Read Kalanga Johani 1 Bible Online

Johani 1 - Kalanga bible

Johani 1

¹Mu kutangisa Dama lakabe lili yapo, ngono Dama lakabe lina Ndzimu kakale Dama lakabe lili Ndzimu.

²Lakabe lina Ndzimu mu kutangisa.

³Zwithu zose zwakathamiwa ndiye. Kuzhe kukwe akuna tjimwe tjakathamiwa tjisakathamiwa ndiye.

⁴Munli kwakabe kuna butjilo, butjilo guli tjedza tje bathu.

⁵Tjedza tjopenya mu zhalima, koga zhalima alizotjikunda.[1]

⁶Kwakabe kuna mmwe nlume atumwa nge Ndzimu, zina lile kuyi Johani,

⁷wakazhila kutendeka ngekwe tjedza itjetjo, kuti bathu bose bagalemoyo ndiye.

⁸Iye nge kukwe wakabe asi iye tjedza, koga, wakazha kuwopa butendeki ngekwe tjedza itjetjo.

⁹Tjedza tje malebeswa tjinovonekela bathu bose tjakabe tjizha mu shango.

¹⁰Wakabe ali mu shango, koga nenguba Ndzimu wakathama shango ndiye, shango aizonziba.

¹¹Wakazha ku shango ya kanyi kukwe koga bathu ba kanyi kukwe bakasin'amutjile.

¹²Koga ibabo bakan'amutjila, bakagalamoyo mu zina lile, wakabapa fanilo dze kube bana be Ndzimu.

¹³Ibaba ate bakazwagwa nge lopa kene kuda kwe nyama, kene nge kuda kwe nthu, koga Ndzimu ndiye wakathama kuti babe bana babe.

¹⁴Dama lakabe nthu, kagala pakati kwedu ana ngoni kwazo ne malebeswa. Takabona gudzo lile, gudzo le Nkololo uyega wa Tate.

¹⁵Johani wakapa butendeki nge kukwe, wakamimila eti, “Ndiye iwoyu wandakaleba nge kukwe nditi, ‘Iye unozha shule kwangu nkulu pandili, ngobe wakabe yapo ndi sathu abe yapo.’ ”

¹⁶Ngobe ana ngoni njinji, wakatihwila ngoni epaphulula.

¹⁷Ndzimu wakatizhisila nlayo* ndi Mushe, koga ngoni ne malebeswa takazwipiwa ndi Jesu Kirisiti.

¹⁸Akuna ne nng'ompela wakatongo bona Ndzimu. Koga Nkololo uyega, ugele kubapa na Tate, ndiye wakazibisa Ndzimu bathu.

¹⁹Ogu ndigo butendeki gwa Johani gwa akaleba tjibaka tje Bajuta tjabakantumila bapirisiti ne Balevi banodwa mu Jerusalema kuwombhuzwa kuti n'diyi ani.

²⁰Johani wakaleba, aazozwilandula; wakaleba eti, “Ate ndili imi Mesiya.”

²¹Bakambhuzwa beti, “Ndiwe ani ngono? Ndiwe Elija?” Johani kabashandula kati, “Aa, ate ndili Elija.” Bakambhuzwa kakale bakati, “Ndiwe Nlebesambeli?” Kabadabila kati, “Aa.”

²²Bakati kunli, “Ngono ndiwe ani? Utidabile kuti naswi tinobudza batituma. Ukatini nge kuko?”

²³Johani kadabila nge matama a Isaya nlebesambeli eti, “Ndimi hwi le unodanilila mu tjilambanyika eti, ‘Tambunudzani zila ya She.’ ”

²⁴Bamwe be Bafarasi, bakabe batumwa

²⁵baka mbhuzwa beti, “Ha usi Mesiya, usi Elija kene nlebesambeli, ini udubika bathu?”

²⁶Johani kabadabila kati, “Ndomudubika nge vula, koga pakati kwenyu kumile mmwe wamusingazibe.

²⁷Ndiye unozha shule kwangu, iye wandisakalizana kusunungula mitjili ye khwebana dzidze.”

