Read Kalanga Johani 21 Bible Online

Johani 21 - Kalanga bible

Johani 21

¹Shule kwa ikoku, Jesu kazwilakidza ku badiyiwa babe kakale pa gungwa gwe Tibheriyasi. Wakazwilakidza sa woku:

²Kwakabe kuli, Simoni Pita wakabe ana Tomasi unodang'wa Bili na Natanaele unodwa ku nzi we Kana mu ntuthu we Galili ne bakololo ba Zebhedi ne bamwe badiyiwa ba Jesu babili; bose bakabe bali yapo.

³Simoni Pita kabadwa kati, “Ndonobhata hwobe.” Bakan'dabila beti, “Naswi toyendabo nawe.” Bakamilika bakayenda bali mu n'goro, ngono bakashaya tjababhata busiku igogo.

⁴Kukati mangwanana, Jesu kama pa phili, koga badiyiwa bakasizibe kuti ndiye.

⁵Kababhuzwa kati, “Bana, apa muna hwobe kene?” Bakan'dabila beti, “Aa, atina.”

⁶Kabadwa kati, “Poselani gwanga tjeku luji gwe n'goro, mowobhata dzimwe.” Bakaposela gwanga ngono bakakong'wa kugukwebela mu n'goro, ngobe babhata hwobe njinji.

⁷N'diyiwa wakabe ediwa ndi Jesu kati kuna Pita, “Ndi She!” Simoni Pita kati ehwa kuti ndi She kazwipomba nge hazu iye, ngobe wakabe ambula zwiambalo zwizwe, kabe etjulukila mu vula.

⁸Badiyiwa bamwe bakantobela ku phili bali mu n'goro, bekweba gwanga guli zhele hwobe. Bakabe basi kule kwazo ne phili, kwakabe kungabe zana le mitha.

⁹Bakati beswika pa phili, bakabona moto ipapo, kwakagotjiwa hwobe ne tjiwunga muuli.

¹⁰Jesu kati ku bali, “Zhisani dzimwe hwobe dzamabhata ngwenu.”

¹¹Simoni Pita kangina mu n'goro kakwebela gwanga mu phili guli zhele hwobe hwulu. Dzose dzakabe dzili zana lina makumi mashanu ana thatu (153). Nenguba dzakabe dzili bunjinji kungapo, adzizopalula gwanga.

¹²Jesu kati ku bali, “Izhani muje!” Akuna wabo wakabe nge tjilopa kumbhuzwa kuti, “Ndiwe ani?” ngobe bakabe baziba kuti ndi She.

¹³Jesu kazha katola tjiwunga, kabapa itjo, kabapa ne hwobe.

¹⁴Oku kwakabe kuli gwe butatu Jesu ezwilakidza ku badiyiwa babe shule kwe kumusiwa kukwe mu bafi.

¹⁵Kukati bapedza kuja, Jesu kati kuna Simoni Pita, “Simoni nkololo wa Johani, apa unondida kupinda ibaba kene?” Pita kan'dabila eti, “Ee, She, moziba kuti ndomuda.” Jesu kati kunli, “Fudza pkhwizana dzangu.”

¹⁶Jesu kati gwe bubili kuna Simoni, “Simoni, Nkololo wa Johani, apa unondida kene?” Simoni kadabila eti, “Ee, She, moziba kuti ndomuda.” Jesu kati kunli “Lisa pkhwizi dzangu.”

¹⁷Jesu kati gwe butatu, “Simoni nkololo wa Johani, apa unondida kene?” Pita kahwa zogwadza, ngobe Jesu embhuzwa gwe butatu eti, “Apa unondida kene?” Kanshandula eti, “She, moziba tjimwe ne tjimwe. Moziba kuti ndomuda!” Jesu kan'dwa kati, “Fudza pkhwizi dzangu.

¹⁸Ndolebesa tjose nditi, wakati uli ntjetjana wakabe uzwiambadza ukamilika ukayenda kumwe ne kumwe kwaunoda, koga ha wakwegula, unowotambunudza maboko awo ukaambadziwa nge mmwe kabuya kakuyisa kwausingade.”

¹⁹Jesu wakaleba matama iyawa elakidza kuti Pita unowofa lufu gwakatini kukudza Ndzimu. Ipapo Jesu kan'dwa kati, “Unditobele!”

²⁰Pita katjebuka shule, ngono kabona n'diyiwa wakabe ediwa ndi Jesu akabatobela; n'diyiwa iwoyo ndiye wakabe akanayila Jesu pa tjilayilo ekowombhuzwa eti, “She, ndiani unowomuwonga kene?”

²¹Pita kati embona, kabhuzwa Jesu eti, “She, oyu iye kee?”

²²Jesu kan'dabila eti, “Ha ndida kuti atjile kudzina ndibuya, uneni nako? Unditobele!”

²³Kudwa ipapo kukaandama makwayi mu badiyiwa ekuti n'diyiwa iwoyo aatowofa. Koga Jesu wakabe asati, “Aatowofa.” Wakabe ati, “Ha ndida kuti atjile kudzina ndibuya, uneni nako?”

²⁴N'diyiwa iwoyo ndiye unotendeka ngekwe zwithu izwezwi kakale ndiye wakazwikwala, ngono toziba kuti butendeki gugwe gu malebeswa.

²⁵Kuna zwithu zwimwebo zwinjinji zwakashingiwa ndi Jesu. Ha tjimwe ne tjimwe tjazo tjakabe tjakwagwa, ndoduma kuti shango yose yabe isingawotubula kuwanila magalo hwalo dzazwakakwagwa mudzili.