Read Kalanga Johani 10 Bible Online

Johani 10 - Kalanga bible

Johani 10

¹Jesu kalebeleka kati, “Ndolebesa tjose ndoti kumuli, iye usingangine mu danga le pkhwizi nge pa nkoba, engina ngothukila, i mbava kakale ntoleli,

²koga unongina nge nkoba ndiye nlisi we pkhwizi.

³Nlindi we pa nkoba unonzhulila, pkhwizi dzohwa hwi lile. Ngono unodana pkhwizi dzinobe dzili dzidze nge mazina adzo edzitungamilila kuzhe.

⁴Ha adzidusa, unodzitungamila, ngono dzikantobela, ngobe dziziba hwi lile.

⁵Adzingatobele mwezi, dzowontizha, ngobe dzisingazibe hwi lile.”

⁶Jesu wakababudza tjifano itjetji, koga bakasihwisise tjaanodwa.

⁷Jesu kapapha kati, “Ndolebesa tjose ndoti kumuli, imi ndimi nkoba unongina nge pkhwizi.

⁸Bose bamwe bakazha mbeli kwangu i mbava ne batoleli ngono pkhwizi adzizobahwilila.

⁹Ndimi nkoba. Iye unongina ndimi unowotjidziwa, unowongina kabhuda kawana mafulo.

¹⁰Mbava inozha kuwokwiba ne kuwobulaya ne kuwolobesa. Imi ndakazha kuti babe ne butjilo, kakale babe nago nge buzhalo.

¹¹“Ndimi nlisi wakalulwama. Nlisi wakalulwama wakazwimisila kufila pkhwizi dzidze.

¹²Nthu unolisila kulipiwa, ate ali nlisi, kakale ate ali mweni we pkhwizi, unoti ebona phele izha, katizha kasiya pkhwizi, ngono phele ikabhata pkhwizi ikadzipaladza.

¹³Unotizha, ngobe ali mbhatshi koga, asina hanya ne pkhwizi.

¹⁴Ndimi nlisi wakalulwama, ndoziba pkhwizi dzangu, na idzo dzondizibabo,

¹⁵koga sa Tate bendiziba nami ndibaziba sekwa banondiziba. Ndakazwimisila kufila pkhwizi dzangu.

¹⁶Ndina dzimwe pkhwizi dzangu dzisi dze danga ileli. Ngono ndakafanila ndidzizhisebo, ngono dzowohwa hwi langu, ndizo kowobe ne danga ling'ompela lina nlisi nng'ompela.

¹⁷“Ngekwa ikoku, tate banondida, ngobe ndawopila butjilo gwangu kuti ndizo ndiguamutjile kakale.

¹⁸Akuna unonditolela butjilo gwangu. Ndimi ndakazwimisila kuti ndife. Ndina simba le kugukoba kakale ndina simba le kuguamutjila kakale. Etji nditjo tjandakadwiwa ndi Tate.”

¹⁹Kukabe ne kuthubukana kakale pakati kwe Bajuta ngekwe matama iyawa.

²⁰Bunji gwabo guti, “Una meya mbi! Unopenga! Mohwilililani tjaanoleba?”

²¹Bamwe beti, “Nthu una meya mbi aangalebe matama akajali. Apa meya mbi ingapofunula mapofu tjini kene?”

²²Kwakabe kuli mu mbaba, ngono kukabe kuli mu nzano we tjikumbuludzo tje kuyengemadziwa kwe Ng'umba ye Ndzimu mu Jerusalema.

²³Jesu wakabe eyenda yenda mu ntutshi unodang'wa Denga la Solomoni mu bhakasa le Ng'umba ye Ndzimu.

²⁴Bajuta bakankubunganila bakambhuzwa beti, “Unowotilindisa kungapani usathu ukatibudza malebeswa? Ha uli iwe Mesiya, utibudze kube patjena.”

²⁵Jesu kabashandula eti, “Ndakamubudza ntolo, koga amutoduma. Mishingo yandinoshinga nge zina la Tate inolakidza nge kwangu,

²⁶koga amutoduma, ngobe ate muli pkhwizi dzangu.

²⁷Pkhwizi dzangu dzohwa hwi langu, ndodziziba na idzo dzonditobela.

²⁸Ndodzipa butjilo gusingapele, ngono adzingalobe. Akuna ungadzidzamula mu maboko angu.

²⁹Tate bakandipa idzo ba nkulu pana bose, ngono akuna ungadzamula tjimwe mu maboko a Tate.

³⁰Imi na Tate ti banng'ompela.”

³¹Bajuta bakanunga mabgwe kakale beti bankikithidze.

³²Koga Jesu kabadwa kati, “Ndakashinga mishingo minjinji mibuya inodwa kuna Tate muli yapo, ndiupi wayo wamunoshaka kundikikithidzila iwo?”

³³Bajuta bakanshandula beti, “Atitokukikithidzilila mishingo mibuya, koga tokukikithidzilila kutuka Ndzimu! Unozwithama Ndzimu koga uli nthu!”

³⁴Jesu kabashandula eti, “Kwakakwagwa mu nlayo wenyu kuyi Ndzimu wakati, ‘Mu midzimu.’

³⁵Toziba kuti tjinolebgwa nge Hwalo dze Ndzimu malebeswa nge kusingapele, Ndzimu wakabadana midzimu,

³⁶ngono motini nge kwa iye wakayengemadziwa ndi Tate bakantuma mu shango kene? Ini munditendeka nge tjinyala muti ndotuka Ndzimu andati ndi Nkololo we Ndzimu?

³⁷Ha ndisingashinge mishingo ya Tate musigalemoyo mundili.

³⁸Koga ha ndishinga tjinodiwa ndi Tate, nenguba musingagalemoyo mundili, bukulu galanimoyo zwiyito zwangu, ndizo muzibe kuti Tate bamundili, nami ndimuna Tate.”

³⁹Bakagwisa kumbhata kakale, koga kapudzumuka mu maboko abo.

⁴⁰Kabgwilila seli kwe gwizi gwe Jorodani pakabe Johani e dubikila bathu kutanga, kaswika kagala ikoko.

⁴¹Bathu banjinji bakazha kunli. Bakati, “Johani aazotongobe ethama zwilakidzo, koga tjimwe ne tjimwe tjaakaleba ngekwe nlume iwoyu tjakabe tjili malebeswa.”

⁴²Banji bakagalamoyo munli ipapo.