Read Kalanga Mishingo 10 Bible Online

Mishingo 10 - Kalanga bible

Mishingo 10

¹Kwakabe kuna mmwe nlume mu Sizariya edang'wa Koneliyo, wakabe ali nlauli we babhayani be Baroma bali zana mu gupo lakabe lidang'wa “Gupo le Italiya.”

²Wakabe ali nlume unotja Ndzimu nge lebeswa iye ne nsha uwe wose, wakabe epa basheti zwipo akasununguka etembezela Ndzimu misi yose.

³Kabona mbono limwe zhuba mu matewuko nge tjibaka tje butatu, muili wakabona zubuyanana ntumwa we kudzimu engina kunli eti, “Koneliyo!”

⁴Kalingisisa ntumwa ngotja, ngono kati, “Ini she?” Ntumwa kadabila eti, “Ndzimu unoshathisiwa nge mitembezelo iyo nenge mishingo iyo ye kupa bashayi ngono unokudabila.

⁵Ndizo ngwenu tuma balume ku Jopa kunodana nlume unodang'wa Simoni Pita.

⁶Unogala mu ng'umba ye nsuki we makukuta unoyi Simoni we nzi upejo ne gungwa.”

⁷Ntumwa we kudzimu wakalebeleka naye kati atjiyenda, Koneliyo kadana babili be balanda babe ne mbhayani wakazwipa kudwa muna ibabo bakabe benshinga.

⁸Ndizo kati ababudza tjimwe ne tjimwe tjashingikala, kabatuma ku Jopa.

⁹Tjimuka bakati bali mu zila yabo babepejo ne Jopa, Pita katathila pezhugwi kwe ng'umba nge tjibaka tje masikati kunotembezela.

¹⁰Kabhakhwa nge zhala, ngono kayemula kuja, koga zojiwa zwakati zwitjalulwamisiwa, kabona mbono.

¹¹Kabona kudzimu kwakazhuka, ngono tjimwe tjideluka tjilingika se jila gulu gulu lidelusigwa pasi nge midzibo yalo minna.

¹²Mulili kwakabe kuna njudzi dzose dze phuka ne zwinosoba pasi ne nyuni dzinowuluka.

¹³Hwi likati kunli, “Milika, Pita, ubhaye uje!”

¹⁴Koga Pita kati, “She, nge malebeswa andingake! Andithu aja tjimwe tjakatemapala kene tjisi tjibuyanana.”

¹⁵Hwi likalebeleka naye kakale gwe bubili liti, “Ndzimu tjawakatjenapadza usitjidane tjisi tjibuyanana.”

¹⁶Ikoku kwakashingikala katatu, ngono ipapo jila ilelo likabe libgwilila pezhugwi.

¹⁷Pita kati atjakaabadziwa nge kuti mbono yaabona ingabe idwani, bonani balume bakabe batumwa ndi Koneliyo bakati babhuzwa kuti ng'umba ya Simoni iponi bakabe babe mile pa nkoba.

¹⁸Bakapindisa bakabhuzwa kene, “Simoni unodang'wa Pita egala ipapo?”

¹⁹Pita kati atjakumbula ngekwe mbono, Meya ikati, “Kuna balume batatu banokushaka.

²⁰Ndizo milika udeluke, ngono usizeyeze kuyenda nabo, ngobe ndabatuma.”

²¹Ndizo Pita kadeluka kati ku balume ibabo, “Ndimi wamunoshaka ini tjamuzhisa pano.”

²²Bakadabila beti, “Nlauli we babhayani bali zana, Koneliyo, watituma. Nlume we nlulwami unonamata Ndzimu unotetiwa kwazo nge Bajuta bose. Ntumwa we kudzimu wakayengemala wakambudza kuti akukokele ku ng'umba iye, kuti ndizo ahwe tjaunoleba.”

²³Pita kadanila balume ibabo mu ng'umba bakabe bezi babe. Tjimuka kamilika kayenda nabo; ngono zwimwe zwikamu mu Jopa zwikayenda naye.

²⁴Tjimuka bakaswika mu Sizariya, kwaakabe akalindigwa ndi Koneliyo ne makamu ne bazwalani baanoda baakabe akoka.

²⁵Pita kati engina Koneliyo kanshangamidza, kawila pa makumbo awe ennamata.

²⁶Koga Pita kammilidza. Kati kunli, “Milika, namibo ndi nthu koga.”

