Read Kalanga Matama 27 Bible Online

Matama 27 - Kalanga bible

Matama 27

¹“Ipapo Mushe ne sholotjena bakalaya bathu beti, ‘Londolodzani nlayo wose wandinomupa nasi zhuba lino.

²Ngono mu zhuba lamunotjuluka Jorodani mungina mu shango Yahwe Ndzimu wenyu yabanomupa mugadzike mabgwe makulukulu mube muapharela nge mpharelo,

³ngono mube mukwala pezhugwi kwawo matama wose e nlayo iwoyu pamunowobe mutjuluka kungina shango yamunopiwa ndi Yahwe Ndzimu wenyu, shango inowunga nkaka ne butji sekwa kati Yahwe Ndzimu wa bobatategulu benyu bakamugadzabgwe.

⁴Ngono muti matjuluka Jorodani, mugadzike mabgwe iyawa andinomulaya nge kwawo nasi zhuba lino pezhugwi kwe Dombo le Ebali ngono muapharele nge mpharelo.

⁵Ngono mubakile Yahwe Ndzimu wenyu tjibeso tjinopisigwa zwibhayilo, tjibeso tje mabgwe, musitongoshingisa zwishingisiwa zwe butale muali.

⁶Mubakile Yahwe Ndzimu wenyu tjibeso tjinopisigwa zwibhayilo nge mabgwe asakabezhiwa ngono mupisile Yahwe Ndzimu wenyu zwibhayilo zwinopisiwa mu tjili.

⁷Muduse zwibhayilo zwe mbakisano muzwijile ikweno, ngono mushathe mbeli kwa Yahwe Ndzimu wenyu.

⁸Mukwale mu mabgwe matama wose e nlayo iwoyu kunoboneka.’ ”

⁹Ipapo Mushe ne bapirisiti be Balevi bakabe beti ku Baiziraela bose, “Nyalalani muhwe imwi Baiziraela, zhuba lino mabe bathu ba Yahwe Ndzimu wenyu.

¹⁰Ndizo wali muhwe hwi la Yahwe Ndzimu wenyu mulondolodze milayo yabo iyeyi yandinomupa nasi lino zhuba.”

¹¹Ngono Mushe kalaya bathu zhuba ilelo eti,

¹²“Muti matjuluka Jorodani, aba bame pezhugwi kwe Dombo le Gerizimu kukombolela bathu, Simiyoni na Levi na Juda na Isakari na Josefa na Bhenjamini.

¹³Ngono aba banowoma pezhugwi kwe Dombo le Ebali beleba bhiso; Rubheni na Gadi na Asheri na Zebuluni na Dani na Nafutali.

¹⁴Balevi banowolebeleka ne bathu bose be Iziraela nge hwi lipezhugwi beti,

¹⁵“ ‘Kuna bhiso nlume unothama ndzimu we ifano tjakabezhiwa kene tjakabumbiwa, kuthu kunoshimisa kuna Yahwe, tjithu tjakathamiwa nge maboko e mbezhi ebe etjigadzika pakasumbikika.’ Ngono bathu bose badabile beti, ‘Ngakujalo.’

¹⁶“ ‘Kuna bhiso iye usingakudze tate babe na mmeyabe.’ Ngono bathu bose babe beti, ‘Ngakujalo.’

¹⁷“ ‘Kuna bhiso iye unodusa n'gathu we mbakidzani uwe.’ Ngono bathu bose babe beti, ‘Ngakujalo.’ ”

¹⁸“ ‘Kuna bhiso iye unotungamilila bhofu ntome mu zila.’ Ngono bathu bose babe beti, ‘Ngakujalo.’ ”

¹⁹“ ‘Kuna bhiso iye unoleyesa nlubili kene siyang'wa kene tjilikadzi tjakanlingisana.’ Ngono bathu bose babe beti, ‘Ngakujalo.’ ”

²⁰“ ‘Kuna bhiso iye unolala ne nkadzi wa tate babe ngoti wafumula nkadzi wa tate babe.’ Ngono bathu bose babe beti, ‘Ngakujalo.’

²¹“ ‘Kuna bhiso iye unolala ne phuka kene ili yakatini.’ Ngono bathu bose babe beti, ‘Ngakujalo.’

²²“ ‘Kuna bhiso iye unolala ne hazwadzi iye, ali nkololokadzi wa tate babe kene wa mmeyabe.’ Ngono bathu bose babe beti, ‘Ngakujalo.’

²³“ ‘Kuna bhiso iye unolala na mezwale babe.’ Ngono bathu bose babe beti, ‘Ngakujalo.’

²⁴“ ‘Kuna bhiso iye unobulaya mbakidzani uwe nge kwakasumbikala.’ Ngono bathu bose babe beti, ‘Ngakujalo.’

²⁵“ ‘Kuna bhiso iye unoamutjila tjizwimbanlomo kubulaya nthu usina nlandu.’ Ngono bathu bose babe beti, ‘Ngakujalo.’

²⁶“ ‘Kuna bhiso iye usinga lumbidze matama e nlayo iwoyu nge kuashinga.’ Ngono bathu bose babe beti, ‘Ngakujalo.’