Read Kalanga Matama 8 Bible Online

Matama 8 - Kalanga bible

Matama 8

¹“Milayo yose yandinomupa nasi mube ne njele kuyilondolodza kuyita kuti mutjile muwande, mungine mutole shango Yahwe yabakatuna kuyipa bobatategulu benyu.

²Ngono ukumbule zila yose Yahwe Ndzimu uwo yabakakutungamila makole iyawa ali makumi manna (40) mu tjilambanyika bekuyita kuti ube unozwiyisa pasi, kukulika kuziba kuti tjimu moyo uwo ini, kene unowolondolodza milayo yabo kene aa.

³Bakakuyisa pasi bakakuletja ukafa ne zhala bakakupa mana zwili zojiwa zwawakabe usingazibe na bobatategulu babo abazotongo zwiziba bakabe bethamila kuti bakuthame uzibe kuti nthu aatotjila nge zojiwa zoga, koga kuti nthu unotjila nge tjimwe ne tjimwe tjinodwa mu nlomo wa Yahwe.

⁴Zwiambalo zwizo azwizo kushakalila ne makumbo awo aazotongo zwimba mu makole iyawa ali makumi manna (40).

⁵Ngwenu wali ziba mu moyo uwo kuti se nlume elaya nkololo uwe, Yahwe Ndzimu uwo unokulaya.

⁶Ndizo ulondolodze milayo ya Yahwe Ndzimu uwo nge kuyenda mu zila dzabo nge kubatja.

⁷Ngoti Yahwe Ndzimu uwo unokuzhisa mu shango mbuya, shango ye wobana dze vula, ye misenya ne madziba anodwilila ewunga mu mikuku ne mu matuthu,

⁸shango ye koroni ne bhali ye mikumbi ye zhambi ne mipaya ne pomegiranate, shango ye mitoba ne butji,

⁹shango yaunoja zojiwa zwisingatongo sheteka, yausingosheta tjimwe muili, shango ina mabgwe e butale, mu matuthu ayo unowotsha khopa.

¹⁰Unowoja ukaguta ngono ukakudza Yahwe Ndzimu uwo ubakudzila shango mbuya yabakupa.”

¹¹“Ibe ne njele usidwe ukangang'wa Yahwe Ndzimu uwo nge kusalondolodza milayo yabo iyo yandinomupa mu zhuba ileli,

¹²usitongodwa uti waja waguta ngono wabaka ng'umba dzakanaka ngono ugala mudzili

¹³ne ng'ombe dzidzo ne ngubi dzidzo dzawanda, siliva iyo ne golide iyo, kose kwaunako kwawanda,

¹⁴ipapo moyo uwo uzwikudza ube ukangang'wa Yahwe Ndzimu uwo iwo wakakudusa mu Egipiti, mu ng'umba ye busungwa.

¹⁵Bakamutungamila mu tjilambanyika tjikulu tjakabangalala tjina nyoka dzakabangalala ne phani na pasi pakawomelela pasina vula, ibo bakakuzhisila vula kudwa mu shongwe yakasima.

¹⁶Bakakupa mana mu tjilambanyika zojiwa zwisakatongozibgwa ndi bobatategulu babo, bakathama kuti uzwiyise pasi, bakakulika kukuthamila bubuya kubupelo.”

¹⁷“Uyele njele usitongo zwidwa mu moyo ukati, ‘Simba langu ne matatabuko angu akandiwanila fumwa iyeyi.’ ”

¹⁸Ukumbule Yahwe Ndzimu uwo ngoti ndibo banokupa simba kuti uwane fumwa kuti bathumbidze tjidumano tjabo tjabakathama nge kutuna kuna bobatategulu babo sekwa kuli iko mu zhuba ileli.

¹⁹Ngono ha ungadzina ukakangang'wa Yahwe Ndzimu uwo ukatobela mimwe midzimu ngono ukayishingila ukabuya ukayinamata, ndokukumbuludza ndisimisa mu zhuba ileli kuti nge malebeswa unowoloba.

²⁰Unowofanana koga ne njudzi idzedzi Yahwe dzabanolobesa mbeli kuko ngoti unowobe usahwa hwi la Yahwe Ndzimu uwo.