Read Kalanga Matama 21 Bible Online

Matama 21 - Kalanga bible

Matama 21

¹“Ha kungati mu shango iyeyi yaunopiwa ndi Yahwe Ndzimu uwo kuithuwa kukawang'wa mmwe akabulawa ali mu shango, kusingazibgwe kuti wakabulawa ndiani,

²ipapo sholotjena dzidzo ne basumikilisi babo bazhe ipapo, ngono babale thambo kuyenda ku mizi mikulu yakapoteleka wakabulawa

³ngono sholotjena dze nzi upejo ne nlume wakabulawa banowotola pholombe ye ng'ombe isakatongo shingisiwa tjimwe, isathu ikatongo kweba nge jokwi.

⁴Ngono sholotjena dze nzi nkulu iwoyo bayise pholombe ku nkuku una vula inowunga usakatongo limiwa kene kukadzwagwa muuli ngono bavune ntshibha we pholombe mu nkuku iwoyo.

⁵Ngono bapirisiti, bakololo ba Levi bazhe ipapo ngoti Yahwe Ndzimu wenyu bakabashalula kubashingila ne kukombolela mu zina la Yahwe, kuyendidzana ne dama labaleba kunyanyayidzana kumwe ne kumwe ne kugwisana kumwe ne kumwe kugadzikane.

⁶Ipapo sholotjena dzose dze nzi iwoyo upejo ne nlume wakabulawa bangulile maboko abo pezhugwi kwe pholombe iyeyo yakavung'wa ntshibha mu nkuku,

⁷ngono batendeke beti, ‘Maboko edu aazotebula malopa iyawa, nenge mesho edu dumbu aazobona malopa iyawa etebugwa.

⁸Imwi Yahwe mu bazwiibhatigwe bathu benyu Baiziraela, ibo bamakadzutunula, ngono musibige nlandu we kutebula malopa asina nlandu pakati kwe bathu benyu Baiziraela, koga nlandu we kutebula malopa ngabawuzwiibhatigwe.’

⁹Ndizo muduse nlandu we kutebula malopa asina nlandu pakati kwenyu, ha mushinga tjakalulwama mu mesho a Yahwe.

¹⁰“Muti muyenda ku ngwa kunogwa ne zwita zwenyu, ngono Yahwe Ndzimu wenyu bebe bebalonga mu maboko enyu ngono mube mubatapa,

¹¹ngono pakati kwe batapiwa mmwe ebe ebona nkadzi wakanaka ebe eyemula, en'yemulila kunlobola,

¹²ipapo unonzhisa ku nzi uwe ku ng'umba iye ngono nkadzi atesele nsholo uwe, athubule womba dzidze.

¹³Ngono ambule zwiambalo zwizwe zwe butapiwa agale mu ng'umba iye alilile tate babe na mmeyabe mwedzi wose uzhele. Shule kwa ipapo ungashangana naye kabe nlume uwe iye kabe nkadzi uwe.

¹⁴Ipapo ha asingakushathise unletje ayende kwaanoda, koga usitongo ntengesa nge mari, usitongo mbhata se nlanda se iwe wanlengudza wali.

¹⁵“Ha nlume ana bakadzi babili, mmwe wabo ediwa mmwe asingadiwe, ngono bose unodiwa ne usingadiwe bakanzwalila bana, ngono ha mbano ili ye nkadzi usingadiwe,

¹⁶ngono mu zhuba laanotshwayila bakololo thundu iye kube lukata, asitongo tola nkololo we nkadzi unodiwa se mbano etjebela we nkadzi usingadiwe iye ali we mbano.

¹⁷Koga atole mbano ili mbano, nkololo we nkadzi usingadiwe nge kumpa gobe kabili muna zose zwaanazo ngoti ndiye mbano iye, fanilo dze mbano dzakanlingisana.

¹⁸“Ha nlume ana nkololo usingahwe ali mpanduki, asingahwilile hwi la tate babe kene hwi la mmeyabe, kene bentjemela asingabahwilile,

¹⁹ipapo tate babe na mmeyabe bambhate ban'yise ku sholotjena dze nzi nkulu ku nkoba we kwaanogala.

²⁰Ngono badwe sholotjena dze nzi nkulu bati, ‘Nkololo wedu iwoyu aatohwa kakale mpanduki, aatohwa tjatinon'dwa, igovu kakale tjilaladzi.’

²¹Ipapo balume bose be nzi nkulu bankikithidze nge mabgwe afe, ndizo muduse mbipo pakati kwenyu, ngono Iziraela yose inowohwa ngono bakatja.

²²“Ha nlume angathama jinyo lakalizana shamu ye lufu ngono ebe ebulawa, mube munlembeledza mu nti,

²³mbili uwe usilembeleke busiku gose mu nti, koga mu mbiganye mu zhuba ilelo ngoti nlume wafa ngolembeledziwa walongwa bhiso nge Ndzimu, musitongo temapadza shango yenyu yamapiwa ndi Yahwe Ndzimu wenyu kube thaka yenyu.