Read Kalanga Matama 22 Bible Online

Matama 22 - Kalanga bible

Matama 22

¹“Ha ubona ng'ombe kene pkhwizi ye ikamu tjitjo ilashika usitongo ishayila hanya ube usinga bhatshe, uyitole uyiyise ku ikamu tjitjo.

²Ngono ha asipejo nawe kene usinga nzibe, uzhe nayo ku nzi uwo ngono igale nawe kuswikila ikamu tjitjo tjiyishaka, ipapo ube umpa iyo.

³Saikoko uthame uijalo nenge donki iye, uthame saikoko nenge tjiambalo tjitje nenge tjimwe koga tjalashikila ikamu tjitjo, tjanlashikila iwe ube utjinunga usitongo tjishayila hanya.

⁴Usitongoti ubona donki ye ikamu tjitjo kene ng'ombe ye ikamu tjitjo yawila pasi ukayishayila hanya umbhatshe kuimusa.

⁵“Nkadzi asitongo ambala tjiambalo tje nlume kene nlume asitongo mbala tjiambalo tje nkadzi ngoti mmwe ne mmwe unothama zwithu izwezwi unoshimisa kuna Yahwe Ndzimu wenyu.

⁶“Ha ungatilimuka uwana shaka le nyuni mu nti kene pasi lina majindana kene mabumbulu ngono mayi bawo bakabubatila majindana kene mabumbulu, usitongo tola mayi ne bana.

⁷Uletjedze mayi bayende koga utole bana kuyita kuti kuyende zubuyanana nge kuko kakale utjile tjibaka tjilefu.

⁸“Uti ubaka ng'umba tshwa, ubake guma kupoteleka denga layo kuti usitongo zwidanila nlandu we kutebula malopa ha mmwe angawa kudwa mulili.

⁹“Usitongo dzwala mbewu mbili dzakasiyana mu nnda uwo we mizhambi kube kudwa kuthama kuti zwivuno zose uzwitolegwe zwiyende ku bugalo gwakayengemala, zwivuno zwe tjawakadzwala ne zwivuno zwe nnda we zhambi.

¹⁰Usitongo lima ne ngabe ne donki mu jokwi ling'ompela.

¹¹Usitongo ambala tjiambalo tjakashangashangana, tjakathung'wa ne wulu ne jila zwishanganyiwa.

¹²Uthame maabi mu midzibo minna ye hazu iyo yaunoambala.

¹³“Ha nlume elobola nkadzi, ebe ewalilana naye kudwapo ebe enlamba,

¹⁴embhomedza zwinobhatisa shoni nge kukwe, empa zina lakabipa eti, ‘Ndakatola nkadzi iwoyu, ngono ndakati ndishangana naye awana asi phandala,’

¹⁵ipapo tate be mwanadi iwoyo na mmeyabe banowotola bakazhisa zwilakidzo zwe buphandala ku sholotjena dze nzi nkulu ku nkoba.

¹⁶Ngono tate be mwanadi banowodwa sholotjena bakati, ‘Ndakapa nkololokadzi wangu nlume iwoyu kube nkadzi uwe ngono wanlamba aatjan'da,

¹⁷ngono bonani wambhomedza zwinobhatisa shoni eti, “Andizowana mu nkololokadzi wenyu zwilakidzo zwe buphandala.” Koga zwilakidzo zwe buphandala gwe nkololokadzi wangu yezwezwi.’ Ngono babe betambunudza tjiambalo mbeli kwe sholotjena dze nzi.

¹⁸Ipapo sholotjena dze nzi batole nlume ihwoyo banlobe.

¹⁹Ban'dane shekele dze siliva dzili zana ngono baape tate be mwanadi ngekuti watjinya zina le phandala ye Iziraela, ngono abe nkadzi uwe asitongo ntata butjilo gugwe gose.

²⁰Koga akuli malebeswa kuti zwilakidzo zwe buphandala azwizowang'wa mu mwanadi,

²¹ipapo bazhise mwanadi iwoyo kuzhe pa nkoba we ng'umba ya tate babe ngono balume be nzi iwoyo bankikithidze nge mabgwe afe ngoti wakathama bulengwe mu Iziraela nge bufukula mu ng'umba ya tate babe, ndizo muduse mbipo pakati kwenyu.

²²“Ha nlume angawangwa alilele ne nkadzi we mmwe nlume, bubili gwabo bakafanilo fa bose, nlume iwoyo walala ne nkadzi ne nkadzi iwoyo, ndizo muduse mbipo mu Iziraela.

²³“Ha kuna phandala yakabigilidzigwa ndobolo, ngono nlume mmwe ebe eshangana naye mu nzi ebe elala naye,

²⁴ipapo mubadusile kuzhe kwe nkoba we nzi ngono mubakikithidze nge mabgwe bafe ngoti mwanadi nenguba abe ali mu nzi aazomimila eshaka bhatsho, nlume iye watjinya nkadzi we mbakidzani naye ndizo muduse mbipo pakati kwenyu.”

²⁵“Koga akuli kuzhe mu shango nlume ebe eshangana ne mwanadi wakabigilidzigwa ndobolo ngono nlume iwoyo ebe embata en'dzula, ipapo nlume ega iwoyu wan'dzula abulawe.

²⁶Koga mwanadi musitongo nti tjimwe, mu mwanadi akuna tjibiibi tjinontilika shamu ye lufu ngoti ndebo iyeyi inonga ye nlume emukila mbakidzani ebe embulaya,

²⁷ngoti washangana naye kuzhe mu shango, ngono nenguba mwanadi akamimila eshaka bhatsho kwakabe kusina mmwe ungan'gwila.

²⁸“Ha nlume angashangana ne mwanadi usakabigilidziwa ebe en'dzula ngono bebe bewang'wa,

²⁹ipapo nlume wan'dzula ape tate be mwanadi shekele dze siliva dzili makumi ali mashanu (50) ngono mwanadi abe nkadzi uwe ngoti wantjinya, asitongo thubukana naye butjilo gugwe gose.

³⁰“Nlume asitongo tola nkadzi wa tate babe kene kuli kufumula nkadzi wa tate babe.