Read Kalanga Johani 14 Bible Online

Johani 14 - Kalanga bible

Johani 14

¹Jesu kati ku bali, “Mimoyo yenyu ngaisidziyidzike. Galanimoyo[15] mu Ndzimu, mugalemoyo ne mundili.

²Mu nzi wa Tate kuna ng'umba njinji. Ha kwabe kusakajalo, apa ndobe ndakamudwa ati, ndonomululwamisila bugalo kene!

³Ngono ha ndayenda kunomululwamisila bugalo, ndowobuya ndiwomutola kuti ndizo mube nami kwandiyako.

⁴Moziba zila ye kwandinoyenda.”

⁵Tomasi kati kunli, “She, atitoziba kwamunoyenda. Tingaziba zila ye kwamunoyenda tjini?”

⁶Jesu kabashandula eti, “Ndimi zila ne malebeswa ne butjilo. Akuna unozha kuna Tate asapinda nami.

⁷Ha mabe mundiziba mobe makaziba kose na Tate. Kudwa ngwenu mobaziba kakale mababona.”

⁸Filipo kati, “She, mutilakidze Tate ngono ikoko kowobe kwakatilizana.”

⁹Jesu kanshandula eti, “Autondiziba kene Filipo, ndakabe namwi tjibaka tjilefu kungapa? Iye wandibona wabona Tate. Ini uti, ‘Mutilakidze Tate?’

¹⁰Apa autogalamoyo kuti ndi muna Tate na Tate bamundili kene? Matama andinomubudza anditoazwilebegwa. Tate banogala mundili ndibo banoshinga nshingo wabo.

¹¹Galanimoyo muna tjandinoleba anditi ndi muna Tate na Tate bamundili; koga ha mukong'wa, ngono galanimoyo ngekwa iyo mishingo.

¹²Ndolebesa tjose ndoti kumuli, iye unogalamoyo mundili unowothamabo mishingo yandinothama, dumbu ndingati unowothama mishingo mikulu pana iyeyi, ngobe ndoyenda kuna Tate.

¹³Kose kwamunokumbila nge zina langu ndowokuthama, kuti ndizo gudzo la Tate libong'we mu Nkololo.

¹⁴Ha mukumbila tjimwe ne tjimwe nge zina langu, ndowotjithama.

¹⁵“Ha mundida mowolondolodza milayo yangu.

¹⁶Ndowokumbila tate, ngono banowomupa mmwe Mbhatshi unowobe namwi nge kusingapele,

¹⁷iyo Meya inolakidza malebeswa e Ndzimu. Shango aitowoiamutjila se mbhatshi wayo, ngobe aitoibona kakale aitowoiziba. Koga imwi moiziba, ngobe inogala namwi kakale imumuli.

¹⁸“Anditowomusiya muli siyang'wa; ndowobuya kumuli.

¹⁹Shule kwe tjibaka tjifupi, bathu be shango ino abatjowondibona, koga imwi mowondibona. Nge kuti ndotjila, mowotjilabo.

²⁰Mu zhuba ilelo mowobona kuti imi ndi muna Tate, ngono imwi mu mundili nami ndi mu muli.

²¹“Iye unoziba kakale elondolodza milayo yangu, ndiye unondida. Unondida unowodiwa ndi Tate, namibo ndowon'da kakale ndowonzwilakidza.”

²²Ipapo Judasi, kusi Judasi Isikariyoti kati, “She, ini mushaka zwilakidza ku tili musingazwilakidze ku bathu bose be shango?”

²³Jesu kan'dabila eti, “Iye unondida unowolondolodza zwidiyo zwangu. Tate banowon'da, ndizo towozha kunli tikagala naye.

²⁴Iye usingandide aatowolondolodza zwidiyo zwangu. Zwidiyo izwezwi zwamunohwa ate zwangu, nge zwa Tate, ibo bakandituma.

²⁵“Kose ikoku ndakakuleba nditji namwi.

²⁶Koga Mbhatshi, Meya yakayengemala, unowotumwa ndi Tate nge zina langu, unowomudiya zwithu zose, kamukumbuludza tjimwe ne tjimwe tjandakamubudza.

²⁷“Ndomusiyila kunyalala, ndomupa kunyalala kwangu. Anditomupa iko sekwa kunopa shango. Mimoyo yenyu ngaisidziyidzike kakale musitje.

²⁸Makahwa nditi, ‘Ndoyenda ngono ndowobuya kumuli.’ Ha mabe mundida mobe mashatha, ngobe ndoyenda kuna Tate. Ngobe ibo bakulu pandili.

²⁹Ndamubudza ngwenu kusina tjathu tjikashingikala, kuti ndizo ha kushingikala mugalemoyo.

³⁰Anditjowolebeleka namwi tjibaka tjilefu, ngobe mbusi we shango ino unozha. Aana simba mundili,

³¹koga shango yakafanila ziba kuti ndoda Tate kakale, ndizo ndothama tjandalayiwa ndibo. “Buyani tiyende.”