Read Kalanga Johani 18 Bible Online

Johani 18 - Kalanga bible

Johani 18

¹Jesu kati apedza tembezela, kayenda ne badiyiwa babe kanotjuluka nkuku we Kidironi. Kwakabe kuna nnda seli kwawo, Jesu ne badiyiwa babe bakangina mu nnda iwoyu.

²Ngono Judasi, iye wakawonga Jesu, wakabe euziba, ngobe Jesu wakabe egala eshangana ne badiyiwa babe kuuli.

³Ndizo Judasi kayenda ku nnda iwoyo akatungamila babhayani ne balindi be Ng'umba ye Ndzimu banodwa ku bapirisiti bakulu ne Bafarasi bakasenga mathumo ne mavone.

⁴Jesu se akabe eziba tjimwe ne tjimwe tjakabe tjowonshingikalila, kapindila mbeli kwe badiyiwa babe ngono kabhuzwa babhayani kati, “Ndiani wamunoshaka?”

⁵Bakan'dabila beti, “Toshaka Jesu we Nazareta.” Jesu kabadwa kati, “Ndimi.” Judasi n'wongi, wakabe anabo.

⁶Ngono kukati Jesu eti, “Ndimi” bakasedza nge kushule bakawila pasi.

⁷Jesu kababhuzwa kakale kati, “Ndiani wamunoshaka?” Bakati “Jesu we Nazareta.”

⁸Jesu kati, “Ndamubudza kale kuti ndimi. Ha mushaka imi, letjani balume ibaba bayende.”

⁹Wakaleba ikoku kuti matama aakabe atongo leba kutanga asiwile pasi, anoti; “Tate, andizolashikigwa nenguba ali nng'ompela we bamakandipa.”

¹⁰Simoni Pita wakabe ana bukanu, kagushomola katema nlanda we Ntungamili we bapirisiti kanthubula zebe ye luji. Zina la iwoyo nlanda lakabe liyi Maliko.

¹¹Ipapo Jesu kati kuna Pita, “Bgwiliza bukanu gugo mu khata. Apa unoalakana kuti anditowong'wa mu bhepe le kudziyidziwa landakapiwa ndi Tate kene?”

¹²Ipapo babhayani be Baroma ne Nkulu wabo ne balindi be Ng'umba ye Ndzimu bakabhata Jesu, bakansunga.

¹³Kutanga bakansa kuna Anasi, nkalabgwa wa Kaifasi, iye wakabe ali Ntungamili we bapirisiti gole ilelo.

¹⁴Kaifasi ndiye wakabe atongo kumbuludza Bajuta kuti koyita kuti nthu nng'ompela afe pana kuti kufe bathu bose.

¹⁵Simoni Pita ne mmwe n'diyiwa bakatobela Jesu. Iwoyo mmwe n'diyiwa kaswika kanginabo tje mukati kwe nsha we Ntungamili we bapirisiti, ngobe iye wakabe ezibgwa nge Ntungamili we bapirisiti.

¹⁶Pita iye kasala kuzhe tje pa nkoba. Ipapo iwoyo n'diyiwa wakabe ezibgwa nge Ntungamili we bapirisiti kabhuda kanolebeleka ne nlandakadzi unolinda pa nkoba, ngono kangina na Pita mukati.

¹⁷Mwanadi iwoyu kadwa Pita kati, “Apa ate uli mmwe we badiyiwa ba iwoyu nlume kene?” Pita kan'dabila eti, “Ate ndili mmwe wabo.”

¹⁸Kwakabe kupota, ngono balanda ne balindi bakabe bedziya moto, ngono Pita wakabe anabo edziyabo moto.

¹⁹Ntungamili we bapirisiti akabhuzwa Jesu ngekwe badiyiwa babe ne nge kudiya kukwe.

²⁰Jesu kan'dabila eti, “Ndagala ndilebeleka ne bathu patjena, ndakadiya mu ng'umba dze mitembezelo ne mu Ng'umba ye Ndzimu, kunokubungana Bajuta bose. Andina tjandakaleba muzwikohwa.

