Read Kalanga Matama 32 Bible Online

Matama 32 - Kalanga bible

Matama 32

¹“Hwilila iwe kudzimu ngono ndowolebeleka, shango ngayihwe matama e nlomo wangu.

²Kudiya kwangu ngakune se vula, ndebeleko yangu iwe se khawa, se vula inona mu bushwa gutjibutshwa, ne masusu mu mazhani.

³Ngoti ndowoleba zina la Yahwe. Gudzo ulipe Ndzimu.

⁴“Iye i Shongwe, nshingo uwe wakapelela, ngoti zila dzidze dzose dzakatambunuka. Ndzimu we kugagwabgwe usina jinyo, wakatambunuka wakalulwama.

⁵Bakanshingila mbipo, abatji bana babe ngekwe mbipo yabo, ba tjizekugwana tjakaleleka.

⁶Ndiyo zila yaunolipa Yahwe ndiyo iyeyi? Imwi bathu bezwilengwe? Apa ate baliyibo Tate benyu, Mbumbi wenyu, ibo bakamubumba kene?

⁷Kumbulani mazhuba a ntolo, alakana makole e zwizekugwana zwinjinji, bhuzwa tate babo ngono banowokulakidza, bakulu babo, ngono banowokubudza.

⁸Kwakati Upezhugwizhugwi epa njudzi thaka yadzo, paakabe ethubukanya bakololo be balume, wakatjeka migathu ye bathu, kuyendidzana ne mbalo ye bakololo be Ndzimu.

⁹Ngoti gobe la Yahwe bathu babo, Jakubo iye thaka yabo.

¹⁰“Bakan'wana mu tjilambanyika, mu tjilambanyika tjakathukudzika, ngono bakambakilila, bakan'tjengeta, bakan'tjengeta se shanga ye zhisho labo.

¹¹Se dzu lizunguza shaka lalo, liyengelela pezhugwi kwe majindana alo, litambunudza mapapilo alo, liabhata, liasenga na pezhugwi kwe mapapilo alo,

¹²Yahwe boga ndibo bakabatungamila, ngono kwakabe kusina ndzimu wakabe unabo.

¹³Bakabathama kuti batathile ku magalo apezhugwi e shango, ngono bakaja zwakadwa mu minda, bakabathama kuti bang'we butji mu shongwe ne mafuta abo adwe mu shongwe.

¹⁴Mashwe anodwa mu ng'ombe, ne nkaka kudwa mu ngubi, ne mafuta e pkhwizana ne nyundo, ng'ombe dze Bhashani ne mbudzi, ne koroni mbuya kupindisa, ne ntubgwi we zhambi wamunong'wa uli nkumbi.

¹⁵“Koga Jeshuruni kakola, kathulana, wakola, wabe nkodu wamonyoka. Ngono wakafupatila Ndzimu iwo wakanthama, ebe edadila Shongwe ye jidzo lile.

¹⁶Bakabadzonga kuti babe ne fupa ku midzimu mimwe, bakabagwadzisa moyo nge zwiyito zwinoshimika.

¹⁷Bakadusila zwibhayilo madimoni asi midzimu, ku midzimu yabasakatongo ziba, ku midzimu mitshwa yakanginilila ngwenu, bobatategulu benyu yabasakatongoziba.

¹⁸Makadusa Shongwe yakamubumba mu mikumbulo yenyu, mukakangang'wa Ndzimu wakamutshibama.

¹⁹“Yahwe bakakubona ikoku ngono bakabalasha, ngekwe kutanga kwe bakololo ne bakololokadzi babo.

²⁰Ngono bakabe beti, ‘Ndowobasumbikila buso gwangu, ndowobona kuti bhelelo labo ndilipi, ngoti ba tjizekugwana tjakakombama, bana basina kugalikamoyo.

²¹Bakandidzonga kuti ndibe ne fupa ngekwe tjisi ndzimu, banditanga nge midzimu yabo ye zwifano. Nami ndowodzonga fupa la ibabo basi bathu, ndowobatanga ne itjaba tje tjilengwe.

²²Ngoti moto wabhatidziwa nge kugwadzamoyo kwangu, ngono unopisa unginilila kusi kwe shango, ube uja shango ne zwizwalo zwayo, ube ubhatidza moto mu thiwa dze matombo.’

²³“Ngono ndowobutitika mbipo pezhugwi kwabo, ndowoshingisa misebe yangu mubali.

²⁴Banowondesiwa nge bhamba, bakajiwa nge kupisa kukulu, ne bugwele gunolilita, kakale ndowotumila meno e zwibandana kubali, ne bushungu gwe zwithu zwinokambayila mu hwuluba.

²⁵Pakazhuka thumo lowothama bafigwa, ngono mu ng'umba kowobepo kutja, kulobesiwa batjetjana ne phandala, shabana dzinomwa ne sholotjena.”

