Read Kalanga Johani 12 Bible Online

Johani 12 - Kalanga bible

Johani 12

¹Kwakati Nzano we Kupinda pezhugwi wasaligwa nge mazhuba matathatu, Jesu kamilika kayenda ku nzi we Bhetani kanyi kwa Lazaro waakamusa mu lufu.

²Wakaswika kathamigwa zojiwa kazwipakuligwa ndi Mata. Lazaro wakabe ali mmwe we bathu bakabe bali gele beja na Jesu.

³Mariya katola itenyana tje mafuta akathamwa nge nti unodang'wa kuyi nadi e ntengo upezhugwi kwazo, kaadila mu makumbo a Jesu kambukusha nge mavudzi awe. Ng'umba yose ikanuhwa nnuhwo we mafuta iyawo.

⁴Mmwe we badiyiwa ba Jesu, unoyi Judasi Isikariyoti wakawobe iye unowo wonga Jesu kati,

⁵“Ini mafuta iyawa asatengesiwa mazana matatu (300) e mari e siliva[14] kuti kupiwe bashayi.”

⁶Wakabe asina hanya ne bashayi, ikoku wakabe e kulebesiwa nge bubava, ngobe akabe ali iye ntjengeti we hwomo ye mari, akawolobela kuzwitopolela muili.

⁷Jesu kabadwa kati, “Munletje ashinge tjaangatubula kubiganyidzila zhuba le kubiganyiwa kwangu.

⁸Bashayi munabo misi yose. Koga imi amutowobe nami misi yose.”

⁹Bathu banjinji bakahwa kuti Jesu uyapo mu nzi we Bhetani, ngono bakayendako beyendila kunobona Lazaro wakabe amusiwa mu lufu ndi Jesu.

¹⁰Bapirisiti bakulu bakalangana kubulaya Jesu kose na Lazaro,

¹¹ngobe Bajuta banjinji bakabe bahwa ngekwa Lazaro ngono bakagalamoyo nge kukwe muna Jesu.

¹²Mu zhuba linotobela ilelo mbunga nkulu we bathu bakabe bazha ku Nzano we Kupinda pezhugwi ukahwa kuti Jesu waswika ku Jerusalema.

¹³Bakatola thabi dze nlala bakayenda kunonshanganidza, bemimila beti, “Hosana! Wakakombolegwa iye unozha nge zina la She! Mambo we Iziraela!”

¹⁴Jesu kawana donkana katjitatha, sekwa kwakakwagwa kuyi,

¹⁵“Usitje, iwe nkololokadzi we Ziyoni! Woyu Mambo uwo waswika akatatha donkana.”

¹⁶Kutanga badiyiwa babe bakabe basingahwisise zwithu izwezwi, koga kwakati Jesu akudziwa, bakakumbula zwakakwagwa nge kukwe nenge kuti bakanthamila zwithu izwezwi.

¹⁷Bathu bakabe bana Jesu edana Lazaro kuti abhude mu ikumbu emmusa mu bafi, bakaandamisa tjakashingikala.

¹⁸Ndizo mbunga we bathu wakanshanganidza, ngobe bakabe bahwa ngekwe tjilakidzo itjetji.

¹⁹Ngono Bafarasi bakalebesana bakati, “Apa mobona kuti akuna tjamungatubula kene? Bonani, shango yose yantobela!”

²⁰Muna ibabo bakabe beyenda ku Jerusalema kunonamata Ndzimu mu tjibaka tje nzano kwakabe kuna bamwe Bagiriki.

²¹Bakayenda kuna Filipo wakabe edwa ku Bhetisaida mu Galili bakati kunli, “Toshaka kubona Jesu.”

²²Filipo kayenda kanobudza Enduru, ngono Enduru na Filipo bakanobudza Jesu.

²³Jesu kabashandula eti, “Tjibaka tjatjiswika tje kuti Nkololo we nthu alumbidziwe.

²⁴Ndolebesa tjose ndoti kumuli, shanga ye thunde, ha isawila mu mavu ikafa, inogala ili ing'ompela koga; koga ha ifa, inozwala zwizwalo zwinjinji.

²⁵Iye unoda butjilo gugwe mu shango ino gowonlashikila, koga iye usingade butjilo gugwe mu shango ino, unowotjila nge kusingapele.