²⁸Oku kwakabe kushingikala mu Bhetani seli kwe gwizi gwe Jorodani, Johani kwaakabe edubikako.

²⁹Tjimuka, Johani kabona Jesu ezha kunli, ngono kati, “Bonani Pkhwizana ye Ndzimu iyo inodusa tjibi tje shango!

³⁰Oyu ndiye wandakaleba nge kukwe nditi, ‘Kuna nlume unowozha shule kwangu, koga nkulu pandili, ngobe wakabepo kunditangila.’

³¹Imi nge kwangu ndakabe ndisinganzibe, koga ndakazha ndidubika bathu nge vula kuti ndizo azibgwe nge Baiziraela.”

³²Johani kapa butendeki eti, “Ndakabona Meya ideluka se njiba idwa kudzimu, ngono ikagala pezhugwi kukwe.

³³Ndakabe ndisinganzibe, koga iye wakandituma kuwodubika nge vula wakati kundili, ‘Iye waunowobona Meya ideluka igala pezhugwi kukwe, ndiye unowodubika nge Meya yakayengemala.’

³⁴Ndakambona ngono apa butendeki kuti ndiye Nkololo we Ndzimu.”

³⁵Tjimuka kakale Johani kabe ali mile ne badiyiwa babe babili,

³⁶ngono kati ebona Jesu epinda kati, “Bonani Pkhwizana ye Ndzimu!”

³⁷Ibabo badiyiwa babili bakahwa eleba ikoku, ngono bakatobela Jesu.

³⁸Jesu katjebuka, kababona bakantobela, ngono kababhuzwa kati “Moshakani?” Bakati kunli, “Rabhi,”[2] (kodwa kuti N'diyi) “mogala ngayi?”

³⁹Kabadabila kati, “Izhani mubone.” Bakayenda bakanobona paakabe egala, ngono bakashwa masikati iyawo wose naye; tjakabe tjingabe tjibaka tje bunna matewuko.

⁴⁰Mmwe we babili bakahwa Johani elebeleka bakatobela Jesu ndi Enduru nnung'una wa Simoni Pita.

⁴¹Tje kutanga Enduru wakanoshaka nkulu uwe Simoni ngono kan'dwa kati, “Tawana Mesiya” Kodwiwa kuti Kirisiti.

⁴²Kayisa Simoni kuna Jesu. Jesu kanlinga kati kunli, “Ndiwe Simoni nkololo wa Johani ngono unowodang'wa Kefasi.” Kefasi ndilo zwalo Pita, kodwiwa shongwe.

⁴³Tjimuka Jesu kayenda ku Galili. Kawana Filipo ngono kati kunli, “Unditobele!”

⁴⁴Filipo wakabe edwa ku Bhetisaida, kanyi kwa Enduru na Pita.

⁴⁵Filipo kabona Natanaele ngono kambudza kati, “Tambona iye wakalebgwa ndi Mushe mu lukwalo gwe nlayo ne mu hwalo dze balebesambeli. Iye Jesu we Nazareta nkololo wa Josefa.”

⁴⁶Natanaele kabhuzwa kati, “Apa kuna tjibuya tjingadwa mu Nazareta kene?” Filipo kadabila eti, “Izha ubone.”

⁴⁷Kukati Jesu ebona Natanaele ezha kunli, kati, “Bonani, woyu ndiye N'iziraela wakwako, usingabhuzwiwe.”

⁴⁸Natanaele kambhuzwa kati, “Mondiziba tjini?” Jesu kan'dabila eti, “Ndakubona utjikusi kwe mpaya, Filipo asathu kawokudana.”

⁴⁹Natanaele kanshandula eti, “N'diyi, mu Nkololo we Ndzimu, mu Mambo we Iziraela!”

⁵⁰Jesu kati kunli, “Unogalamoyo koga, ngobe ndakubudza kuti ndakubona utjikusi kwe mpaya. Utjawobona zwithu zwikulu kupinda izwezwi!”

⁵¹Kabuya kati kunli, “Ndolebesa tjose ndoti kumuli, mowobona kudzimu kuzhuka ne batumwa be Ndzimu betathila pezhugwi kakale bedelukila pasi mu Nkololo we nthu.”