²⁷Pita kadwilila elebeleka na Koneliyo, ngono kangina mu ng'umba kwaakawana bathu banjinji bakakubungana.

²⁸Kati ku bali, “Imwi nge kwenyu moziba kuti ate kuli mu nlayo kuti Njuta ashangashangane, kene akumbe mmwe we itjaba tjipoga. Koga Ndzimu wakandilakidza kuti ndisitole mmwe nthu se wakatemapala kene se usi mbuyanana.

²⁹Ndizo wakati unditumila bathu iwe Koneliyo, azha ndikasilambe. Ndizo ngwenu ndobhuzwa tjawandidanila.”

³⁰Koneliyo kati, “Kwakabe kuli nge tjibaka itjetji mazhuba matatu akapinda, ndakabenditembezela mu ng'umba yangu mu tjibaka tje awara ye butatu mu matewuko. Tjinyolotjo nlume wakaambala zwiambalo zwinopenya kama mbeli kwangu.

³¹Ngono kati, ‘Koneliyo, Ndzimu wahwa ntembezelo uwo, ne zwipo zwizo ku bashayi wazwikumbula.

³²Tuma nthu ku Jopa, ku nlume unodang'wa Simoni Pita. Ugele mu nzi wa Simoni, nsuki we makukuta, unogala pejo ne gungwa!’

³³Abe ndokutumila bathu tjinyolotjo, ngono wathama buthu ukazha. Ngwenu tipano tose mbeli kwe Ndzimu, takalindila kuhwa tjimwe ne tjimwe She tjabakudwa kuti utjilebe.”

³⁴Pita kadwa nlomo kati, “Ngwenu ndohwisisa kuti malebeswa Ndzimu autoshalaula.

³⁵Koga mu njudzi dzose, mmwe ne mmwe unotja Ndzimu ethama tjakalulwama, Ndzimu unon'amutjila.

³⁶Unoziba dama Ndzimu lawakatumila ku Iziraela, hwusumikila ndebo mbuya ye kunyalala ndi Jesu Kirisiti, iye ndi She wa bose.

³⁷Ndilo dama lakasumikigwa mu shango yose ye Judiya, kutangisa mu Galili shule kwe kudubikwa kwakadiyiwa ndi Johani;

³⁸Ndzimu sekwa wakashalula Jesu we Nazareta nge Meya yakayengemala nenge simba; sekwa akayenda kumwe ne kumwe eshinga ndulamo, epodza bose bakabe bakatshambilidziwa ndi Satani, ngobe Ndzimu wakabe unaye.

³⁹Iswi ti batendeki be tjimwe ne tjimwe tjaakathama mu shango ye Bajuta ne mu Jerusalema. Bakambulaya nge kunlembeledza mu nti.

⁴⁰Koga Ndzimu wakammusa mu bafi nge zhuba le butatu, ngono ukathama kuti aboneke,

⁴¹kusi ku bathu bose, koga ku tili iswi takashalugwa nge Ndzimu tili batendeki, iswi bakaja naye tikang'wa naye shule kwe amuka mu bafi.

⁴²Ngono wakatilaya kuti tisumikile ndebo mbuya ku bathu ne kuti titendeke kuti ndiye wakabigwa nge Ndzimu kube nsumikilisi we batjili ne bafi.

⁴³Balebesambeli bose banopa butendeki kuti, mmwe ne mmwe unogalamoyo muna Jesu unowozwiibhatigwa zwibi zwizwe nge simba le zina lile.”

⁴⁴Pita kati atjaleba ikoku, Meya yakayengemala ikadelukila pezhugwi kwa bose bahwa dama.

⁴⁵Bagalimoyo bakathumbigwa bakabe bazha na Pita bedwa ku Jopa bakatjenamila kuti Ndzimu wadila tjipo tjawo tje Meya yakayengemala muna Bezwitjaba,

⁴⁶ngobe bakabahwa belebeleka nge ndimi dzipoga be kudza Ndzimu. Pita kalebeleka kati,

⁴⁷“Ibaba bathu baamutjila Meya yakayengemala, koga saswi. Apa uyapo kene ungadzibila kuti badubikwe nge vula?”

⁴⁸Ndizo kalaya kuti badubikiwe nge zina la Jesu Kirisiti. Ipapo bakankumbila kuti atongo gala nabo mazhuba mashomanana.