu Seiri ne Bamoabu banogala mu Ari kudzina titjuluka Jorodani tingina mu shango yatinopiwa ndi Yahwe Ndzimu wedu.’ ”

³⁰Koga Sihoni mambo we Heshibhoni kasidume kuti tipinde panli ngoti Yahwe Ndzimu wenyu bakakukutadza moyo uwe bakathama kuti moyo uwe ube ne bukomba kuti banlonge mu maboko enyu mu zhuba ilelino.

³¹Ngono Yahwe bakandidwa bakati, “Bona, ndatangisa kukupa Sihoni ne shango iye, tangisa kutola kuti ugale mu shango iye.”

³²Ipapo Sihoni kabhuda kuwotinginilila ana bathu babe bose kuwogwa ku Jahazi.

³³Ngono Yahwe Ndzimu wedu bakatipa iye tikankunda, iye ne bakololo babe ne bathu babe bose.

³⁴Ngono tikatapa mizi mikulu iye yose mu tjibaka itjetjo ngono tikakolomodza nzi nkulu mmwe ne mmwe tjoselele ne balume ne bakadzi ne bana, akuna tjatakasiya.

³⁵Takatapa ng'ombe ne thundu imu mizi mikulu tiyizwitolegwa.

³⁶Kudwa ku Aroeri nzi nkulu umu ndzibo we lukoba gwe Arinoni ne kudwa ku nzi nkulu umu nkuku kuyenda kule kunoti ku Giliyadi kwakabe kusina nzi nlefusa kutili, Yahwe Ndzimu wedu wakailonga mu maboko edu yose.

³⁷Koga ku shango ye bakololo ba Amoni amuzo sedzela, kodwa kuti ku shango yose imu phili dze gwizi gwe Jabhoki ne mizi mikulu ye shango ye matuthu ne kumwe ne kumwe Yahwe Ndzimu wedu kwawakatidzibila.