Read Kalanga Johani 11 Bible Online

Johani 11 - Kalanga bible

Johani 11

¹Mu nzi unoyi Bhetani, kanyi kwa Mariya ne nkulu uwe, Mata kwakabe kuna nlume unoyi Lazaro egwala kwazo.

²Mariya iwoyo ndiye wakazhodza She nge mafuta anonuhwa zwinozipa, kabukusha makumbo a She nge mavudzi awe, ndiye wakabe egwaligwa nge hazwadzi iye Lazaro.

³Hazwadzi dza Lazaro dzakatumila dama kuna Jesu dziti, “She, nzwalani wenyu wamunoda kwazo unogwala.”

⁴Jesu kati ehwa kuiyago, kati, “Igogu bugwele ate gunowombulaya, ikoku kwashingikala kuti ndizo Ndzimu ukudziwe, ndiko kunowoyita kuti Nkololo we Ndzimu akudziwe.”

⁵Jesu nenguba akabe eda Mata ne nnung'una uwe ne hazwadzi yabo Lazaro,

⁶wakati ehwa ngekwe bugwele gwa Lazaro kagala mazhuba mabili asathu kamilika kwaakabe aliko.

⁷Shule kadwa badiyiwa babe kati, “Ngatibgwilileni ku Judiya.”

⁸Badiyiwa babe bakan'dwa bakati, “N'diyi, ate ntolo Bajuta begwisa kumukikithidza nge mabgwe, ngono mutjashaka bgwilila ku bali kene?”

⁹Jesu kati, “Apa zhuba alina awara dzili gumi lina mbili dze masikati kene? Ndizo, kene ali ani unoyenda kuli masikati aatokuthiwa, ngobe unobona tjedza tje shango iyeyi.

¹⁰Koga ha iyenda busiku unokuthiwa, ngobe aana tjedza.”

¹¹Wakati asinoleba matama iyawa kapapha kati, “Nzwalani wedu Lazaro wayizela, koga ndowoyenda ndonommusa.”

¹²Badiyiwa bakanshandula beti, “She, ha ali lele unowomuka.”

¹³Jesu wakabe elebeleka ngekwe lufu gwa Lazaro, koga ibo bakazwidwa beti unodwa hwope koga.

¹⁴Ndizo Jesu kabatjenesela eti, “Lazaro wafa,

¹⁵koga nge kwenyu ndoboka kuti abe atjinyika ndisipo, kuti ndizo mugalemoyo. Ngatiyendeni kunli.”

¹⁶Tomasi unodang'wa Bili kati ku bamwe badiyiwa, “Ngatiyendenibo tinofa naye!”

¹⁷Jesu kati eswika, kawana Lazaro ana mazhuba manna akabiganyiwa.

¹⁸Nzi we Bhetani wakabe uli thambo ipasi kwe khilomitha thatu kudwa mu Jerusalema.

¹⁹Bajuta banjinji bakabe bazha kuwomila kuna Mata na Mariya ngekwe hazwadzi yabo.

²⁰Mata kati ehwa kuyi Jesu unozha, kabhuda kunonshanganidza, koga Mariya kasala mu ng'umba.

²¹Mata kaswika kati kuna Jesu, “She, ha makabe muli pano, hazwadzi yangu inobe isakafa!

²²Koga ndoziba kuti nangwenu kose Ndzimu unowomupa tjimwe ne tjimwe tjamunokumbila.”

²³Jesu kan'dwa kati, “Hazwadzi iyo inowomuka.”

²⁴Mata kan'dabila eti, “Ndoziba kuti unowomuka mu kumusiwa kwe bathu mu nsi we bupelo.”

²⁵Jesu kati kunli, “Ndimi kumuka ne kutjila. Kene ali ani unogalamoyo mundili unowotjila nenguba afa,

²⁶kene ali ani unotjila ngono egalamoyo mundili aatowofa. Apa unogalamoyo muna ikoku kene?”

²⁷Mata kan'dabila eti, “She, ndogalamoyo kuti ndimwi Mesiya, Nkololo we Ndzimu, iye wakabe akalingiligwa kuzha mu shango.”

²⁸Mata wakati aleba matama iyawa, kabgwilila ku nzi kaswika kadanila nnung'una uwe Mariya ntome, kan'dwa kati, “N'diyi wazha, ngono unokudana.”

²⁹Mariya kati ehwa kuyiyago, kamilika tjinyolotjo kayenda kunli.

³⁰Jesu wakabe asathu kaswika mu nzi, koga wakabe atji ikweno kwaakashanganidzigwako ndi Mata.

