Read Kalanga Matama 25 Bible Online

Matama 25 - Kalanga bible

Matama 25

¹“Ha kuna kunyanyayidzana pakati kwe balume ngono bebe bezha ku lubazhe, basumikilisi bebe bebasumikilisa besunungula usina nlandu betilika wathama nlandu nlandu uwe,

²ipapo nlume una nlandu ha kwakalingisana kuti alobgwe, nsumikilisi athame kuti akhwathe alobgwe aliyapo shamu dzakalizana nlandu uwe.

³Alobgwe shamu dzili makumi ali manna (40) koga dzisitongo pinda. Ha angalobgwa shamu dzinopinda idzedzi mwana wa tate benyu unowobe alengudzika mu mesho enyu.”

⁴“Musitongo sunga nlomo we ngabe inoshokola mathunde enyu.”

⁵“Ha bana be nthu begala bose ngono mmwe wabo ebe efa asina nkololo, nkadzi we nfi asitongo lobogwa kuzhe kwe nsha nge ntaya, mwana wa tate babe ngaan'gale thaka abe nkadzi uwe athame nshingo we mwana wa tate babe.

⁶Ngono nkololo we kutanga nge nkadzi uwoyu unowotola zina le mwana wa tate babe wakatjinyika kuti zina lile lisife mu Iziraela.

⁷Ngono ha nlume iwoyo asingashake kulobola nkadzi we mwana wa tate babe, ipapo nkadzi we mwana wa tate babe ayende ku nkoba we nzi ku sholotjena adzidwe ati, ‘Mwana wa tate be nlume wangu aadi kudwilidza zina le mwana wa tate babe mu Iziraela, aatowoshinga nshingo we mwana wa tate be nlume wangu kundili.’

⁸Ipapo sholotjena dze nzi banowon'dana bebe belebeleka naye ngono ha edwilila elamba eti, ‘Anditoyemula kuntola.’

⁹Ipapo nkadzi we mwana wa tate babe ayende kunli sholotjena dziliyapo abe embula khwebana dzidze mu makumbo, abe enthwila mate mu buso ngono eshandula eti, ‘Ndiko ikoku kunowothamiwa mu nlume usingabake ng'umba ye mwana wa tate babe.’

¹⁰Zina le nsha uwo mu Iziraela lowodang'wa kuyi, ‘Nsha we wakaambugwa khwebana.’ ”

¹¹“Ha nlume egwa ne mmwe nlume ngono nkadzi we mmwe wabo ebe esedzela pejo kubhatsha nlume uwe mu maboko eunonloba ngono ebe etambunudza luboko gugwe embhata mbeli,

¹²ipapo muthubule luboko gugwe, musitongobe ne ngoni.”

¹³“Usitongobe ne zwilizanyo zwinolizanya bulemo zwili zwibili mu hwomo iyo, tjilizanyo tjikulu ne tjitukununu.

¹⁴Usitongobe ne zwilizanyo zwinoyela zwe mbumbiko mbili mu ng'umba iyo, tjikulu ne tjitukunu.

¹⁵Ube ne tjilizanyo tje bulemo tjizhele tjakatambunuka ne tjilizanyo tjinoyela tjizhele tjakatambunuka, ikoku kowoyita kuti mazhuba awo abe manjinji mu shango yaunopiwa ndi Yahwe Ndzimu uwo.

¹⁶Ngoti bose banothama zwithu zwakajali, bose banoshingisa bupitipiti banoshimisa kuna Yahwe Ndzimu uwo.

¹⁷“Kumbulani Baamaleki tjabakamuthama muli mu zila mudwa ku Egipiti,

¹⁸sekwa bakamunginilila muli mu zila pamakabe manyala mutimbama, bakathubula bose shule kwenyu bakabe bezwikweba bali shule kwenyu ngono basingatje Ndzimu.

¹⁹Ndizo wali kuti Yahwe Ndzimu uwo bakupa kunyaluluka mu zwita zwenyu zose zwakakupoteleka mu shango Yahwe Ndzimu uwo yabanokupa kube thaka iyo kuithuwa, ubukushe ikumbuludzo tjinokumbudza zina le Baamaleki pasi kwe kudzimu, usitongo kangang'wa.