Read Kalanga Matama 29 Bible Online

Matama 29 - Kalanga bible

Matama 29

¹“Awa matama e tjidumano Yahwe abakadwa Mushe kutjithama ne bathu be Iziraela mu shango ye Moabu pezhugwi kwe tjidumano tjabakathama nabo pa Horebu.”

²“Mushe kadana Baiziraela bose kabe eti kubali, ‘Makabona kose ikoku Yahwe kwabakathama mu mesho enyu mu shango ye Egipiti, tjabakathama muna Faro ne mu balanda babe bose ne mu shango iye yose,

³makabona ndiko hwuluhwulu nge mesho enyu ne zwilakidzo ne makaabadzo makulu.

⁴Koga kuswika mu zhuba lino Yahwe abazomupa nkumbulo kuhwisisa kene mesho kubona kene zebe kuhwa.

⁵Ndakamutungamila makole ali makumi manna (40) mu tjilambanyika, zwiambalo zwenyu azwithu zwikashakala makazwimbala ne khwebana dzenyu adzithu dzikashakala mu makumbo enyu.

⁶Amuzotongoja tjiwunga, amuzotongong'wa nkumbi we zhambi kene busukwa kuti muzibe kuti ndimi Yahwe Ndzimu wenyu.

⁷Ngono makati muswika mu bugalo igogu, Sihoni mambo we Heshibhoni na Ogi mambo we Bhashani bakabhuda kubhayana namwi koga tikabakunda,

⁸tikatola shango yabo tikayipa Barubheni ne Bagadi ne gwamu le ludzi gwa Manase.

⁹Ndizo wali mube ne njele kushinga tjimu matama e tjidumano itjetji kuyita kuti muwatshike mu tjimwe ne tjimwe tjamunoshinga.’ ”

¹⁰Mu zhuba lino mumile mbeli kwa Yahwe Ndzimu wenyu, imwi misholo ye njudzi ne sholotjena dzenyu ne makulukota ne balume bose be Iziraela

¹¹ne bana benyu batukununu ne bakadzi benyu ne balubili benyu bamu bukotokelo gwenyu bose banomushakila hwuni ne banomutjelela vula,

¹²kuti mungine mu tjidumano tja Yahwe Ndzimu wenyu itjo Yahwe Ndzimu wenyu tjabanothama namwi mu zhuba lino

¹³kuti bamuthumbidze mu zhuba lino se bathu bawo ngono kuti babe Ndzimu wenyu sekwa bakamugadzabgwe na sekwa bakatuna kuna bobatategulu benyu, kuna Abhurahama na Isaki ne kuna Jakubo.

¹⁴Ate muli imwi moga bandinothama tjidumano nabo,

¹⁵koga ndotjithama naiyebo usinaswi pano mu zhuba lino kufanana ne umile naswi pano mu zhuba ileli mbeli kwa Yahwe Ndzimu wedu.

¹⁶“Moziba sekwa takagala mu Egipiti, nenge sekwa takazha tipalama njudzi dzamakapinda.

¹⁷Ngono makabona zwithu zwabo zwinoshimika, midzimu yabo ye zwifano ye lukuni ne ye mabgwe ne ye siliva ne golide yakabe ili pakati kwabo.

¹⁸Yelani njele kuti pakati kwenyu kusibe kuna nlume kene nkadzi kene nsha kene ludzi guna moyo unoshandukila Yahwe Ndzimu wenyu nasi mu zhuba lino kuyenda kunoshingila midzimu ye njudzi idzedzo, kuti kusitongobe ne n'dzi unozwala bushungu ne ntjelo unobaba,

¹⁹mmwe unowoti ehwa matama e tjidumano itjetji, ebe ezwikombolela mu moyo uwe eti, ‘Ndowotjila nenguba nditjila nge kukutadza moyo wangu.’ Ikoku kowodana golomodzo le panyolo ne pakawoma nge kunofanana.

²⁰Yahwe abangan'zwiibhatigwe koga bushongola gwa Yahwe ne fupa labo zowothutila nthu iwoyo ngono bhiso lakakwagwa mu lukwalo igogu lowomuwila ngono Yahwe banowobukusha zina lile pasi kwe kudzimu.

²¹Ngono Yahwe banowon'dusa mu njudzi dzose dze Iziraela kuwigwa nge mbatsha kuyendidzana ne bhiso lose le tjidumano lakakwagwa mu lukwalo igogu gwe nlayo.

²²Ngono tjizekugwana tjinozha, bana benyu banowozha shule kwenyu ne ntaya unodwa mu shango ikule banowoti ha bebona kudziyila kwe shango ne kugwala Yahwe kwabakayithama kuti igwale.

²³Shango yose ili zhele sibabuli ne mwenyu ne malala akatshwa isakadzwagwa, kusina tjinomela, pasina bushwa gungathinila, kuthukudzika kunonga kwe Sodoma ne Gomora ne Adima ne Zeboyimi yakakolomodziwa ndi Yahwe mu kugwadzamoyo kwabo.

²⁴Ngono njudzi dzose dzowoti, ‘Ini Yahwe bakathama saikoku mu shango iyeyi? Kupisa ikoku kwe bushongola gwabo kodwani?’

²⁵Ngono ipapo bathu banowoti, ‘Hwuti bakasiya tjidumano tja Yahwe Ndzimu wa bobatategulu babo tjabakathama nabo pabakabadusa mu shango ye Egipiti,

²⁶ngono bakayenda bakanoshingila mimwe midzimu ngono bakayinamata, midzimu yabasakatongo ziba, yabasakapiwa ndi Yahwe.

²⁷Ndizo wali bushongola gwa Yahwe gwakawila shango iyeyi, bezhisa bhiso lose lakakwagwa mu lukwalo igogu.

²⁸Yahwe bakabadzikunula mu shango yabo mu kugwadzamoyo ne bushongola bukulu bebalashila mu imwe shango sekwa kuli iko mu zhuba lino.’

²⁹“Zwithu zwakasumbikala ngezwa Yahwe Ndzimu wedu, koga zwithu zwakazumbunugwa nge zwedu ne bana bedu nge kusingapele kuti tishinge tjimu matama wose e nlayo iwoyu.”