³¹Bathu bakabe bana Mariya mu ng'umba bennyaladza, bakati bebona emilika elibilidza bakantobela bekumbula kuti unoyenda kunolilila ku ikumbu tja Lazaro.

³²Mariya kati eswika pana Jesu kawila pa makumbo awe kati, “She, ha makabe muli pano, hazwadzi yangu inobe isakafa!”

³³Jesu kati ebona Mariya elila ne bathu bakabe banaye belilabo, kahwa zogwadza mu moyo ngono kadziyidzika kwazo.

³⁴Kababhuzwa kati, “Makambiganya ngayi?” Bakan'dwa bakati, “She Izhani mubone!”

³⁵Jesu kalila.

³⁶Ipapo bathu bakati, “Bonani kuti wakabe en'da kungapani!”

³⁷Ngono bamwe babo bakati, “Apa iye wakapofunula bhofu, unobe asakathama kuti nlume iwoyu asife kene?”

³⁸Jesu mu kuhwa zogwadza kukulu kayenda ku ikumbu tjakabe tjili guwu lakazhaligwa nge shongwe.

³⁹Kabadwa kati, “Dusani shongwe iyeyi.” Mata, hazwadzi ye nfi, kan'dabila eti, “Kowobe konuhwa zwakabipa She. Una mazhuba manna akabiganyiwa!”

⁴⁰Jesu kambhuzwa kati, “Apa andizokudwa ati unowobona gudzo le Ndzimu ha ugalamoyo kene?”

⁴¹Bakadusa shongwe. Jesu kalinga pezhugwi kati, “Tate, ndomuboka ngoti mandihwa.

⁴²Ndoziba kuti mondihwa misi yose, koga ndoleba ikoku ngekwe bathu ibaba bapano, kuti ndizo bagalemoyo kuti ndimwi makandituma.”

⁴³Kati aleba ikoku, kamilidza hwi kadana eti, “Lazaro, bhuda!”

⁴⁴Lazaro kabhuda, maboko ne makumbo awe, akapombiwa nge jila nenge buso gugwe gwakakwididziwa nge jila. Jesu kabadwa kati, “Mumpombonole matyila munletje ayende.”

⁴⁵Koga ipapo bunji gwe Bajuta bakabe bawomila kuna Mariya bakabona tjakathamiwa ndi Jesu ngono bakagalamoyo munli.

⁴⁶Koga bamwe babo bakayenda ku Bafarasi bakanobabudza tjathamiwa ndi Jesu.

⁴⁷Ndizo Bafarasi ne bapirisiti bakulu bakadana nshangano we makulukota e Bajuta, bakati, “Towothamani? Bonani zwilakidzo zwinjinji zwinothamiwa nge nlume iwoyu.

⁴⁸Ha angaletjiwa kadwilila sa ikoku, bathu bose banowogalamoyo munli, ngono batungamili be Baroma bangatinginilila bakakolomola Ng'umba ye Ndzimu bakalobesa nenge itjaba tjedu.”

⁴⁹Mmwe wabo wakabe edang'wa Kaifasi, wakabe ali iye Ntungamili we bapirisiti mu gole ilelo kabadwa kati, “Amutozibisisa tjinoshingikala.

⁵⁰Apa amutoziba kuti koyita kumuli kuti nthu ali nng'ompela afile itjaba pana kuti kulobe itjaba tjose kene?”

⁵¹Wakabe asingazwiyite, ngobe akabe ali iye Ntungamili we bapirisiti mu gole ilelo wakabe elebesambeli kuti Jesu unowofila itjaba tje Bajuta,

⁵²kusi itjaba itjetjo koga, koga ne kukubunganya bana be Ndzimu bakapalala kuti babe bang'ompela.

⁵³Ndizo kudwa tjose mu zhuba ilelo bakalangana kuti Jesu ungabulawa tjini.

⁵⁴Kudwa ipapo Jesu wakabe woyenda asi patjena pakati kwe Bajuta, kabhuda kayenda ku bugalo gupejo ne tjilambanyika, ku nzi wakabe udang'wa kuyi Ifureimi, kagalako ne badiyiwa babe.

⁵⁵Nzano we Kupinda pezhugwi wakabe wabe pejo, ngono bathu banjinji bakayenda ku Jerusalema bedwa kuzhe kwe nzi* nkulu kunozwitjenesa, nzano usathu ukaswika.

⁵⁶Bathu ibabo bakabe beshaka Jesu, ngono bakati bekubungana mu Ng'umba ye Ndzimu, bakabhuzwana beti, “Moalakana tjini? Unowozha ku nzano kene tjini?”

⁵⁷Ngono bapirisiti bakulu ne Bafarasi bakabalaya kuti, ha kuna unoziba kwaayako alebe, kuti ndizo banombhata.