Read Kalanga Matama 33 Bible Online

Matama 33 - Kalanga bible

Matama 33

¹Awa makombolelo akati Mushe nlume we Ndzimu kakombolela bana be Iziraela ndiwo asathu kafa.

²Wakati: “Yahwe bakadwa ku Sinai, bakanga kuyedza pezhugwi kwedu kudwa ku Seiri, bakapenya kudwa mu Dombo le Parani, bakazha bedwa kuna bali zwiwulu zwili gumi bakayengemala, bezha ne moto unothuta ku tjiazha tjabo tje luji.

³Ee, bakada bathu babo, bose ibabo bakabe bazwipa mu bali bakabe bali mu tjiazha tjabo, ndizo bakatobela thambo dzenyu, beamutjila ndayo mu muli,

⁴Mushe paakatipa nlayo, kulondolodziwa nge gubungano lose la Jakubo.

⁵Saikoko Yahwe bakabe mambo we Jeshuruni, ha batungamili be bathu bakubungana, ne njudzi dzose dze Iziraela.

⁶“Rubheni ngaatjile, asife, ne bathu babe basibe bashomanana.”

⁷Ngono kaleba woku ngekwa Juda, “Iwani hwi la Juda imwi Yahwe, ngono mumbuze mu bathu babe. Mun'gwile nge zwiazha zwenyu, ngono mube bhatsho kubhayana ne zwita zwizwe.”

⁸Ngono ngekwa Levi kati, “Ipani Levi Thumimi yenyu, ne Urimi yenyu iye unomugalamoyo, wamakalika ku Masa, iye wamakagwisana naye ku vula dze Meriba.

⁹Wakati ngekwa tate babe na mmeyabe, ‘Andina hanya nabo, kazwilandula bakulu babe, kasibe ne njele ne bana babe. Ngoti bakalondolodza dama lenyu, bakabhata tjidumano tjenyu.

¹⁰Banowodiya Jakubo ndayilo dzenyu, bakadiya Iziraela nlayo wenyu, banowopisa motsha mbeli kwenyu, bakapisa tjibhayilo tjizhele mu tjibeso tjenyu tje zwibhayilo.

¹¹Yahwe, kombolelani thundu iye, ngono muamutjile nshingo we maboko awe, lungunulani thunji dze zwita zwizwe, dza ibabo banombenga kuti basitongo milika kakale.’ ”

¹²Ngekwa Bhenjamini kati, “N'diwa wa Yahwe, unogala nge kubakililika pa bali, banombakilila kumpoteleka zhuba lose, bebe bethama bugalo gugwe pakati kwe mathudzi abo.”

¹³Ngono ngekwa Josefa kati, “Shango iye ngayikombolegwe ndi Yahwe, nge zwipo zwakashalugwa zwe kudzimu zhuzhugwi, ne khawa inodwa mu madziba akawala pasi kusikusi,

¹⁴nge mitjelo yakashalugwa ye zhuba, ne zwakakola zwizwalo zwe mimwedzi,

¹⁵ne zwakanaka zwinodwa mu matombo a ntolo, ne matuthu manjinji asingapele

¹⁶ne zwipo zwakanaka kupindisa zwe shango nge buzhalo, nenge ludo gugwe iye ugele mu ishaka. Ikoku ngakuzhe pezhugwi kwe nsholo wa Josefa, na pezhugwi kwe tjiala tje bushe mu nsholo uwe iye she pakati kwe bana batate babe.

¹⁷Mbano ye nkono uwe ina gudzo, ne nyanga dzidze i nyanga dze nyati, ndizo unowobhaya bathu bose koga kunoti ku phelelo dze shango, sa ikoku zwiwulu zwili gumi zwa Ifureimi, sa ikoku zwiwulu zwa Manase.”

¹⁸Ngono ngekwa Zebuluni kati, “Pembela Zebuluni mu kubhuda kuko, nawe Isakari mu mishasha iyo.

¹⁹Banodanila bathu ku dombo labo, ikoko banodusa zwibhayilo zwakalulwama, ngoti banoswipa fumwa ye gungwa, ne fumwa yakasumbikala ye nsetje.”

²⁰Ngekwa Gadi kati, “Kwakakombolegwa iye unotalabudza Gadi! Gadi ugele se shumbalume, unomwawula luboko ne thongoma.

²¹Wakazwishaluligwa shango payakakola, ngoti ikoko ndiko kwakabigwa gobe le ntungamili, ngono wakazha ne batungamili be bathu, unolondolodza milayo ne Iziraela, milayo yakalulwama ya Yahwe.”

²²Ngekwa Dani kati, “Dani ishumbana, inotjuluka kudwa ku Bhashani.”

²³Ngono ngekwa Nafutali kati, “Iwe Nafutali, unogutshika ngodiwa, nenge kuzhala makombolelo a Yahwe, tola gakhwa le burwa.”

²⁴Ngekwa Asheri kati, “Wakakombolegwa kupinda bakololo ngakube Asheri, ngaabe iye unodiwa nge bakulu babe, ngaadubike gumbo lile mu mafuta.

²⁵Zwizhalilo zwizo zowobe zwe butale ne phangula, matatabuko awo aatowopela bupenyu gugo gose.”

²⁶“Aapo unonga Ndzimu iwe Jeshuruni, unotatha epalama kudzimu kuwokubhatsha, ali mu bumambo gugwe epalama mazhuzhugwi.

²⁷Ndzimu unotjila kusingapele ndigo bugalo gugo, ngono kusi kuna maboko agelile tjose. Ngono unobhaya tjita mbeli kuko, ngono ebe eti, ‘Lobesa.’

²⁸Ndizo wali gala mu kubakililika, iwe woga thiwa ya Jakubo, mu shango ye mathunde ne nkumbi we zhambi, ee, kudzimu kukwe kodothedzela khawa pasi.

²⁹Ndiwe wakashatha, iwe Iziraela! Ndiani unonga iwe, nthu wakatjidziwa ndi Yahwe, tjivikili, bhatsho iyo, kakale thumo ye kukunda kuko! Zwita zwizo zowozha zwikuthigamila, ngono iwe unowotshamba magalo azo apezhugwi.”