Read Kalanga Matama 20 Bible Online

Matama 20 - Kalanga bible

Matama 20

¹“Kuti ha muyenda kugwa ne zwita zwenyu, mube mubona mbizi ne koloyi dze ngwa ne ngwa hwulu pana yenyu musitongo zwitja, ngoti Yahwe Ndzimu wenyu banamwi ibo bakamudusa mu shango ye Egipiti.

²Ngono muti musedzela pejo ne ngwa, mpirisiti azhe mbeli alebeleke ne bathu,

³abadwe ati, ‘Ihwani imwi Baiziraela, masedzela pejo ne ngwa kugwa ne zwita zwenyu mu zhuba lino, musitongo paluka moyo, musitje kene kuli kutetema kene kubazeeza,

⁴ngoti Yahwe Ndzimu wenyu ndibo banoyenda namwi kumugwila ne zwita zwenyu, kumupa kukunda.’

⁵Ipapo makulukota anowolebeleka ne bathu eti, ‘Ndiwupi nlume mumuli wakabaka ng'umba iye tshwa ngono usathu kaizhula? Ngaabgwilile ku ng'umba iye pamwe unodwa efa mu ngwa ngono mmwe nlume ebe eizhula.

⁶Kene ndiani nlume uyipapa wakalima nnda we zhambi ngono usathu kaja mitjelo yawo? Ngaabgwilile ku ng'umba iye ngoti pamwe ungadwa efa mu ngwa ngono mmwe nlume esala eja mitjelo.

⁷Kakale ndiani nlume uipapa wakabigilidza nkadzi ngono usathu kankotosa? Ngaabgwilile ku ng'umba iye ngoti pamwe ungadwa efa mu ngwa ngono mmwe nlume esala enkotosa.’

⁸Ngono makulukota ngabalebeleke kakale ne bathu ati, ‘Ndiani nlume uipapa unotja etetema moyo? Ngaabgwilile ku ng'umba iye ngoti moyo ye bakwinya babe inodwa inyawuka seuwe.’

⁹Ngono kuti makulukota apedza kulebeleka ne bathu, ipapo batungamili be babhayani bashalugwe batungamile bathu.

¹⁰“Uti usedzela pa nzi kubhayana nawo, ukumbile mbakisano mu uli.

¹¹Ngono ha shandulo yawo ili ye mbakisano ngono bezwipa kukuli, ipapo bathu bose banowang'wa muuli babe bashingili babo bakushingile.

¹²Koga nzi usingathame mbakisano nawe koga uthama ngwa nawe, ipapo uukombe nge ngwa,

¹³ngono kuti Yahwe Ndzimu uwo beulonga mu maboko awo ubulaye balume bose bamuuli,

¹⁴koga bakadzi ne batukununu ne ng'ombe ne tjimwe ne tjimwe mu nzi nkulu, thundu yawo yose uitole kube iyo yose ushathisiwe nge thundu ye zwita zwizo yawapiwa ndi Yahwe Ndzimu uwo.

¹⁵Uthame uyijalo ku mizi mikulu yose ikulekule nawe isi mizi ye njudzi idzedzi dzipano.

¹⁶Koga mu mizi mikulu ye bathu ibaba iyeyi yaunopiwa ndi Yahwe Ndzimu uwo kube thaka, kushete tjimwe tjinotjila tjinofema tjaunosiya,

¹⁷koga ubalobese tjoselele, Bahiti ne Baamori ne Bakanana ne Baperizi ne Bahivi ne Bajebusi Yahwe Ndzimu uwo sekwa bakalaula,

¹⁸kuti basitongodwa bemudiya kuthama kunoyendidzana ne mishingo yabo inoshimisa yabakashinga mu kushingila midzimu yabo, ngono nge kwaikoko mudwa mutjinyila Yahwe Ndzimu wenyu.

¹⁹“Ha ungakomba nzi nge ngwa tjibaka tjilefu, kuti uutole usitjinye miti yawo nge kuitema nge shathu, ngoti ungaja mitjelo yayo kusi kuitema. Apa miti imu minda bathu baakafanila kukomba kene?

²⁰Miti yamunoziba kuti ayitojiwa koga ndiyo yamungatema mubaka ndiyo zwamunoshingisa mu kukomba nzi kudzina muwutola.