Read Kalanga Johani 13 Bible Online

Johani 13 - Kalanga bible

Johani 13

¹Kwakabe kuwomuka kuli Nzano we Kupinda pezhugwi. Jesu wakabe eziba kuti tjabe tjibaka tje kuti asiye shango ino ayende kuna Tate. Wakabe eda bose bakabe bali babe mu shango ino, kabada kunoti ne ku bupelo.

²Jesu ne badiyiwa babe bakati bali pa tjilayilo, Satani kabe alonga kale meya muna Judasi Isikariyoti nkololo wa Simoni dzekuti awonge Jesu.

³Jesu se akabe eziba kuti Tate bakalonga zwithu zose mu maboko awe nenge kuti wakadwa ku Ndzimu kakale unowobgwilila ku Ndzimu,

⁴kamilika pa zojiwa, kaambula hazu iye, katola tauli kazwipomba nditjo mu thunji.

⁵Shule, kadila vula mu ndilo katangisa kungudza badiyiwa babe makumbo ebabukusha nge tauli tjaakabe akazwipombedza nditjo.

⁶Kati ezha pana Simoni Pita, Pita kati kunli, “She apa mondingudza makumbo kene?”

⁷Jesu kan'dabila eti, “Autoziba tjandinothama, koga unowohwisisa shule.”

⁸Pita kati, “Aa, amungandingudze makumbo kene kukabe kwakatini.” Jesu kan'dwa kati, “Ha ndisakungudza auna gobe nami.”

⁹Ngono Simoni Pita kanshandula eti, “She, musindingudze makumbo woga, mundingudze kose maboko ne nsholo!”

¹⁰Jesu kanshandula kati, “Nthu wangula mbili akutosheteka kuti angudziwe kakale kuzhe kwe makumbo awe koga, ngobe mbili uwe mbuyanana. Imwi mu babuyanana koga kusi mmwe ne mmwe wenyu.”

¹¹Wakabe eleba eijalo, ngobe eziba unowon'wonga, ndizo kati, “Ha muzotjenepala mose.”

¹²Wakati apedza kubangudza makumbo, kaambala hazu iye kabgwilila ku bugalo gugwe. Kababhuzwa kati, “Apa moziba tjandakamuyitila kene?

¹³Mondidana ‘N'diyi’ mukandidana ‘She’ mulebesa, ngobe nditjo tjandili itjo.

¹⁴Ngwenu ha imi, She wenyu kakale ndili N'diyi wenyu ndamungudza makumbo, namwibo makafanila kungudzana makumbo.

¹⁵Ndamulakidza, kuti ndizo namwibo muyite sekwa ndamuyitila.

¹⁶Ndolebesa tjose ndoti kumuli, nlanda ate ali nkulu pana tetshi uwe ne ntumwa ate ali nkulu pana wakantuma.

¹⁷Ha muziba zwithu izwezwi kakale muzwishinga, makakombolegwa.

¹⁸“Anditodwa imwi mose, ngobe ndoziba bandakashalula. Kwakafanila kuti matama e Hwalo dze Ndzimu asiwile pasi, anoti, ‘Iye wandinoja naye wandishandukila.’

¹⁹Ndomubudza ngwenu, kusathu kukashingikala, kuti ha kushingikala, mugalemoyo kuti ‘Ndi iye wandili iye.’

²⁰Ndolebesa tjose ndoti kumuli, iye unoamutjila wandatuma, unoamutjila imi, na iye unondiamutjila unoamutjila wakandituma.”

²¹Kukati Jesu aleba ikoku, kadziyidzika mu meya, ndizo kati, “Ndolebesa tjose ndoti kumuli, mmwe wenyu unowondiwonga.”

²²Badiyiwa babe bakalingana basingazibe kuti unodwa upi mubali.

²³Mmwe wabo, iye wakabe ediwa ndi Jesu, wakabe ali gele pejo naye.

²⁴Simoni Pita kang'wanga kan'dwa kati, “Bhuzwa Jesu kuti unodwa ani.”

²⁵Kabhuzwa Jesu akanayila pa ifuba tjitje kati, “She, ndiani?”

²⁶Jesu kanshandula eti, “Ndi iwoyu wandinowopa bhemu le tjiwunga ndaliseba mu sopo.” Ndizo wakati aseba bhemu le tjiwunga kalipa Judasi nkololo wa Simoni Isikariyoti.

²⁷Kukati Judasi atola bhemu le tjiwunga, Satani kangina munli. Jesu kati kunli, “Thama ulibilidza tjaunoshaka thama.”

²⁸Bose bakabe bali ipapo bakasihwisise kuti ini Jesu edwa Judasi eijalo.

²⁹Ngobe Judasi wakabe akabhata hwomo ye mari, bamwe bakaalakana, kuti Jesu unon'dwa eti, “Katenge zwatinowosheta ku nzano,” kene kuti ape bashayi tjimwe.

³⁰Ndizo Judasi kati aamutjila bhemu le tjiwunga, kabhuda tjinyolotjo; ngono kwakabe kuli busiku.

³¹Kati abhuda, Jesu kati, “Ngwenu Nkololo we Nthu wakudziwa, ne Ndzimu wakudziwa ngekwe Nkololo uwe.

³²Ndzimu ha wakudziwa nge kukwe, Ndzimu unowonkudza muuli ngono unowonkudza tjinyolotjo.

³³Bana bangu, anditowobe namwi tjibaka tjilefu. Mowondishaka, koga sekwa ndakabudza Bajuta ndomubudzabo ngwenu nditi, ‘Kwandinoyenda, amungayendeko.’

³⁴Ndomupa nlayo ntshwa nditi, ‘Mudane. Koga sekwa ndakamuda, namwibo mudane.’

³⁵Bathu bose banowoziba kuti mu badiyiwa bangu ha mudana.”

³⁶Simoni Pita kambhuzwa kati, “She, moyenda ngayi?” Jesu kan'dabila eti, “Kwandinoyenda aunganditobele ngwenu; koga shule kwe tjibaka unowonditobela.”

³⁷Pita kambhuzwa kakale kati, “She, ini ndisingake amotobela ngwenu? Ndakazwimisila kumufila.”

³⁸Ipapo Jesu, kanshandula eti, “Apa unowondifila dumbu kene? Gukurume lowoti lisathu likalila, unowobe wandizwilandula katatu!”