Read Kalanga Johani 3 Bible Online

Johani 3 - Kalanga bible

Johani 3

¹Kwakabe kuna nlume we Nfarasi edang'wa Nikodemo, ali ntungamili we Bajuta.

²Nikodemo wakazha kuna Jesu busiku kati kunli, “N'diyi, toziba kuti u n'diyi wakadwa ku Ndzimu, ngobe akuna ungathama zwilakidzo zwaunothama ha Ndzimu usimile naye.”

³Jesu kanshandula eti, “Ndolebesa tjose nditi ku kuli, kuzhe kwe kuti nthu azwagwe butshwa, aangabone bushe gwe Ndzimu.”[4]

⁴Nikodemo kabhuzwa kati, “Nthu wakwegula ungazwagwa tjini? Apa ungangina gwe bubili mu ntumbu wa mmeyabe kuti azwagwe?”

⁵Jesu kanshandula eti, “Ndolebesa tjose nditi ku kuli, kuzhe kwe kuti nthu azwagwe nge vula nenge meya, aangangine mu bushe gwe Ndzimu.

⁶Tjazwagwa nge nyama i nyama, tjazwagwa nge Meya i meya.

⁷Usitjename, ngobe ndikudwa nditi wakafanila kuti uzwagwe butshwa.

⁸Phepo inohwuhwudzila kwainoda, unohwa nsindo wayo, koga autoziba kwainodwa kene kwainoyenda. Kwakajalobo mu mmwe ne mmwe wazwagwa nge Meya.”

⁹Nikodemo kambhuzwa eti, “Kungashingikala tjini ikoku?”

¹⁰Jesu kambhuzwa kati, “Apa u n'diyi mu Iziraela koga autoziba ikoku kene?

¹¹Ndolebesa tjose nditi ku kuli, iswi toleba ngekwe tjatinoziba kakale tobika ngekwe tjatakabona, koga amutoamutjila tjatinobika.

¹²Apa ha ndakamubudza nge zwithu zwe shango mukasidume, mowoduma tjini ha ndimubudza ngekwe zwe kudzimu wali?

¹³Koga akuna wakatongo tathilila kudzimu kuzhe kwa iye wakadeluka edwa kudzimu, iye Nkololo we nthu.”

¹⁴Koga Mushe sekwa akamilidza nyoka mu tjilambanyika ne Nkololo we nthu wakafanila kumilidzigwabo pezhugwi,

¹⁵kuti kene ali ani unogalamoyo munli abe ne butjilo gusingapele.

¹⁶Ngoti Ndzimu wakada shango ino kungapongapo kwawakapa Nkololo wawo uyega kuti kene ali ani unogalamoyo munli asitongofa, koga abe ne butjilo gusingapele.

¹⁷Ngoti Ndzimu auzotuma Nkololo wawo mu shango kuwoyisumikilisa, koga wakantuma kuti shango itjidziwe ndiye.

¹⁸Iye unogalamoyo munli aazosumikilisiwa, koga iye usingagalemoyo wakasumikilisiwa kale, ngobe aazogalamoyo mu zina le Nkololo uyega we Ndzimu.

¹⁹Kusumikilisiwa ndihwoku, tjedza tjakazha mu shango, koga bathu bakada zhalima mu bumo gwe tjedza, ngobe mishingo yabo ili mibi.

²⁰Mmwe ne mmwe unothama bubi nge unobenga tjedza, kakale aatozha mu tjedza, ngobe mishingo iye ingabhudila patjena.

²¹Koga iye unoshinga malebeswa unozha mu tjedza kuti ndizo kuboneke kuti mishingo iye yakashingigwa mu Ndzimu.

²²Shule kwa ikoko, Jesu ne badiyiwa babe bakabhudila mu shango ye Judiya, kwaakapitsha tjibaka nabo edubika bathu.

²³Johani na iyebo wakabe edubika mu Enoni, pejo ne Salima, ngobe kwakabe kuna vula njinji ikoko. Bathu bakabe bezha kunli, ngono bedubikiwa.

²⁴Johani wakabe asathu kalongwa mu ng'umba ye busungwa mu tjibaka itjetjo.

²⁵Ipapo kukabe ne kunyanyayidzana pakati kwe badiyiwa ba Johani ne mmwe Njuta ngekwe tjenapadzo.

²⁶Ngono bakazha kuna Johani bakati, “N'diyi, nlume ihwouje wamakabe munaye seli kwe gwizi gwe Jorodani wamakaleba nge kukwe, wodubikabo ngwenu, ngono mmwe ne mmwe woyenda kunli.”

²⁷Johani kabashandula eti, “Akuna ungabe ne tjimwe kuzhe kwe tjaapiwa tjidwa kudzimu.

²⁸Imwi nge kwenyu muna butendeki gwe kuti ndakati, ‘Andite ndili imi Mesiya, koga ndakatumwa kuzha mu shango mbeli kukwe.’

²⁹Una nlongo nkwasha, nzwalani we nkwasha unobe ali mile ipapo akahwilila unoshatha kwazo ha ehwa hwi le nkwasha. Ndizo kushatha kwangu kwazhadzisika.

³⁰Iye wakafanila kudziwa, imi ayisiwa pasi.”

³¹Iye unodwa pezhugwi upezhugwi kwa bose. Iye unodwa mu shango nge we shango unoleba nge zwe shango, koga iye unodwa kudzimu upezhugwi kwabo bose.

³²Unotendeka ngekwe tjaakabona nenge tjaakahwa, koga akuna unoamutjila butendeki gugwe.

³³Iye unoamutjila butendeki gugwe unolakidza kuti Ndzimu ulebeswa.

³⁴Iye wakatumwa nge Ndzimu unoleba matama e Ndzimu, ngobe Ndzimu unompa Meya nge buzhalo.

³⁵Tate banoda Nkololo wabo, ndizo bakampa zwithu zose.

³⁶Iye unogalamoyo mu Nkololo una butjilo gusingapele, koga iye usingahwilile Nkololo aatowobe ne butjilo, koga bushongola gwe Ndzimu gupezhugwi kukwe.