Read Kalanga Johani 19 Bible Online

Johani 19 - Kalanga bible

Johani 19

¹Ipapo Pilato katola Jesu kati ngaalobgwe.

²Babhayani bakaluka tjiala tje mihwa bakaambadza itjo mu nsholo, bakaambadza hazu ye mbala nshaba wakabondelela;

³ngono bakayenda kunli bakati, “Dumilani, Mambo we Bajuta,” bakampkhwaula mu lushaya.

⁴Pilato kabhudila kuzhe kakale kati ku Bajuta, “Bonani, ndon'dusila kuzhe kumuli kumuzibisa kuti imi anditobona tjimwe tjandingantilika nlandu nditjo.”

⁵Ndizo Jesu kabhudila kuzhe, akaambala tjiala tje mihwa ne hazu ye bushaba gwakabondelela. Pilato kati ku bali, “Woyu nthu wenyu!”

⁶Bapirisiti bakulu ne balindi be Ng'umba ye Ndzimu bakati bembona, bakamimila beti, “Mumbambule! Mumbambule!” Pilato kati ku bali, “Muntole imwi mumbambule. Imi anditobona tjimwe tjandingantilika nlandu nditjo.”

⁷Mbunga we Bajuta ukanshandula uti, “Iswi tina nlayo unoti wakafanila kuti afe, ngobe kati Nkololo we Ndzimu.”

⁸Pilato kati ehwa ikoku katja kwazo,

⁹kabgwilila mu ng'umba ye nlauli kabhuzwa Jesu kati, “Unodwa ngayi?” Koga Jesu kasindabile.

¹⁰Pilato kati kunli, “Apa autoda kulebeleka nami kene? Autoziba kuti ndina simba le kukusunugula kose ne simba le kukubambula kene?”

¹¹Jesu kashandula eti, “Iwe ungabe usina simba mundili, apa wabe usakalipiwa lidwa kudzimu. Ndizo iye wandizhisa ku kuli una tjibi tjikulu kupindisa.”

¹²Pilato kati ehwa ikoku, kagwisa kuwana zila yaangasunungula Jesu ndiyo. Koga Bajuta bakamimila beti “Ha unsungunula, unowobe usi nzwalani wa Kaisara! Mmwe ne mmwe unozwithama mambo, unonyanyayidza Kaisara!”

¹³Pilato kati ehwa matama iyawa, kadusila Jesu kuzhe, kagala mu tjigalo tje nsumikilisi mu bugalo gunodang'wa kuyi, “Budzilo gwe Mabgwe.” Mu Tjihebheru goyi “Gabhata.”

¹⁴Kwakabe kuli masikati makulu kululwamisigwa Nzano we Kupinda pezhugwi. Pilato kati ku Bajuta, “Woyu Mambo wenyu!”

¹⁵Bakamimila beti, “Kutjena naye, kutjena naye mumbambule!” Pilato kababhuzwa eti, “Apa moshaka kuti ndibambule mambo wenyu kene?” Bapirisiti bakulu bakan'dabila beti, “Atina mmwe mambo kuzhe kwa Kaisara!”

¹⁶Ndizo Pilato kabapa Jesu kuti anobambugwa. Bakatola Jesu bakayenda naye.

¹⁷Wakabhuda akasenga tjileyanyo tjitje, kayenda kanoti ku bugalo gunoyi “Ipepe tje Nsholo.” Mu Tjihebheru godang'wa “Gologota.”

¹⁸Ndiko kwabakanombambulilako ne bamwe balume babili, mmwe ku luboko gwe luji, mmwe kuna gwe lumeshwe, Jesu iye ali pakati kwabo.

¹⁹Pilato kakwala zibiso kainamatidza mu tjileyanyo tja Jesu. Matama ayo akabe ebalika sa woku, “JESU WE NAZARETA, MAMBO WE BAJUTA.”

²⁰Bathu banjinji bakaibala, ngobe pathu ipapo pakabambuligwa Jesu pakabe pali pejo ne nzi nkulu. Zibiso iyeyi yakabe yakakwagwa nge lulimi gwe Tjihebheru ne gwe Tjilatini ne gwe Tjigiriki.

²¹Bapirisiti bakulu ne Bajuta bakati kuna Pilato, “Usikwale uti ‘MAMBO WE BAJUTA’ kwala uti, ‘Iwoyu nlume kati, imi ndi mambo we Bajuta.’ ”

²²Pilato wakabadabila eti, “Tjandakwala ndakwala.”

