Read Kalanga Matama 26 Bible Online

Matama 26 - Kalanga bible

Matama 26

¹“Uti ungina mu shango yaunopiwa ndi Yahwe Ndzimu uwo kube thaka iyo ngono waitola yabe iyo ugala muili,

²utole zwimwe zwe zwitshwa zwe mitjelo ye zwidwa mu mavu zwawavuna mu shango iyo yaunopiwa ndi Yahwe Ndzimu uwo, uzwilonge mu seme ngono uyende ku bugalo gunowoshalugwa ndi Yahwe Ndzimu uwo kuthama zina labo kuti ligale ko.

³Ngono uyende ku mpirisiti wakabhata nshingo mu tjibaka itjetjo un'dwe uti, ‘Ndoleba nasi mu zhuba lino kuna Yahwe Ndzimu kuti ndaswika mu shango Yahwe yabatuna kuna bobatategulu bedu kuitipa.’

⁴Ipapo mpirisiti unowotola seme mu luboko gugwe ebe eibiga pasi mbeli kwe tjibeso tjinopisigwa zwibhayilo tja Yahwe Ndzimu uwo.

⁵“Ngono ube ulebeleka mbeli kwa Yahwe Ndzimu uwo uti, ‘Tate bangu bakabe bali N'aramu wakabe eyendayenda, ngono bakayenda ku Egipiti bakalubila ikoko, bali bashomanana, ngono ikoko bakabe ludzi lukulu gwakasima gunozibika.

⁶Ngono Baegipiti bakatibhata nge moyo nkukutu, bakatidziyidza bakatitilika busungwa gwakasima.

⁷Ipapo tikalilila kuna Yahwe Ndzimu wa bobatategulu bedu, ngono Yahwe bakahwa hwi ledu kakale bakabona kudziyidzika kwedu ne kushinga kunolema ne kutshambilidziwa kwedu.

⁸Ndizo Yahwe bakatidusa mu Egipiti nge tjiazha tjakasima nge luboko gwakatambunuka ne kutjisa kukulu nenge matjenamiso,

⁹ngono bakatizhisa mu magalo iyawa bebe betipa shango iyeyi, shango inowunga nkaka ne butji.

¹⁰Ngono bonani, ngwenu ndazhisa zwitshwa zwe zwizwalo zwe mavu zwamakandipa imwi Yahwe.’ Ngono unowozwibiga pasi mbeli kwa Yahwe Ndzimu uwo, ube unamata mbeli kwa Yahwe Ndzimu uwo.

¹¹Ngono ushathe ne be nsha uwo muna zose zwakanaka zwawakapiwa ndi Yahwe Ndzimu uwo, iwe ne Nlevi ne nlubili upakati kwenyu.

¹²“Uti wapedza kudusa tjebugumi tjose tje zwawakavuna mu gole le butatu, gole lekudusa tjebugumi, utjipa Nlevi ne nlubili ne siyang'wa ne tjilikadzi kuti baje bagute mu mizi uwo.

¹³Ipapo ube uti mbeli kwa Yahwe Ndzimu uwo, ‘Ndadusa tjakayengemala mu ng'umba yangu ngono kakale ndatjipa Nlevi ne nlubili ne siyang'wa ne tjilikadzi kuyendidzana ne nlayo wenyu wamakandipa, akuna mmwe we milayo yenyu wandatjuluka kene kuli kukangang'wa.

¹⁴Andizotongo ja tjebugumi pandakabe ndili mu tjililo kene kuli kudusa tjimwe tjatjo pandakabe ndakatemapala kene dusila tjimwe tjatjo bafi, ndakahwa hwi la Yahwe Ndzimu wangu, ndathama kunoyendidzana na kose kwamakandidwa.

¹⁵Lingani pasi kudwa mu bugalo gwakayengemala, kudwa kudzimu, ngono mukombolele bathu benyu Baiziraela na pasi pamakatipa koga sekwa makatuna kuna bobatategulu bedu, shango inowunga nkaka ne butji.’

¹⁶“Mu zhuba ileli Yahwe Ndzimu banokudwa kuti ushingikadze milayo iyeyi, ndizo uyele njele kuyishinga nge moyo uwo wose nenge meya iyo yose.

¹⁷Waleba nasi mu zhuba ileli ngekwa Yahwe kuti Ndzimu uwo nekuti kakale unowoyenda mu zila dzabo unowolondolodza milayo yabo uhwilila hwi labo.

¹⁸Ngono Yahwe baleba mu zhuba lino nge kwenyu kuti mu bathu bawo, thaka yabo, sekwa bakamugadzabgwe nenge kuti mulondolodze milayo yabo yose.

¹⁹Banowomukudza bakamubiga pezhugwi kwe njudzi dzose dzabakathama, mutetiwe, muzibike mukudziwe nenge kuti mowobe bathu bakayengemala kuna Yahwe Ndzimu wenyu sekwa bakaleba.