Read Kalanga Matama 9 Bible Online

Matama 9 - Kalanga bible

Matama 9

¹“Ihwa iwe Iziraela, unowotjuluka Jorodani mu zhuba lino, kungina unotolela njudzi idzedzi hwulu kakale dzakasima kukupinda, mizi mikulu yakabakiligwa makuma malefu kunoti ku makole,

²bathu bakulukulu kakale balefu, bakololo be Baanakimu baunoziba kakale bawakahwa kuyi nge kwabo, ‘Ndiyani ungama mbeli kwe bakololo ba Anaki?’

³Ndizo wali ziba muna lino zhuba kuti iye wakakutungamila se moto unoja, ndi Yahwe Ndzimu uwo, banowobalobesa bakabatshambila pasi mbeli kuko. Ndizo unowobatata ukathama kuti balobe belibilidza Yahwe sekwa bakakugadzabgwe.

⁴“Shule kwa Yahwe Ndzimu uwo babadusila kutjena mbeli kuko usitongo zwidwa mu moyo uwo ukati, ‘Yahwe bandizhisa mu shango iyeyi nge ndulamo yangu kuti ndiithuwe,’ ngono dumbu Yahwe banodusa njudzi idzedzi mbeli kuko ngekwe mbipo yadzo.

⁵Ate ili ndulamo iyo kene kutambunuka kwe moyo uwo kunothama kuti unothuwa shango yabo, koga mbipo ye njudzi idzedzi ndiyo yathama kuti Yahwe Ndzimu uwo badziduse mbeli kuko kuti bathumbidze dama la Yahwe labakatuna kuna bobatategulu babo, kuna Abhurahama ne kuna Isaki ne kuna Jakubo.”

⁶“Ziba ngwenu kuti Yahwe Ndzimu uwo abatokupa shango iyeyi mbuya ngekwe ndulamo iyo ngoti imwi mu bathu bakawoma misholo.

⁷Kumbula kakale usitongo kangang'wa sekwa wakatanga Yahwe Ndzimu uwo ukawugwadzisa moyo mu tjilambanyika, kudwa mu zhuba lawakabhuda mu shango ye Egipiti kuswikila uzha mu bugalo igogu wakabe upandukila Yahwe.

⁸Neku Horebu wakatanga Yahwe kwabagwadza moyo ngono Yahwe bakagwadza moyo kwazo nge kuko kwakabe kwasala kuti bakulobese.

⁹Ndakati ndatatha dombo kunoamutjila zwileiti zwe mabgwe, zwileiti zwe tjidumano Yahwe tjabakathama nawe, ndakagala pezhugwi kwe dombo mazhuba ali makumi manna (40) ne masiku ali makumi manna (40) ndisingaje zojiwa kene kung'wa vula.

¹⁰Ngono Yahwe bakandipa zwileiti zwe mabgwe zwibili zwakakwagwa nge tjinyala tje Ndzimu, muali kwakabe kuna matama wose akalebgwa ndi Yahwe kumuli bali pezhugwi kwe dombo kudwa pakati kwe moto mu zhuba le nshangano.

¹¹Ngono kubupelo gwe mazhuba ali makumi manna (40) ne masiku ali makumi manna (40) Yahwe bakandipa zwileiti izwezwi zwe mabgwe zwibili, zwileiti zwe tjidumano.

¹²Ipapo Yahwe bakabe beti kundili, ‘Milika deluka ulibilidza, ngoti bathu babo bawakadusa mu Egipiti bathama mbipo, bapambuka belibilidza, babhuda mu zila yandakabalonga muili, bakazwithamila ifano tjakabumbiwa.’

¹³“Kakale Yahwe bakandidwa bakati, ‘Ndakabona bathu ibaba ngono bona, bana mitshibha,

¹⁴letja ndibalobese ndibukushe zina labo pasi kwe kudzimu, ngono iwe ndowothama ndiwe ludzi bukulu gwakasima kubapinda.’

¹⁵Ndizo ndakashanduka adeluka dombo, dombo lakabe lithuta moto, ndakabe ndakasenga nge maboko angu mabili zwileiti zwibili zwe mabgwe zwe tjidumano.

¹⁶Ngono alinga, ngono bonani makabe matjinyila Yahwe Ndzimu wenyu, makabe mazwithamigwa nkong'wana wakabumbiwa, mapambuka mulibilidza mu zila Yahwe yabakabe bamulonga muili.

¹⁷Ndizo ndakatola zwileiti izwezo zwibili zwakabe zwili mu maboko angu mabili azwilashila pasi azwipkhwanya mbeli kwenyu makalinga.

¹⁸Ipapo awila pasi mbeli kwa Yahwe se kutanga, mazhuba ali makumi manna (40) ne masiki ali makumi manna (40), andizotongoja zojiwa kene kuli kung'wa vula, kuyikhwa nge tjibi tjenyu tjamakathama, muthama tjakabipa mu mesho a Yahwe kubagwadzisa moyo.

¹⁹Ngoti ndakabe nditja kugwadza moyo kwa Yahwe kukulu kwabakabe bamugwadzila moyo ndiko kwabakabe bazwimisila kumulobesa. Ngono Yahwe bakandihwa ne mu tjibaka itjetjo.

²⁰Ngono Yahwe bakabe bagwadzila moyo Aroni kwazo ngono bakazwimisila kunlobesa, ngono ndakatembezelela Aroni bo mu tjibaka itjetjije.

²¹Ipapo atola kuthu ikoku kwe tjibi, nkong'wana wamakabe mathama aupisa nge moto, aupkhwanya aukwiya ukasala ili bgwisa gwakanathika se hwuluba ngono adila hwuluba yawo mu lukobana gwakabe guwunga gudeluka mu dombo.”

²²“Ku Tabera nayikobo neku Masa neku Kiberotihathava makatanga Yahwe mukabagwadzisa moyo.

²³Ngono kwakati Yahwe bemutuma kudwa mu Kadeshibhareneya beti, ‘Yendani munotola shango yandakamupa muithuwe,’ ipapo makapandukila nlayo wa Yahwe Ndzimu wenyu mukasibagale moyo kene kuli kuhwa hwi labo.

²⁴Makabe bapandukili ba Yahwe kudwila mu zhuba landakamuziba.”

²⁵“Ndizo ndakawila pasi mbeli kwa Yahwe mazhuba iyawo ali makumi manna (40) ne masiku ali makumi manna (40) ngekuti Yahwe bakabe bati banowomulobesa.

²⁶Ngono ndakatembezela Yahwe nditi, ‘She Yahwe, musilobese bathu benyu ibo thaka yenyu, ibo bamakadzutunula nge bukulu gwenyu, ibo bamakadusa mu Egipiti nge luboko gwakasima.

²⁷Kumbulani balanda benyu, bo Abhurahama na Isaki na Jakubo, musilinge bukomba gwe bathu ibaba kene mbipo yabo kene tjibi tjabo,

²⁸shango yamakatidusa muili idwa iti, “Ndingekuti Yahwe bakabe basingatubule kubayisa ku shango yabakabe babagadzabgwe nenge kuti bakabe bebabenga bakabadusa kubabulayila mu tjilambanyika.”

²⁹Kana bathu benyu bali thaka yenyu ibo bamakadusa nge simba lenyu gulu nenge luboko gwenyu gwakatambunuka.’