Read Kalanga Johani 16 Bible Online

Johani 16 - Kalanga bible

Johani 16

¹“Ndamubudza kose ikoku kuti musilashike.

²Banowomutata mu ng'umba dze mitembezelo. Nge malebeswa tjibaka tjozha tje kuti mmwe ne mmwe unomubulaya unowokumbula kuti nge kuthama eijalo, ndiko ha eshingila Ndzimu.

³Banowothama mishingo yakajalo, ngobe abazoziba Tate kene imi.

⁴Ndamubudza ikoko kuti ndizo tjibaka tjiti tjizha muzibe kuti ndakamubudza kutjikale. “Andizomubudza ikoku mu kutangisa, ngobe ndakabe ndi namwi.

⁵Ngwenu ndoyenda kuna iye wakandituma, ngono akuna iye wenyu unondibhuzwa eti, ‘Moyenda ngayi?’

⁶Ngekuti ndamubudza zwithu izwezwi mazhala buyendasi.

⁷Koga ndolebesa tjose nditi kumuli, kuyenda kwangu kowobe ne mbuzilo mu muli. Ha ndisayenda, Mbhatshi atowozha kumuli, koga ha ndiyenda, ndowontumila kumuli.

⁸Ha ezha, unowolakidza shango kuti yagala ihwila ntome ngekwe tjibi ne ndulamo nenge kusumikilisa;

⁹ngekwe tjibi, ngekuti bathu abatogalamoyo mundili,

¹⁰ne ngekwe ndulamo, ngekuti ndoyenda kuna Tate, ngono amutjawondibona,

¹¹ngekwe kusumikilisa, ngekuti mbusi we shango ino wakasumikilisiwa kale.

¹²“Nditjina zwithu zwinjinji zwanditjawomubudza, koga amungatubule kuzwihwilila.

¹³Kowoti Meya ye lebeswa izha, inowomutungamila mu malebeswa wose. Aitowozwilebelekegwa, koga inowomubudza tjainobe ihwa kakale inowomubudza nenge zwitjawozha.

¹⁴Inowondikudza, ngobe inowotola tjandinoipa ikamuzibisa itjo.

¹⁵Kose kwa Tate nge kwangu, ndizo nditi Meya inowotola tjandinoipa ikamuzibisa itjo.

¹⁶“Mu tjibaka tjifupi amutowondibona kakale. Ngono shule kwe tjibaka tjifupi mowondibona kakale.”

¹⁷Bamwe be badiyiwa babe bakabhuzwana beti, “Unodwani ha eti, ‘Mu tjibaka tjifupi amutowondibona, koga shule kwe tjibaka tjifupi mowondibona kakale,’ ne kuti, ‘Ndoyenda kuna Tate?’ ”

¹⁸Bakadwilila bakati, “Apa unodwani ha eti, ‘Tjibaka tjifupi?’ Atitohwisisa tjaanoleba.”

¹⁹Jesu kabona kuti banoshaka ku mbhuzwa ngekwa ikoku ngono kati ku bali, “Apa mobhuzwana kene kuti ndabe ndidwani ha nditi, ‘Shule kwe tjibaka tjifupi amutowondibona, koga mu tjibaka tjifupi mowondibona kakale kene?’

²⁰Ndolebesa tjose ndoti kumuli, mowolila mukamimila koga shango iyo inowobe yakashatha. Mowobe mu buyendasi, koga buyendasi gwenyu gowoshanduka gukabe kushatha.

²¹Nkadzi ha etshibama unobe mu zwibhayo, ngobe tjibaka tjitje tjazha, koga ha mwana uwe atjizwagwa unokangang'wa gwadziwa kukwe, ngobe mwana wazwagwa mu shango.

²²Namwibo ngwenu mogwadziwa, koga ndowomubona kakale, ngono mowoshatha mu mimoyo yenyu. Kushatha kwamusingake mukakutolegwa nge nthu.

²³“Mu zhuba ilelo amutowondikumbila tjimwe. Ndolebesa tjose ndoti kumuli, Tate banowomupa tjimwe ne tjimwe tjamunokumbila nge zina langu.

²⁴Kuswikila ngwenu amuna tjamakakumbila nge zina langu, kumbilani ngono mowopiwa, kuti ndizo mushathe nge buzhalo.

²⁵“Nenguba ndabe ndilebeleka ndipesa, tjibaka tjowozha tjandinowolebeleka ngekwa Tate ndisingapese.

²⁶Mu zhuba ilelo mowokumbila ku bali nge zina langu. Anditoti ndowomukumbilila kuna Tate.

²⁷Tate banomuda, ngobe makandida mukagalamoyo kuti ndakadwa ku Ndzimu.

²⁸Ndakadwa kuna Tate, azha mu shango, ngono ndosiya shango, kakale ndobgwilila kuna Tate.”

²⁹Ipapo badiyiwa ba Jesu bakati, “Ngwenu molebeleka mutjenesa, amutjapesa.

³⁰Ngwenu tobona kuti moziba zwithu zose kakale akutjasheteka kuti kube kutjina unomubhuzwa. Oku kotithama kuti tigalemoyo kuti makadwa ku Ndzimu.”

³¹Jesu kati, “Apa ngwenu mogalamoyo kene?

³²Tjibaka tjozha, nge malebeswa tjibaka tjazha tjamunowopalalana mmwe ne mmwe kayenda kanyi kukwe. Mowondisiya ndili ndoga. Koga ndowobe ndisi ndoga, ngobe Tate banami.

³³Ndamubudza zwithu izwezwi kuti ndizo muwane kunyalala mundili. Ngono mu shango ino mowogwadzisiwa. Koga simanimoyo. Ndakakunda shango!”