²¹Ini ngono mundibhuzwa? Bhuzwani bathu bakandihwa. Mubabhuzwe tjandakababudza, banoziba tjandakaleba.”

²²Jesu kati eleba eijalo mmwe we balindi bakabe bali ipapo kanloba mu lushaya kati, “Unodabila Ntungamili we bapirisiti tjini kene!”

²³Jesu kanshandula eti, “Ha ndaleba tjimwe tjakabipa, undilakidze itjo. Koga ha ndilebesa muna tjandaleba, unondilobelani?”

²⁴Ipapo Anasi kapitshila Jesu akasungwa kuna Kaifasi Ntungamili we bapirisiti.

²⁵Simoni Pita kati atjimile ipapo edziya moto, bamwe bakambhuzwa bakati, “Apa ate uli mmwe we badiyiwa babe kene?” Pita kazwilandula kati, “Ate ndili mmwe wabo.”

²⁶Mmwe we balanda be Ntungamili we bapirisiti, wakabe ali gamu le nlume wakabe athubugwa zebe ndi Pita, kabhuzwa kati, “Apa andizokubona unaye mu nnda kene?”

²⁷Kakale Pita kalandula eti, “Aa, ndodwa!” Tjinyolotjo gukurume likalila.

²⁸Kwakati ku tjimangwanana bakadusa Jesu mu ng'umba ya Kaifasi bakan'yisa ku ng'umba hwulu ye nlauli we Nroma. Ngono Bajuta bakasingine mu ng'umba ye nlauli, ngobe bakabe beshaka kuti batubule kuja zojiwa zwe Nzano we Kupinda pezhugwi bakatjenapala, nge mpanga we Tjijuta.

²⁹Ndizo Pilato kabhuda kayenda ku bali kababhuzwa kati, “Mukati nlandu uwe ini?”

³⁰Bakan'dabila beti, “Tobe tisanlonga mu maboko enyu, ha abe asina bubi gwaathama.”

³¹Pilato kabadwa kati, “Muntole munonsumikilisa nge nlayo wenyu.” Bakan'dabila beti, “Iswi atina fanilo ye kubulaya nthu.”

³²Oku kwakashingikala kuti ndizo kuzhadzisike matama a Jesu aakaleba ngekwe lufu gugwe.

³³Pilato kabgwilila mu ng'umba kadana Jesu. Kambhuzwa kati, “Apa u Mambo we Bajuta kene?”

³⁴Jesu kambhuzwabo kati, “Apa bhuzo iyeyi inodwa mukuli kene bamwe bakubudza nge kwangu?”

³⁵Pilato kan'dabila eti, “Imi ate ndili Njuta. Walongwa mu maboko angu nge bathu ba kanyi kuko ne bapirisiti babo bakulu. Watjinyani?”

³⁶Jesu kati, “Bushe gwangu ate guli gwe shango ino, ha bushe gwangu gwabe guli gwe shango ino, balanda bangu banobe bagwa kudzibila Bajuta kundisunga. Aa, bushe gwangu ate guli gwaipapano!”

³⁷Ndizo Pilato kati kunli, “Ndizo u mambo kene?” Jesu kan'dabila eti, “Ndiwe unoti ndi mambo. Imi ndakazwagwa azha mu shango ino, ndizhila kuwotendeka ngekwe malebeswa. Iye umu malebeswa unondihwilila.”

³⁸Pilato kabhuzwa kati, “Malebeswa ini?” Pilato kati ajalo kabhudila kuzhe kakale ku Bajuta kabadwa kati, “Anditobona tjamunonsekesela.

³⁹Koga nge kuyendidzana nge mpanga wenyu, ndagala ndimusunungulila nsungwa nng'ompela mu nsi we Nzano we Kupinda pezhugwi. Moshaka kuti ndimusunungulile Mambo we Bajuta kene?”

⁴⁰Bakan'dabila bemimila beti, “Kusi iwoyu nlume! Koga toshaka Bharabhasi!” Bharabhasi wakabe ali tjigebeng'a.