Read Kalanga Matama 3 Bible Online

Matama 3 - Kalanga bible

Matama 3

¹“Kudwa ipapo tikashanduka tikalinga ku Bhashani ngono Ogi mambo we Bhashani kabhuda kubhayana naswi, iye ne bathu babe bose kugwa naswi pa Edireyi

²Koga Yahwe bakati kundili, ‘Usintje ngoti ndakupa iye ne bathu babe bose ne shango iye. Unthamile sekwawakathamila Sihoni mambo we Baamori bakabe begala ku Heshibhoni.’

³Ndizo Yahwe Ndzimu wedu balonga Ogi naiyebo mambo we Bhashani ne bathu babe bose mu maboko edu ngono tikababulaya kudzina kusala kusina unotjila.

⁴Ngono tikatola mizi iye mikulu yose mu tjibaka itjetjo, akuna nzi wakasala watisakatola mu bali, mizi mikulu ili makumi ali kutathatu (60), ntuthu wose we Arigobi, shango yose ya Ogi yaakabe ebusa mu Bhashani.

⁵Yose iyeyi yakabe ili mizi mikulu ye matizhilo yakasima, ina makuma malefulefu ne mazhalilo ne makwasayile kuzhe kwe mizi minjinji yakabe isakabakiligwa.

⁶Ngono takabalobesa tjoselele sekwatakathamila Sihoni mambo we Heshibhoni tikolomodza nzi mmwe ne mwe ne balume ne bakadzi kose ne bana.

⁷Koga ng'ombe dzose ne thundu ye mizi mikulu takazwitapa.

⁸Ndizo tikatola shango mu tjibaka itjetjo mu maboko a bomambo ibaba babili be Baamori bakabe bali seli kwe Jorodani kudwa pa lukoba gwe Arinoni kunoti ku Dombo le Hemoni.

⁹(Basidoni banodana Hemoni beti Siriyoni, koga Baamori banolidana beti Seniri).

¹⁰Takatola mizi yose ye lubala gwakamilika ne Giliyadi ne Bhashani yose bukule kuyenda kunoti ku Saleka ne Edireyi, mizi mikulu ye mbuso wa Ogi mu Bhashani.

¹¹(Ngoti Ogi yega mambo we Bhashani ndiye wakabe asala we malimbelimbe e Barefaimu. Bulawo gugwe gwakabe gwakathamiwa nge butale, gutjimu Rabha nzi nkulu we Baamoni.) Bulefu gwago guli thambo dzili zhanalume, bupabi guli thambo dzili nna kuyendidzana nge kubala kwa ngwenu.

¹²“Takati titola shango iyeyi kube yedu mu tjibaka itjetjo, ndakapa Barubheni ne Bagadi ntuthu kutangisa pa Aroeri umu tjekelo dze lukoba gwe Arinoni ne gwamu le shango ye matuthu ye Giliyadi ne mizi mikulu yayo.

¹³Kose kwakasala kwe Giliyadi ne Bhashani yose kwakabe kubusa Ogi, kodwa kuti ntuthu wose we Arigobi ndakakupa gwamu le ludzi gwa Manase. (Bhashani yose inodang'wa shango ye Barefaimu.

¹⁴Jairi wa Manase wakatola ntuthu wose we Arigobi, kodwa kuti Bhashani bukule kunoti ku n'gathu we Bageshuri ne Baakati ngono kadana mizi iyeyo nge zina lile eti Havotijairi sekwakuliiko kuswikila mu zhuba ileli.)

¹⁵Makiri ndakampa Giliyadi.

¹⁶Barubheni ne Bagadi ndakabapa ntuthu unodwa pa Giliyadi kuyenda bukule gunoti ku lukoba gwe Arinoni, n'gathu uli pakati kwe gwizi, kuyenda bukule kunoti ku lukoba gwe Jabhoki n'gathu we Baamoni.

¹⁷Araba ne Jorodani uli n'gathu kudwa mu Khinereti kuyenda bukule kunoti ku Gungwa le Araba ne Gungwa le Mwenyu kusi kwe panotathila pe Dombo le Pisiga ku bhezhuba.”

¹⁸“Ngono ndakamudwa mu tjibaka itjetjo ati, ‘Yahwe Ndzimu wenyu bamupa shango iyeyi kube yenyu. Koga benyu balume bakasimila ngwa banowotjulukila seli bakatungamila zwikamu zwenyu Baiziraela bakashakatila zwibhayano.

¹⁹Koga bakadzi benyu ne bana benyu ne zwithuwo zwenyu (Ndoziba kuti muna zwithuwo zwinjinji) banowosala mu mizi mikulu yandakamupa

²⁰kuswikila Yahwe bepa zwikamu zwenyu kunyaluluka sekwabamupa, ngono nayibo batole shango yabanopiwa ndi Yahwe Ndzimu wenyu seli kwe Jorodani. Ipapo mowoshanduka mwe ne mmwe eyenda ku gobe lile landampa.’ ”

²¹Ngono ndakadwa Joshuwa mu tjibaka itjetjo ati, “Wakabona kose Yahwe Ndzimu uwo tjabakashingila bomambo ibaba babili, ndiko Yahwe kwabanowothamila mibuso yose yamunoyenda kuyili.

²²Musitongobatja ngoti Yahwe Ndzimu wenyu ndibo banomugwila.”

²³“Ngono ndakakumbila Yahwe mu tjibaka itjetjo ati,

²⁴She Yahwe, imwi matangisa kulakidza nlanda wenyu bukulu gwenyu ne tjiazha tjenyu tjina masimba. Ngoti ndzimu upi kudzimu kene mu shango ungathama mishingo inonga yenyu kene?

²⁵Mundiletje nditjulukile seli, ndomukumbila, ndibone shango mbuya seli kwe Jorodani, shango iyeyo mbuya ye matuthu ne Lebanoni.”

²⁶Koga Yahwe bakabe bandigwadzila moyo ngekwenyu ngono bakasitongo ndihwilila. Ngono Yahwe bakabe beti kundili, “Kwalizana, usilebe ngekwa ikoku kundili kakale.

²⁷Tathila pezhugwi kwe Pisiga umilidze mesho ulinge ku golombedzo ne ku bunandzwa ne ku burwa ne ku bhezhuba ulinge uyibone nge mesho awo, ngoti iwe awutowotjuluka.

²⁸Koga ulaye Joshuwa unkulumbidze unsimise ngoti unowotjulukila seli akatungamila bathu ibaba, ngono unothama bathu ibaba kuti bathuwe shango iyeyi yaunowobona”

²⁹Ndizo takagala mu nkuku kwakabambana ne Bhethipeori.