Read Kalanga Johani 17 Bible Online

Johani 17 - Kalanga bible

Johani 17

¹Jesu kati aleba ikoku, kalinga pezhugwi ngono katembezela eti, “Tate, tjibaka tjazha. Kudzani Nkololo wenyu, kuti Nkololo na iye amukudze,

²ngobe makampa simba pezhugwi kwe bathu bose kuti ndizo ape butjilo gusingapele kuna ibabo bose bamakampa.

³Ogu ndigo butjilo gusingapele, kuti bazibe kuti ndimwi moga Ndzimu we malebeswa, bazibe na Jesu Kirisiti iye wamakatuma.

⁴Ndakamukudza mu shango nge kuwidza nshingo wamakandipa.

⁵Ngono ngwenu Tate, mundikudzeni kwamuyako nge kudziwa kwandakabe ndinako nditji namwi shango isathu ikabumbiwa.

⁶“Ndakazibisa zina lenyu kuna ibabo bamakandipa mu shango ino. Bakabe bali benyu, makandipa ibo. Bakalondolodza dama lenyu.

⁷Ngwenu banoziba kuti kose kwamakandipa kodwa kumuli;

⁸ngobe ndakabapa matama amakandipa, ngono bakaamutjila. Bakaziba tjose, kuti ndakadwa kumuli, kakale banogalamoyo kuti makandituma.

⁹“Ndobatembezelela; anditotembezelela shango, ndotembezelela ibabo bamakandipa, ngobe nge benyu.

¹⁰Bose bandinabo nge benyu, na ibo bose bamunabo nge bangu, ngono ndakakudziwa nge kwabo.

¹¹Anditjowogala mu shango ino, koga ibo batjasala muili, imi ndozha kumuli Tate bakayengemala, mubavikile nge zina lenyu, ilo zina lamakandipa, kuti ndizo babe bang'ompela saswi tili bang'ompela.

¹²Ndakati nditji nabo, ababakilila nge zina ileli lamakandipa. Ndakabatjengeta ngono, akuna wakalashika kuzhe kwa iye wakabe akalingisanyiwa ne kuti alobe, kuti ndizo matama e hwalo dze Ndzimu asiwile pasi.

¹³Ngono ngwenu ndozha kumuli, koga ndoleba zwithu izwezwi nditjimu shango kuti ndizo babe ne kushatha kwangu mubali nge buzhalo.

¹⁴Ndakabapa dama lenyu ngono shango ino ikababenga, ngobe ate bali be shango ino, sami ndisi we shango ino.

¹⁵Anditokumbila kuti mubaduse mu shango, koga ndokumbila kuti mubavikile muna Mbi.[16]

¹⁶Ate bali be shango ino sami ndisi we shango ino.

¹⁷Mubayengemadze mu malebeswa, dama lenyu li malebeswa.

¹⁸Sekwa makandituma mu shango, nami ndakabatumabo mu shango.

¹⁹Ndozwiyengemadza nge kwabo kuti ndizo na ibobo bayengemadziwe mu malebeswa.

²⁰“Anditotembezelela ibaba koga, ndotembezelelabo na ibabo banowogalamoyo mundili nge dama labo.

²¹Ndotembezela kuti bose babe bang'ompela. Samwi Tate, muli mundili, nami ndili mu muli, dzene na ibobo bangabe mutili, kuti ndizo shango igalemoyo kuti makandituma.

²²Ndakabapa gudzo ilo lamakandipa, kuti ndizo babe bang'ompela, saswi tili bang'ompela,

²³imi ndili mubali namwi muli mundili, kuti ndizo babe bang'ompela nge buzhalo ne shango izibe kuti makandituma, ngono mobada koga sekwa munondida.

²⁴“Tate! Makandipa ibo, ngono ndoshaka kuti babe nami kwandiyako, kuti babone gudzo langu, ilo gudzo lamakandipa, ngobe makandida shango ino isathu ikabumbiwa.

²⁵Tate bakalulwama, nenguba shango isingamuzibe, koga imi ndomuziba, na ibaba banoziba kuti makandituma.

²⁶Ndakabazibisa zina lenyu, ngono ndowodwilila ndithama kuti lizibgwe, kuti ndizo ludo gwamunondida ndigo gube mubali ne nge kuti nami ndibe mubali.”