Read Kalanga Johani 15 Bible Online

Johani 15 - Kalanga bible

Johani 15

¹“Imi ndi nzhambi wakwako, Tate ndibo ntjengeti wawo.

²Banothubula lutabi gumwe ne gumwe gumundili gusingazwale, koga lutabi gumwe ne gumwe gunozwala mitjelo banogusunulila kuti guzwale mitjelo minjinji.

³Imwi makayitiwa babuyanana kale nge dama landakamudiya.

⁴Galani mundili, namibo ndowogala mu muli. Akuna lutabi gungazwala mitjelo gusi muna mayi, gwakafanila be mu nzhambi. Namwibo amungazwale mitjelo kuzhe kwe mugala mundili.

⁵“Ndimi nzhambi ngono imwi mu thabi. Iye unogala mundili namibo ndigala munli, unowoyita mitjelo minjinji, ngobe kuzhe kwangu akuna tjamungashinga.

⁶Iye usingagale mundili, unowolashiwa se lutabi gwathubugwa, gukaswaba gukawoma. Thabi dzakajalo dzokubunganyiwa dzikaposegwa mu moto dzikatshwa.

⁷Ha mugala mundili ne matama angu egala mu muli, kumbilani tjamushaka ngono mowotjithamigwa.

⁸Tate banokudziwa ndi ikoku, kuti muyite mitjelo minjinji muli badiyiwa bangu.

⁹Ndomuda koga sekwa ndinodiwa ndi Tate. Galani mu ludo gwangu.

¹⁰Ha mulondolodza milayo yangu, mowogala mu ludo gwangu koga sekwa ndakalondolodza milayo ya Tate ndikagala mu ludo gwabo.

¹¹“Ndomubudza ikoku kuti ndizo shatho yangu ibe mu muli kuyita kuti mushathe nge buzhalo.

¹²Nlayo wangu hwuti, mudane sekwa ndakamuda.

¹³Akuna nthu una ludo lukulu pana igogu, gwe kuti nthu nng'ompela afile bazwalani babe.

¹⁴Mu bazwalani bangu ha muthama tjandinoti muthame.

¹⁵Anditjamudana balanda, ngobe nlanda aatoziba tjinoshingwa ndi tetshi uwe. Ndomudana bazwalani, ngobe ndakamuzibisa kose kwandakahwa ndi Tate.

¹⁶Amuzondishalula, koga ndimi ndakamushalula amupa nshingo kuti muyende munozwala mitjelo inowogalila tjose. Tate banowomupa kose kwamunokumbila nge zina langu.

¹⁷Nlayo wangu ndi hwoyu, mudane.

¹⁸“Ha shango imubenga, zibani kuti yakabenga imi kutanga.

¹⁹Ha mabe muli be shango, shango yabe yomuda se bayo. Se musi be shango ino, koga ndakamushalula amudusa mu shango, shango inomubenga.

²⁰Alakanani matama andakamubudza nditi, ‘Akuna nlanda nkulu pana tetshi uwe.’ Ha bakandidziyidza banowomudziyidzabo. Ha bakalondolodza zwidiyo zwangu, banowolondolodzabo zwidiyo zwenyu.

²¹Banowomubhata nge zila iyeyi ngobe mu batobeli bangu, ngobe abatoziba iye wakandituma.

²²Ha ndabe ndisakazha ndikalebeleka nabo, banobe basina jinyo; koga ngwenu abana tjabangadzeta nditjo mu jinyo labo.

²³Iye unondibenga unobenga Tatebo.

²⁴Ha ndabe ndisakathama mishingo isina wakatongo ithama pakati kwabo, banobe basina jinyo; koga bakabona ngono bakabenga tose imi na Tate.

²⁵Ikoku kwakashingikala kuti kuwililane ne dama lakakwagwa mu nlayo wabo, linoti, ‘Bakandibengela suli.’

²⁶“Mbhatshi unowoti ezha, iye wandinowotuma kumuli edwa kuna Tate, Meya inolakidza malebeswa e Ndzimu, inodwa kuna Tate inowotendeka nge kwangu.

²⁷Namwibo mu batendeki, ngobe makagala nami kudwa mu kutangisa.