Read Kalanga Johani 20 Bible Online

Johani 20 - Kalanga bible

Johani 20

¹Kukati mu zhuba lekutanga le tshipi, Mariya we Magadala kabindukila ku ikumbu tja Jesu, kwakabe kutji zhalima, ngono kawana shongwe yakadusiwa pa nkoba.

²Kalabuka kayenda kuna Simoni Pita ne mmwe n'diyiwa wakabe ediwa ndi Jesu, kabadwa kati, “Badusa She mu ikumbu, atitoziba kwabanombiga!”

³Pita na iwoyo mmwe n'diyiwa bakayendabo ku ikumbu tja Jesu.

⁴Bakalabuka, koga iwoyo mmwe n'diyiwa kasiya Pita kanontangila ku ikumbu.

⁵Kakotama kashozhela ngono kabona matyila woga, koga kasingine.

⁶Simoni Pita kawoswika shule kukwe, ngono iye kangina mu ikumbu. Kabona matyila akabe akapetela nfi ali ipapo,

⁷ne tukwi yakabe yakapombedziwa mu nsholo wa Jesu isi pathu pang'ompela ne matyila akabe akapetela nfi. Yakabe itjakapetiwa ili ku poga.

⁸Iwoyo mmwe n'diyiwa, wakabe aswika pa ikumbu kutanga, kanginabo mukati, kabona ngono kaduma.

⁹Bakabe basathu bakahwisisa tjinolebgwa nge Hwalo dze Ndzimu dziti, wakafanila kumuka mu bafi.

¹⁰Badiyiwa bakabgwilila kanyi.

¹¹Koga Mariya kama kuzhe kwe ikumbu kalila. Kati elila, kakotama kashozhela mu ikumbu,

¹²kabona batumwa be kudzimu babili bakaambala zwiambalo zwitjena, bali gele pakabe pakaladzikwa itumbu tja Jesu, mmwe ali ku misholo mmwe ali ku makumbo.

¹³Bakambhuzwa beti, “Nkadzi, unolilani kene?” Kabadabila kati, “Batola She wangu, anditoziba kwabambigako!”

¹⁴Wakati adwa paleba eijalo katendebuka ngono kabona Jesu ali mile ipapo, koga kasizibe kuti ndi Jesu.

¹⁵Jesu kambhuzwa kati, “Nkadzi, unolilani? Unoshaka ani?” Mariya kazwidwa kati pamwe ntjengeti we nnda, ngono kati kunli, “Tate bangu, ha muli imwi mantola, mundibudze kwamambiga kuti ndiyende ndinontola.”

¹⁶Jesu kati, “Mariya!” Ipapo Mariya katendebuka kati nge Tjihebheru, “Rabhoni!” Ikoku kodwa kuti “N'diyi.”

¹⁷Jesu kan'dwa kati, “Usindibhate, ngobe andithu atathila kuna Tate. Koga yenda ku zwikamu zwangu uzwibudze kuti ndotathila kuna Tate, ibo Tate benyu kakale bali Ndzimu wangu ne Ndzimu wenyu.”

¹⁸Mariya we Magadala kayenda kanobudza badiyiwa kuti wabona She, ndizo kababikila tjaadwiwa ndi She.

¹⁹Kukati madekwana e zhuba lekutanga le tshipi, badiyiwa bakakubungana bakazwizhalilila mu ng'umba, ngobe bakabe betja Bajuta. Jesu kazha kama pakati kwabo kati ku bali, “Kunyalala ngakube namwi.”

²⁰Kati ajalo, kabalakidza zwiazha zwizwe ne lubadu gugwe. Badiyiwa babe bakashatha kwazo ipapo bebona She.

²¹Jesu kapapha kati ku bali, “Kunyalala ngakube namwi. Koga sekwa Tate bakandituma, nami ndomutumabo.”

²²Kati aleba eijalo kafemela mubali kati, “Amutjilani Meya yakayengemala.

²³Ha muzwiibhatigwa bathu matjinyo abo, anozwiibhatigwa, koga ha musingabazwiibhatigwe iwo, aatozwiibhatigwa.”

²⁴Mmwe we badiyiwa bali gumi lina babili unoyi Tomasi unodang'wa Bili, wakabe asipo ipapo Jesu eswika.

²⁵Bamwe badiyiwa bakambudza beti, “Tabona She!” Tomasi kabashandula eti, “Kudzina ndibona mabanga e zwipikiri mu zwiazha zwizwe ne kulonga tjinyala tjangu mu mabanga e zwipikiri nenge kulonga tjiazha tjangu mu lubadu gugwe, andingadume.”

²⁶Shule kwe tshipi ing'ompela, badiyiwa bakashangana kakale mu ng'umba na Tomasi ali yapobo. Nenguba mikoba yakabe yakazhaligwa, Jesu wakazha kama pakati kwabo kati ku bali, “Kunyalala ngakube namwi.”

²⁷Ipapo kati kuna Tomasi, “Longa tjinyala tjitjo apapa, ulinge zwiazha zwangu, ubuye ulonge tjiazha tjitjo mu lubadu gwangu. Letja kududumwa ugalemoyo!”

²⁸Tomasi kanshandula eti, “She wangu! Ndzimu wangu!”

²⁹Jesu kati kunli, “Unogalamoyo, ngobe wandibona. Bakakombolegwa ibo banoti basabona ngono bakagalamoyo.”

³⁰Jesu wakashinga zwimwe zwilakidzo zwinjinji mbeli kwe badiyiwa babe zwisakakwagwa mu lukwalo igogu.

³¹Koga izwezwi zwakakwaligwa kuti mugalemoyo kuti Jesu ndiye Mesiya, Nkololo we Ndzimu ne nge kuti nge kugalamoyo mube ne butjilo nge zina lile.