Read Kalanga Johani 2 Bible Online

Johani 2 - Kalanga bible

Johani 2

¹Mu zhuba le butatu kwakabe ne nzano we bukwe mu nzi we Kana mu ntuthu we Galili. Mme ba Jesu bakabe bali yapo ku nzano iwoyo.

²Jesu ne badiyiwa babe bakabe bakokiwabo ku bukwe igogo.

³Kukati nkumbi we zhambi wapela, mme ba Jesu bakati kuna Jesu, “Bapelegwa nge nkumbi.”

⁴Jesu kabashandula eti, “Mme, apa moti nditini kene? Tjibaka tjangu atjithu tjikaswika.”

⁵Mmeyabe bakati ku balanda, “Mushinge tjimwe ne tjimwe tjaanowomubudza.”

⁶Kwakabe kwakabigwa hali dzili tathatu dze ntapkhwi hwulu hwulu dze nthamo wakabe ushingisisiwa mu kuzwitjenapadza nge mpanga we Bajuta. Imwe ne imwe yakabe ili hwulu kwaingazhadziwa dzilitha dze vula dzili zana ling'ompela (100).

⁷Jesu kadwa balanda kati, “Zhadzani hali idzedzi nge vula.” Bakadzizhadza tupu!

⁸Ipapo kabadwa kati, “Tjelani vula iyeyi nge nkombe muyise ku n'yendisi we nshingo.” Ndizo bakaiyisa.

⁹N'yendisi we nshingo kati elabila vula iyeyo, ikabe yashanduka yabe nkumbi. Kukati se akabe asingazibe kuti nkumbi iwoyu wadwa ngayi, nenguba balanda ibo bakabe beziba kwawakadwa, kadanila nloboli ntome

¹⁰ngono kati kunli, “Kwagala kupiwa bathu nkumbi unozipa kutanga, bakati bang'wa kunjinji bakakowopiwa nkumbi usingazipe shule. Koga iwe wabiga nkumbi unozipa kuswikila ngwenu!”

¹¹Jesu wakathama itjetji tjilakidzo[3] tje kutanga tje zwilakidzo zwizwe ali ku Kana mu Galili. Nge zila iyeyi kalakidza gudzo lile, ngono badiyiwa babe bakagalamoyo munli.

¹²Shule kwa ikoku kadelukila ku Kapenaume, iye na mmeyabe ne banung'una babe ne badiyiwa babe, bakanogala ikoko mazhuba mashomanana.

¹³Nzano we Bajuta we Kupinda pezhugwi wakabe wabe pejo, ndizo Jesu kayenda ku Jerusalema.

¹⁴Kawana bathu betengesa ng'ombe ne pkhwizi ne ngurukuku mu bhakasa le Ng'umba ye Ndzimu ne bakabe betenganya mari bali gele pa tafuli.

¹⁵Kathama rwabha ye nsungo ngono kabatatila kuzhe kwe bhakasa le Ng'umba ye Ndzimu, kose pkhwizi ne ng'ombe, katebula mari e batenganyi be mari kapitula tafuli dzabo.

¹⁶Kadwa ibabo bakabe betengesa ngurukuku kati, “Dusani zwithu izwezwi ipapa muletje kuthama Ng'umba ya Tate matengeselo!”

¹⁷Badiyiwa babe bakakumbula tjakakwagwa mu hwalo dze Ndzimu kuyi, “Kutukutilila ng'umba yenyu kowondija.”

¹⁸Ipapo Bajuta bakan'dwa bakati, “Nditjipi tjilakidzo tjaungathama kulakidza ndaulo ye kuthama zwithu izwezwi?”

¹⁹Jesu kashandula eti, “Kolomodzani Ng'umba iyeyi ye Ndzimu, ngono ndoyimusa mu mazhuba matatu.”

²⁰Bajuta ndizo bakati, “Kwakatola makole ali makumi manna ana matathatu kubaka Ng'umba iyeyi, ngono iwe ukati unowoyimusa mu mazhuba matatu kene?”

²¹Koga Ng'umba ye Ndzimu yaakabe eleba nge kwayo wakabe edwa mbili uwe.

²²Kukati asinomusiwa mu bafi, badiyiwa babe bakakumbula tjaakaleba, ndizo bakagalamoyo mu hwalo dze Ndzimu ne tjakalebgwa ndi Jesu.

²³Kukati atjimu Jerusalema mu Nzano we Kupinda pezhugwi, banji bakagalamoyo mu zina lile bebona zwilakidzo zwaakabe ethama.

²⁴Koga Jesu wakabe asingabagalebgwe ngobe wakabe eziba bathu bose.

²⁵Wakabe asingashake kulebelekegwa nge nthu, ngobe eziba tjimu nkumbulo we nthu.