Read Kalanga Mishingo 1 Bible Online

Mishingo 1 - Kalanga bible

Mishingo 1

¹Mu lukwalo gwangu gwe kutanga, Teofilo, ndakakwala ngekwe zwithu zose Jesu zwaakatangisa kuthama kakale kazwidiya,

²kuswikila zhuba laakatolegwa pezhugwi kudzimu, asinopa batumwa baakabe ashalula ndayo nge Meya yakayengemala.

³Shule kwe kudziyila kukwe wakazwilakidza ku balume ibabo ne butendeki bunjinji gwe kuti unotjila. Wakabazwilakidza mu tjibaka mazhuba ali makumi manna, ngono kalebeleka nabo ngekwe bushe gwe Ndzimu.

⁴Ngono wakati anabo, kabadwa kati basibhude mu Jerusalema, koga balindile tjabakagadziwabgwe ndi Tate, sekwa akaleba eti, “Makahwa ndimi,

⁵ngoti Johani wakabe edubika nge vula, koga mu mazhuba mashomanana anozha imwi mowodubikwa nge Meya yakayengemala.”

⁶Ndizo batumwa bakati bakubungana, bakabhuzwa Jesu bakati, “She, apa mowobgwiliza bushe mu Iziraela mu tjibaka itjetji kene?”

⁷Jesu kati ku bali, “Akute kuli kwenyu kuziba misi ne zwibaka zwakabigwa ndi Tate nge simba labo.

⁸Koga moamutjila simba ha Meya yakayengemala izha mu muli, ngono mowobe batendeki bangu mu Jerusalema ne mu Judiya yose ne Samariya ne ku phelelo dze shango.”

⁹Shule kwe kuleba ikoku, wakatolegwa pezhugwi kudzimu bakanlinga, ngono gole likan'dusa mu mesho abo.

¹⁰Bakati batjakalingisisa pezhugwi ha iye eyenda, tjinyolotjo balume babili bakaambala butjena bakama pabali

¹¹bakabe beti, “Balume be Galili mumilileni ipapo makalinga pezhugwi? Jesu iwoyu, watogwa mu muli eyisiwa kudzimu, unowobuya nge zila iyo zwayo yamabona eyenda ku Ndzimu ndiyo.”

¹²Ipapo batumwa bakabgwilila ku Jerusalema bedwa ku Dombo le Mitoba, lipejo ne Jerusalema kungabe gwendo gwe Sabata[1]

¹³Bakaswika bakatathila pezhugwi ku ng'umba yabakabe begala. Kwakabe kuli Pita na Johani na Jakubo na Enduru na Filipo na Tomasi na Bhatolomeo na Matewu na Jakubo nkololo wa Alifeo na Simoni Nzeloti[2] na Judasi nkololo wa Jakubo.

¹⁴Bose ibaba bakazwimisila kutembezela bali moyo nng'ompela, kose ne bakadzi babakabe banabo na Mariya mme ba Jesu ne banung'una babe.

¹⁵Mu mazhuba iyawo Pita kamilika kama pakati kwe bagalimoyo (bakabe bali mbunga unolizana zana lina bali makumi mabili 120)

¹⁶kabe eti, “Zwikamu zwangu, matama e hwalo dze Ndzimu akalebgwa nge Meya yakayengemala nge nlomo wa Dafite ngekwa Judasi iye wakabe ali ntungamili wa ibabo bakasunga Jesu akafanila kushingikala.

¹⁷Judasi wakabe ali mmwe wedu, ngobe wakabe ashalugwa kube ne gobe mu nshingo iwoyu.”

¹⁸Ngono ngwenu Judasi wakatenga shango nge mari iyawa aakawana nge nshingo uwe wakabipa, iko kwaakawila nge nsholo mu kufa kukwe kaphutukana mabula awe wose kabhudila pazhe.

¹⁹Bathu bose banogala mu Jerusalema bakahwa nge kwako, ndizo nge lulimi gwabo bakadana shango iyeyo Akelidama, kunodwa kuti, Shango ye Malopa.

²⁰“Ngobe kwakakwagwa mu lukwalo gwe Njimbo kuyi, “ ‘Ng'umba iye ngaibe dongo; kushete ne unogala muili.’ “Kwakakwagwa kakale kuyi, “ ‘Mmwe ngaatole mamo awe mu nshingo.’

²¹“Ndizo kusheteka kushalula mmwe we balume bakabe banaswi mu tjibaka tjose She Jesu betjila naswi,

²²kudwa mu tjibaka tjekudubika kwa Johani kuswikila zhuba Jesu laakatolegwa pezhugwi kudzimu edwa mutili, iwoyo wakafanila abe mmwe wedu ali ntendeki we kumuka kwa She Jesu.”

²³Ndizo bakashalula balume babili, Josefa iye wakabe edang'wa Bhasabhasi, kakale edang'wa Jusito, na Matiyasi.

²⁴Ipapo bakatembezela beti, “She, imwi moziba moyo we mmwe ne mmwe, ndizo mutilakidze kuti ndi upi wa ibaba babili wamashalula

²⁵kutola nshingo iwoyu we butumwa wakasiyiwa ndi Judasi eyenda kwaakafanila.”

²⁶Ipapo bakakandila kubona nshalugwa pakati kwe balume ibabo babili, ngono kukawila Matiyasi, ndizo kapapha bali gumi lina nng'ompela.