Read Kalanga Matama 6 Bible Online

Matama 6 - Kalanga bible

Matama 6

¹Eyi ndiyo milayo Yahwe Ndzimu wenyu yabakandidwa kuti ndimudiye iyo kuti muyilondolodze mu shango yamunoyenda kuyitola,

²kuti utje Yahwe Ndzimu uwo, iwe ne nkololo uwo ne zwizekugwana zwizo nge kulondolodza milayo yabo yose mu mazhuba wose butjilo gugo nekuti mazhuba awo apaphidziwe.

³Ndizo wali ihwa iwe Iziraela, ibe ne njele kuyilondolodza kuti kukuyendile zubuyanana ne kuti muwande kwazo Yahwe Ndzimu wa botate benyu sekwa bakamugadzabgwe mu shango inowunga nkaka ne butji.

⁴“Ihwa iwe Iziraela, Yahwe Ndzimu wedu ndi Yahwe bang'ompela,

⁵ngono ude Yahwe Ndzimu uwo nge moyo uwo wose nenge meya iyo yose ne simba lilo lose.

⁶Ngono matama iyawa andinokupa mu zhuba lino agale mu moyo uwo.

⁷Uadiye bana babo, ulebeleke nge kwawo uligele mu ng'umba iyo ne uyenda mu zila ne ulilele pasi ne umuka.

⁸Uasungilile mu tjiazha tjitjo ili ikumbuludzo abe lutjwayo pakati kwe mesho awo.

⁹Ngono uakwale mu makwasayile e nkoba we ng'umba iyo nemu mazhalilo e nkoba we nzi.”

¹⁰“Ngono kowoti Yahwe Ndzimu uwo bekulonga mu shango yabakatuna kuna botate benyu, kuna Abhurahama ne kuna Isaki ne kuna Jakubo kukupa iyo ne mizi mikulu yayo yakanaka yawusakabaka,

¹¹ng'umba dzizhele zwithu zose zwakanaka zwausakalonga mudzili ne matshime akatshiwa kale, awusakatsha ne mizhambi ne mitoba yawusakadzikila, ngono uti uja uguta,

¹²ipapo ube ne njele usitongo kangang'wa Yahwe ibo bakakudusa mu shango ye Egipiti, bekudusa mu ng'umba ye busungwa.

¹³Utje Yahwe Ndzimu uwo, ubashingile utune nge zina labo.”

¹⁴“Musitongo tobela midzimu mimwe, midzimu ye bathu bakakupoteleka,

¹⁵ngoti Yahwe Ndzimu wenyu upakati kwenyu Ndzimu una fupa, kugwadzamoyo kwa Yahwe Ndzimu wenyu kusitongo dwa kumuhwila bebe bemulobesa kudwa mu shango.

¹⁶Musitongo buya mukalika Yahwe Ndzimu wenyu sekwa makabalika ku Masa.

¹⁷Mumusile moyo kulondolodza milayo ya Yahwe Ndzimu wenyu ne milaywana yabo yabakamudwa kuyilondolodza.

¹⁸Ngono muthame tjakatambunuka ne tjakalulwama mu mesho a Yahwe kuti ndizo kumuyendile zubuyanana nenge kuti mungine mutole shango iyeyi yakanaka Yahwe yabakatuna kuyipa bobatategulu benyu

¹⁹nge kutata zwita zwenyu zose mbeli kwenyu Yahwe sekwa bakagadzabgwe.

²⁰“Ha nkololo uwo ekubhuzwa mu tjibaka tjinozha eti, ‘Milayo iyeyi ne milaywana iyeyi yabakadwiwa ndi Yahwe Ndzimu wedu kuyilondolodza inodwani?’

²¹Ipapo udwe nkololo uwo uti, ‘Takabe tili balanda ba Faro mu Egipiti, ngono Yahwe bakatidusa mu Egipiti nge tjiazha tjakasima.

²²Ngono Yahwe bakalakidza zwilakidzo ne matjenamiso makulu anogwadza ebhayana ne Egipiti na Faro ne nsha uwe wose mu mesho edu.

²³Ngono bakatidusa ikoko kuti batizhise batipe shango yabakagadzabgwe kuipa bobatategulu bedu.

²⁴Yahwe bakatilaya kulondolodza milayo yose iyeyi, kutja Yahwe Ndzimu wedu kuti kutilulwamile misi yose kuti batibhabhe titjile sekwa kuliiko mu zhuba ileli.

²⁵Ngono kowobe ndulamo kutili ha tingabe ne njele kulondolodza nlayo wose mbeli kwa Yahwe Ndzimu wedu sekwa bakatidwa.’ ”