Read Kalanga Matama 31 Bible Online

Matama 31 - Kalanga bible

Matama 31

¹“Ndizo Mushe kadwilila eleba matama iyawa ku Baiziraela bose.

²Ngono kabadwa kati, ‘Ndabe ne makole ali zana lina makole ali makumi mabili (120) nasi mu zhuba lino, anditjatubula kuyenda yeno na yeno.’ Yahwe bakati kundili, ‘Iwe awutowotjuluka Jorodani.’

³Yahwe Ndzimu wenyu ibo tjekwabo banowomutungamila ha mutjuluka, banowolobesa njudzi idzedzi mbeli kwenyu, kuti ndizo mudzitolele shango yadzo, ngono Joshuwa unowotjuluka akamutungamila Yahwe sekwa baleba.

⁴Ngono Yahwe banowobathama sekwa bakathama Sihoni na Ogi, bomambo be Baamori ne shango yabo pabakabalobesa.

⁵Yahwe banowobalonga mu maboko enyu ngono mowobathama kuyendidzana ne nlayo wandakamupa.

⁶Simani mube ne tjilopa, musitongotja kene mukalobgwa nge hana nge kwabo, ngoti Yahwe Ndzimu wenyu ndibo banoyenda namwi abangathame kuti mukong'we, abangamusiye.”

⁷“Ipapo Mushe kadana Joshuwa ebe eti kunli mu mesho e Baiziraela bose, ‘Sima ube ne tjilopa, ngoti unowoyenda ne bathu ibaba ku shango Yahwe yabakatuna kuna bobatategulu babo kubapa iyo ngono uthame kuti bayitole.

⁸Yahwe ndibo banowomutungamila, banowobe nawe, abanga kulashe kene kuli kukusiya, usitje kene kuli kutemeka mafupa.’ ”

⁹“Ngono Mushe kakwala nlayo iwoyu ngono kawupa bapirisiti, bakololo ba Levi bakabe bakasenga Bhokisi le Tjidumano tja Yahwe ne sholotjena dzose dze Iziraela.”

¹⁰Ipapo Mushe kabalaya eti, “Kubupelo gwe makole mamwe ne mamwe mu tjibaka tjakabigwa tje gole le kusununguka, ku Nzano we Mishasha,

¹¹Baiziraela bose pabanobe bezha mbeli kwa Yahwe Ndzimu wenyu pa bugalo gwabanowobe bashalula, iwe ubale nlayo iwoyu mbeli kwe Baiziraela bose bakahwilila.

¹²Ukubunganye bathu, balume ne bakadzi ne bana ne balubili bamu mizi yenyu kuyita kuti bahwe bazwidiye kutja Yahwe Ndzimu wenyu ne kube ne njele kushinga tjimu matama e nlayo iwoyu,

¹³ne kuti bana babo basakatongo uziba bahwe ngono bazwidiye kutja Yahwe Ndzimu wenyu sayikoko ha mutjibapenyu mu shango yamunotjuluka Jorodani kuyithama yenyu.”

¹⁴Ngono Yahwe bakati kuna Mushe, “Bona mazhuba anosedzela pawakafanila kufa, dana Joshuwa muzhe mu nshasha we bushanganilo kuti ndintume.” Ngono Mushe na Joshuwa bakayenda bakanongina mu nshasha we bushanganilo.

¹⁵Ngono Yahwe bakaboneka mu nshasha bali mu gole, gole likama pa nkoba we nshasha.

¹⁶Ngono Yahwe bakati kuna Mushe, “Bona, wabe pejo nge kulala na bobatategulu babo, ngono bathu ibaba banowomilika bakathama bufukula betebela midzimu ipoga ye shango iyeyi kwabanoyenda kunobe pakati kwabo, ngono banowondifupatila bakatjinya tjidumano tjangu tjandakathama nabo.

¹⁷Ipapo bushongola gwangu gowobamukila mu zhuba ilelo, ngono ndowobasiya abasumbikila buso gwangu, ngono banowolobesiwa ne zwinjinji zwakabipa ne zwinodziyidza zowobawila, ndizo banowoti mu zhuba ilelo, ‘Apa zwibiibi izwezwi azwitotiwila ngoti Ndzimu wedu awupo pakati kwedu kene?’

¹⁸Ngono nge malebeswa ndowosumbika buso gwangu mu zhuba ilelo ngekwe bubi gwabanowobe begushinga, ngoti bashandukila ku midzimu mimwe.

¹⁹Ndizo wali ngwenu kwala lumbo igogu, ugudiye bathu be Iziraela, ugulonge mu milomo yabo, kuti lumbo igogu gube butendeki gwangu kulingisana ne bathu be Iziraela.

²⁰Ngoti ndowoti ndabalonga mu shango inowunga nkaka ne butji iyo yandakagadzabgwe bobatategulu babo kubapa iyo, ngono bakaja bakaguta bakakola, banowoshandukila ku mimwe midzimu bebe beyishingila bendidadila betjinya tjidumano tjangu.

²¹Ngono kowoti zwakabipa zwinjinji ne zwinodziyidza zwabawila, lumbo igogu gowolingisana nabo se ntendeki, ngoti agungakanganike gukadwa mu milomo ye bana babo. Ndoziba mazwimisilo abanobumba kale ndisathu abalonga mu shango yandakatuna kubapa.”

²²Ndizo Mushe kakwala lumbo igogu mu zhuba ilelo ngono kagudiya bathu be Iziraela.

²³Ngono Yahwe bakalaya Joshuwa nkololo wa Nuni bakati, “Sima ube ne tjilopa unowoyisa bathu be Iziraela ku shango yandakatuna kubapa, ndowobe ndinawe.”

²⁴Kwakati Mushe asinopedza kukwala matama e nlayo iwoyu mu lukwalo kunoti kubupelo,

²⁵Mushe kadwa Balevi bakabe besenga Bhokisi le Tjidumano tja Yahwe kati,

²⁶“Tolani lukwalo igogu gwe nlayo mugubige pawunde ye Bhokisi le Tjidumano tja Yahwe Ndzimu wenyu, kuti kube ipapo kutendeka nge kwenyu.

²⁷Ngoti ndoziba mu bapanduki kakale makawoma misholo kungapani. Bonani, ndatinditjatjila namwi, nasi mapandukila Yahwe, ngono pandinowobe ndafa mowothama kuli kungapani kene!

²⁸Kubunganyilani kundili misholo yose ye njudzi dzenyu ne makulukota, kuti ndilebe matama iyawa mu zebe dzabo ndidane kudzimu ne shango kutendeka nge kwabo.

²⁹Ngoti ndoziba kuti ndowoti ndafa mube muthama zwakabipa, mupambuka mu zila yandakamupa, ngono mu mazhuba ambeli mbipo inowomuwila ngoti mowoshinga tjakabipa mu mesho a Yahwe, mubatanga mubagwadzisa moyo nge mishingo ye maboko enyu.”

³⁰Ipapo Mushe kaleba matama e lumbo igogu kuswikila epelela, elebeleka ne gubungano lose le Iziraela.