²⁶Ndingabe ndakati, “Ndowobapaladzila kule, ndowothama kukumbugwa kwabo kupele pakati kwe bathu,

²⁷ha ndakabe ndisatja kudadigwa nge zwita, ngoti zodwa zwihwila ntome, ngoti zwingadwa zwiti, ‘Takunda, Yahwe abazothama kose ikoku.’

²⁸“Ngoti ibo ba ludzi gusina ikumbuludzo, ngono akuna kuhwisisa mu bali.

²⁹Ha bakabe bakatjenjela, bangabe behwisisa ikoku, banobe bebona bhelelo labo!

³⁰Kothamikala tjini kuti ng'ompela atate bali tjiwulu, ne kuthama kuti bali zwiwulu zwili gumi batizhe, kuzhe kwe kuti Shongwe yabo yabatengesa, ngono Yahwe babazwilandula?

³¹Ngoti shongwe yabo ayitonga Shongwe yedu koga zwita zwedu zopedzisa sa ikoku.

³²Ngoti nzhambi wabo unodwa mu nzhambi we Sodoma ne mu minda ye Gomora. Zhambi dzabo dzizhele bushungu, mitjelo yayo inobaba.

³³Nkumbi wabo we zhambi bushungu gwe nyoka, ne bushungu gwakabipa gwe zwipakupaku.

³⁴“Apa ikoku akuzobigwa pandili, akuzozhaliligwa mu matula angu kene?

³⁵Kubgwilizila nge kwangu, ne mbuzilo, mu tjibaka makumbo abo paanosodzoloka, ngoti zhuba le kuwigwa nge mbatsha lasendela, ngono ndashiko yabo inozha nge lubilo.

³⁶Yahwe banowopembedza bathu babo bakabe ne ngoni ku balanda babo, ha bebona kuti simba labo lapela, ngono kusina wasala, nsungwa kene wakasununguka.

³⁷Ipapo banowoti, ‘Midzimu yabo ingayi, shongwe yabakatizhila muili,

³⁸midzimu yakaja mafuta e zwibhayilo zwabo, ing'wa nkumbi we tjibhayilo tjabo tje tjing'o? Ngaimilike imubhatshe, ngayibe mbakililo yenyu!

³⁹“ ‘Bonani ngwenu kuti imi, imi nge kwangu, ndimi iye, ngono akuna ndzimu kuzhe kwangu, ndobulaya abuya atjidza, ndokubadza abuya apodza, ngono akuna ungasunungula tjimu tjiazha tjangu.

⁴⁰Ngoti ndomilidzila tjiazha tjangu kudzimu, ndibe ndituna nditi, se nditjila kusingapele,

⁴¹ha ndikuswa bukanu gwangu gunopenyelela, ngono tjiazha tjangu sumikilisa, ndowobgwilizila zwita zwangu, ndibe ndibuzila ibabo banondibenga.

⁴²Ndowothama kuti misebe yangu ilaladzisiwe nge malopa, ngono bukanu gwangu gowoja nyama ne malopa ebabulawa ne batapiwa, kudwa mu misholo ina mavudzi malefu ye zwita.’

⁴³“Lumbidzani bathu babo, imwi njudzi, ngoti banobgwilizilila malopa e balanda bawo, ngono banobgwilizila zwita zwabo, ngono bakathamila shango ye bathu babo kugadzana.”

⁴⁴Mushe kazha ana Joshuwa nkololo wa Nuni ngono kabala matama wose e lumbo igogu bathu bakahwilila.

⁴⁵Ngono kukati Mushe asinopedza kuleba matama wose iyawa ku Baiziraela bose,

⁴⁶kabadwa kati, “Longani mu moyo matama wose iyawa andinomupa mu zhuba lino, muadiye bana benyu, kuyita kuti babe ne njele kushinga matama wose e nlayo iwoyu.

⁴⁷Ngoti ate ali mazakhwa ku muli, koga butjilo gwenyu, ngoti ndiwo mowotjila tjibaka tjilefu mu shango yamunotjuluka Jorodani kunoyithama yenyu.”

⁴⁸Ngono Yahwe bakadwa Mushe mu zhuba ilelo bakati,

⁴⁹“Tatha dombo ileli le Abarimu, Dombo le Nebo limu shango ye Moabu kulingisana ne Jerikho ngono ubone shango ye Kanana iyo yandinopa bathu be Iziraela kuyi thuwa,

⁵⁰ngono ufile pezhugwi kwe dombo ileli lawunotatha utobele bakanyi kwenyu, sa Aroni nkulu uwo wakafila mu Dombo le Hori ngono katobela bathu bakanyi kwabo,

⁵¹ngoti wakakong'wa kulakidza kugalamoyo mu ndili pakati kwe bathu be Iziraela pa vula dze Meribatikadeshi mu tjilambanyika tje Zini, ngoti awuzonditeta sendakayengemala pakati kwe bathu be Iziraela.

⁵²Ndizo unowobona shango mbeli kuko, koga awutoyingina shango yandinopa bathu be Iziraela.”