²³Babhayani bakati babambula Jesu, bakatola zwiambalo zwizwe bakazwikobana nge bunna gwabo, mmwe ne mmwe wabo katola tjing'ompela. Bakatola ne hempe iye, yakabe ili jila ling'ompela lakalukiwa lisina nthumo.

²⁴Bakalangana beti, “Tisiipalule, ngatikandileni tibone kuti inowobe ya ani.” Ikoku kwakashingikala kuti matama e Hwalo dze Ndzimu asiwile pasi anoti, “Bakakobana zwiambalo zwangu hempe yangu bakailobela hakata.” Izwezwi ndizo zwakathamwa nge babhayani.

²⁵Mme ba Jesu bakabe bali mile pejo ne tjileyanyo tjitje bana mannini babe Mariya, nkadzi wa Kileopasi, na Mariya we Magadala.

²⁶Jesu kabona mmeyabe ne n'diyiwa waakabe eda bali mile ipapo, ngono kati kuna mmeyabe, “Nkadzi nkulu, nkololo wenyu hwoyo.”

²⁷Kati ku n'diyiwa iwoyu, “Abo mmeyabo.” Kudwila mu tjibaka itjetjo n'diyiwa iwoyo katola Mariya kanogala naye ku nzi uwe.

²⁸Jesu kaziba kuti ngwenu kose kwawila, koga kuti matama e Hwalo dze Ndzimu asiwile pasi kati, “Ndina nyota.”

²⁹Kwakabe kuna ndilo izhele nkumbi unobaba, ngono bakadubika lungudze muuli, bakagupomba mu lushanga gwe nti unoyi hosapu, bakayisa ku nlomo uwe.

³⁰Jesu kang'wa ngono kalebeleka kati, “Kwapela!” Kakotamisa nsholo uwe ngono meya ikathubukana nge nyama.

³¹Bajuta bakakumbila Pilato kuti makumbo e balume babambugwa avung'we ne mibili yabo idelusiwe mu zwileyanyo. Bakakumbila beijalo, ngobe kwakabe kuli zhuba le kuzwilulwamisa, basingashake kuti mibili iyeyi ibe ili mu zwileyanyo mu nsi we Sabata.

³²Ndizo babhayani bakayenda bakanovuna makumbo e nlume we kutanga kudwapo bakavuna e mmwe wakabe abambugwabo na Jesu.

³³Bakati bezha pana Jesu, bakabona kuti wafa kale, ngono bakasivune makumbo awe.

³⁴Mmwe we babhayani, kabhaya Jesu nge thumo mu lubadu, ngono kukatebuka malopa ne vula.

³⁵Nlume wakabona ikoku kushingikala wakapa butendeki nge kwako, kuti namwibo mugalemoyo. Butendeki gugwe malebeswa, na iye unoziba kuti unoleba malebeswa.

³⁶Oku kwakashingikala kuti matama e Hwalo dze Ndzimu asiwile pasi, anoti, “Akuna fupa lile linowovung'wa.”

³⁷Gumwe lukwalo goti, “Banowolinga kunli iye wabakabhaya.”

³⁸Shule kwa ikoku, Josefa we Arimateya, kayenda kanokumbila Pilato kuti ampe itumbu tja Jesu. Josefa wakabe ali n'diyiwa wa Jesu wakabe asingazwilakidze, ngobe akabe etja Bajuta. Pilato kan'dumila kuti atole itumbu tja Jesu, ngono kayenda kanotjitola.

³⁹Nikodemo, iye wakatongo yenda kunobona Jesu busiku, kayenda na Josefa akasenga mira yakashanganyiwa ne gonde tjilizanyo tje seme dzili makumi matatu ana thatu.

⁴⁰Bakatola itumbu tja Jesu bakatjipetela nge jila betjizhodza mafuta e motsha kuyendidzana nge mpanga we Bajuta we kubiganya.

⁴¹Kwakabe kuna nnda ipapo pakabambuligwa Jesu, ngono muuli kwakabe kuna ikumbu tjitshwa tjisakatongo biganyiwa nthu.

⁴²Sekwa kabe kuwomuka kuli Sabata, kakale ikumbu na itjo tjili pejo, bakambiganya mutjili.