²⁶Iye unoshaka kundishingila ngaanditobele, kuti nlanda wangu abe nami kwandiyako. Ngono Ndzimu, Tate banowokudza mmwe ne mmwe unondishingila.”

²⁷Jesu kati, “Meya yangu inodziyidzika, apa ndowotini? Nditi, ‘Tate, mundiangulile mu tjibaka itjetji?’ Aa, ndakazhila kuti ndiswike mu tjibaka itjetji tje kudziyila.

²⁸Tate, kudzani zina lenyu!” Ipapo kukahwika hwi lidwa kudzimu liti, “Ndalikudza, ngono ndowolikudza kakale.”

²⁹Mbunga wakabe uli mile ipapo ukahwa hwi ileli, ngono bamwe bakati ladadamula se vula, koga bamwe bakati, “Ntumwa we kudzimu walebeleka naye!”

³⁰Jesu kati ku bali, “Ileli hwi lazhila imwi alizozhila imi.

³¹Ngwenu tjabe tjibaka tje kuti shango ino isumikilisiwe. Mbusi we shango ino unowotenyengugwa.

³²Koga imi, ndowoti ndamilidzigwa pezhugwi ndidwa mu shango ino, ndowowebela bathu bose kundili.”

³³Wakaleba matama iyawa kuli kulakidza ngekwe lufu gwaanowofa.

³⁴Mbunga ukan'dabila uti, “Nlayo wedu unotibudza kuti Mesiya unowotjilila tjose. Ungati Nkololo we nthu wakafanila milidzigwa pezhugwi tjini? Nkololo we nthu iwoyo ndiyani?”

³⁵Jesu kabashandula eti, “Tjedza tjowobe mu muli kwe tjibaka tjifupi. Yendani kutjabona, kuti musimiligwe nge zhuba, ngobe iye unoyenda mu zhalima aatobona kwaanoyenda.

³⁶Galanimoyo mu tjedza mutjinatjo, kuti mube bathu be tjedza.” Jesu wakati apedza kuleba matama iyawa kayenda kanobgwata.

³⁷Nenguba akathama zwilakidzo bakanlinga, abazogalamoyo munli,

³⁸kuti ndizo matama e nlebesambeli Isaya asiwile pasi, Isaya wakabe ati, “She, ndiani wagalamoyo matama edu kene? Ndiani wakazumbunuligwa simba la She?”

³⁹Ndizo abazotubula kugalamoyo, ngobe Isaya wakabe aleba kakale eti,

⁴⁰“Ndzimu wakapofupadza mesho abo, ukakukutadza mimoyo yabo, kuti ndizo basibone nge mesho abo, kakale basihwisise nge mikumbulo yabo, kuti ndizo basishanduke kuti ndibapodze.”

⁴¹Isaya wakaleba matama iyawa, ngobe wakabe ebona kudziwa kwa Jesu, ngono kalebeleka nge kukwe.

⁴²Nenguba kwakajalo batungamili banji be Bajuta naibobo bakagalamoyo munli, koga bakasidusile mazwiwo abo patjena, ngobe Bafarasi bangabatata mu ng'umba ye mitembezelo,

⁴³ngobe bakabe beda kukudziwa nge bathu pana kuti bakudziwe nge Ndzimu.

⁴⁴Jesu kalebelekela pezhugwi eti, “Iye unogalamoyo mundili aatogalamoyo mundili koga, koga unogalamoyo ne muna iye wakandituma.

⁴⁵Iye unobona imi unobona na iye wakandituma.

⁴⁶Ndakazha mu shango kuwobe tjedza tje shango kuti mmwe ne mmwe unogalamoyo mundili asitjagale mu zhalima.

⁴⁷Iye unohwa matama angu koga kasialondolodze, anditowonsumikilisa. Ngobe andizozha kusumikilisa shango, koga ndakazhila kuwoitjidza.

⁴⁸Iye unondilamba, asingadume tjandinoleba una Nsumikilisi. Matama andaleba ndiwo anowobe nsumikilisi uwe mu zhuba le bupelo.

⁴⁹Oku malebeswa, ngobe andizozwilebegwa, koga Tate bakandituma ndibo bakandilaya kuti ndilebeni nditjileba tjini.

⁵⁰Ndoziba kuti nlayo wabo unozhisa butjilo gusingapele. Ndizo tjandinoleba, ndoleba koga sekwa Tate bakandibudza.”