Read Kalanga Matama 24 Bible Online

Matama 24 - Kalanga bible

Matama 24

¹“Ha nlume etola nkadzi enlobola ngono shule ebe ewana asingatjan'de ngoti awana tjimwe tjisiitjo mu nli tjaasinga shake, ngono ebe enkwalila lukwalo gwe kunlamba ebe empa igo entata mu ng'umba iye, iye ebe ebhuda mu ng'umba eyenda.

²Ngono ha angayenda ebe elobogwa nge mmwe nlume,

³nlume we bubili ebe asingan'de enkwalila lukwalo gwe kunlamba ebe empa igo entata mu ng'umba iye kene nlume iwoyu we bubili anlobola ebe efa,

⁴ipapo nlume uwe we kutanga iwoyu wakantata asitongo ntola kunlobola kakale kube nkadzi uwe shule kwe atemapadziwa ngoti ikoku koshimisa mbeli kwa Yahwe ngono usitongo zhisa nlandu mu shango yaunopiwa ndi Yahwe Ndzimu uwo kuithuwa.

⁵“Ha nlume atjambo lobola, asitongo bhuda kayenda ku ngwa, asipiwe mmwe nshingo, ngaasununguke abe mu nzi gole ling'ompela ashathise nkadzi uwe waakatola.

⁶“Kusibe ne unotola gwiyilo kene tjibgwana ebhatila tjaadzimiwa munli, ngoti unowobe etola butjilo egubhata.

⁷“Ha nlume angawang'wa ekwiba mmwe we bana ba tate babe, bathu be Iziraela, ngono ha embhata se nlanda kene entengesa, ipapo mbava iyeyo ngayife, ndizo muduse mbipo pakati kwenyu.

⁸“Muyele njele ha munginiligwa nge mapele, muyele njele kuthama kose kwamunowodwiwa nge bapirisiti be Balevi sekwa ndakabalaya, ndizo muyele njele kuthama.

⁹Kumbula Yahwe Ndzimu uwo tjabakathama kuna Miriyamu mu zila sekwa makabe muli mu zila mubhuda ku Egipiti.

¹⁰“Uti uadzima mbakidzani uwo tjimwe, usitongo ngina mu ng'umba iye unotola tjaanokubhatisa mu bumo gwe tjawan'adzima.

¹¹Iwe ume kuzhe ngono nlume waunoadzima unowozhisa kuzhe tjinobhatila tjaadzimiwa kukuli.

¹²Ha ali nshayi usitongo lala ne tjaakubhatisa,

¹³zhuba liti limila ubgwilize kunli tjaakubhatisa kuti alale akafuka ngono akukombolele ngono kowobe ndulamo kukuli mbeli kwa Yahwe Ndzimu uwo.

¹⁴“Usitongo tshambilidza nlanda wakatapiwa ali nshayi kakale esheta, ali mmwe we bana ba tate babo kene ali mmwe we balubili bamu shango yenyu mu mizi yenyu.

¹⁵Umpe tjaakatapigwa tjibaka tjakalingisana zhuba lisathu likangina ngoti nshayi wakabiga moyo uwe mutjili asitongo dwa elilila kuna Yahwe nge kuko ngono kube kube tjibi kukuli.”

¹⁶“Botate basitongo bulaigwa bana babo kene bana bebulaigwa botate babo, mmwe ne mmwe ngaabulaigwe tjibi tjitje.”

¹⁷“Musitongo leyanya tjakatambunukila nlubili kene siyang'wa, kene kuli kutola tjiambalo tje tjilikadzi.

¹⁸Koga ukumbule kuti wakabe uli nlanda mu Egipiti ngono Yahwe Ndzimu uwo ukakudzutunula kudwa ikoko, ndizo ndokulaya kuthama ikoku.

¹⁹“Uti uvuna zwivuno mu minda iyo, ngono ube ukangang'wa mbumba mu nnda usibgwilile kuwutola, unowobe we nlubili kene siyang'wa kene tjilikadzi kuyita kuti Yahwe Ndzimu uwo bakukombolele mu mishingo yose ye maboko awo.

²⁰Uti upula mitoba iyo usibgwilulule thabi kakale, kwasala kowobe kwe nlubili ne siyang'wa ne tjilikadzi.

²¹Ha utjela zhambi mu mizhambi iyo, usitongo ibgwilulula utjela kakale shule, kwasala kowobe kwe nlubili ne siyang'wa ne tjilikadzi.

²²Ukumbule kuti wakabe uli nlanda mu Egipiti, ndizo wali ndimulaya kuthama ikoku.”